სატანას სოკო (ლათ. Rubroboletus satanas; 2014 წლამდე Boletus satanas) — შხამიანი სოკო ბოლეტუსისებრთა ოჯახისა. ქუდის დიამეტრი 8-25 სმ (30 სმ-მდე) აღწევს. ქუდს ნახევრადსფეროსებრი და მომრგვალო-ბალიშისებრი ფორმა აქვს, ხორცოვანია, მოთეთრო, მონაცისფრო, ტალახისფერ-მონაცისფრო, ზეთისხილისფერ-მონაცისფრო, ზოგჯერ მოყვითალო და ჟანგმიწა ელფერით, ზოგჯერ მომწვანო ან მოყვითალო-მოვარდისფრო ჩანაცვლებით. რბილობი თეთრი ან მოყვითალოა. ფეხის სიმაღლე 5-15 სმ აღწევს, ხოლო სისქეში 3-10 სმ-ს; ჯერ კვერცხისებრი ან სფეროსებრი, შემდეგ კასრისებრი და სხვა ფორმის. სპორული ფხვნილი ზეთისხილისფერი ან მოყავისფრო-ზეთისხილისფერია. სპორების ზომებია 11-15×4-7 მკმ. სატანას სოკო გვხვდება ნათელ ფოთლოვან ტყეებში მუხასთან, წიფელთან, რცხილასთან, თხილთან, წაბლთან, ცაცხვთან, რომლებთანაც ერთად მიკორიზას წარმოქმნის, დიდწილად, კირქვიან ნიადაგზე. სეზონი — ივნისი-სექტემბერი. სითბოსმოყვარულია.

სატანას სოკო
Boletus satanas.JPG
სატანას სოკო
მეცნიერული კლასიფიკაცია
ლათინური სახელი
Rubroboletus satanas

სატანას სოკო შხამიანია, როგორ უმი ისე მომზადებული. პირობითად საჭმელი სოკოა. იწვევს საჭმლის მომნელებელი სისტემის მოშლას, მათ შორის, ფაღარათს, გულისრევას, ძლიერ პირღებინებას, რომელიც შეიძლება გაგრძელდეს 6 საათი. დამახასიათებელია ნერვული სისტემის, ელენთისა და ღვიძლის სერიოზული ტოქსიკური დაზიანება. დაუმუშავებელი სოკოს მიღების შედეგად ვითარდება უწყვეტი პირღებინება. აგრეთვე, ადამიანს შეიძლება განუვითარდეს ცნობიერების დაბურდულობა, კიდურების პარალიჩი, თავის ტკივილი.[1] ინგლისელმა მიკოლოგმა ჯონ რამსბოტომმა 1953 წელს განაცხადა, რომ სატანას სოკოს საკვებად ხმარობენ იტალიის ზოგიერთ რაიონსა და ყოფილ ჩეხოსლოვაკიაში.[2] ამას გარდა, შეფასების თანახმად, სან-ფრანცსკოს უბის არეალის ფარგლებში სატანას სოკოს მიირთმევენ რეგულარულად რაიმე სახის გართულებების გარეშე. ძველ მიკოლოგიურ ლიტერატურაში იგი სასიკვდილოდ შხამიან სოკოდაა მოხსენიებული.[3] სატანას სოკო გავრცელებულია ახლო აღმოსავლეთში, კავკასიაში, რუსეთის ევროპული ნაწილის სამხრეთ ნაწილში, სამხრეთ ევროპაში. სატანას სოკო გვხვდება საქართველოშიც, თუმცა ჩვენში საჭმელად არ ხმარობენ.[4]

სატანას სოკო აღწერა მიკოლოგმა ჰარალდ ოთმარ ლენცმა 1831 წელს, რომელმაც მისცა მას ავისმომასწავლებელი სახელი.

გალერეარედაქტირება

სქოლიორედაქტირება

  1. სატანას სოკო — Rubroboletus satanas
  2. Ramsbottom J (1953). Mushrooms & Toadstools. Collins, გვ. 53–54. ISBN 1-870630-09-2. 
  3. სატანას სოკო — Rubroboletus satanas
  4. ნახუცრიშვილი, ივანე (2011). საქართველოს სოკოები, გვ. 71.