ერთიანი ეროვნული საბჭო
ერთიანი ეროვნული საბჭო, ერთიანი სახალხო მოძრაობის ეროვნული საბჭო, ეროვნული საბჭო — ათი პოლიტიკური პარტიის კოალიცია საქართველოში 2007-2010 წლებში. კოალიცია შექმნილი იყო პრეზიდენტ მიხეილ სააკაშვილისა და ნაციონალური მოძრაობის პოლიტიკის წინააღმდეგ. საბჭომ მიიღო 12 პუნქტიანი მანიფესტი, რომლითაც საქართველოში პოლიტიკური სისტემის დემოკრატიზაციას მოითხოვდა. კოალიცია ერთიანი სახით მონაწილეობდა 2008 წლის საპრეზიდენტო და საპარლამენტო და 2010 წლის ადგილობრივ არჩევნებში.
| ერთიანი ეროვნული საბჭო | |
|---|---|
| სტატუსი | დაშლილი |
| ქვეყანა |
 საქართველო |
| ხელმძღვანელობა | |
| ლიდერი |
ლევან გაჩეჩილაძე (2008) ზვიად ძიძიგური (2010) |
| ისტორია | |
| დაფუძნდა | ოქტომბერი, 2007 |
| დაიშალა | ივნისი, 2010 |
ისტორია
რედაქტირებაერთიანი ეროვნული საბჭო ჩამოყალიბდა 2007 წლის სექტემბერში და აერთიანებდა ათ პარტიას. გაერთიანების მთავარი მოთხოვნა იყო საპარლამენტო არჩევნების ჩატარება 2008 წლის გაზაფხულზე, ნაცვლად 2008 წლის შემოდგომისა.
მოძრაობაში გაერთიანებული პარტიები იყვნენ:
- საქართველოს რესპუბლიკური პარტია - ლიდერი დავით უსუფაშვილი;
- საქართველოს კონსერვატიული პარტია - ლიდერები კახა კუკავა, ზვიად ძიძიგური;
- საქართველოს გზა - ლიდერი სალომე ზურაბიშვილი, ყოფილი საგარეო საქმეთა მინისტრი;
- თავისუფლება - კონსტანტინე გამსახურდია, ყოფილი პრეზიდენტის ზვიად გამსახურდიას ვაჟი.
- ჩვენ თვითონ - ლიდერი პაატა დავითაია;
- ხალხის პარტია - ლიდერი კობა დავითაშვილი;
- მოძრაობა ერთიანი საქართველოსთვის - ლიდერი ირაკლი ოქრუაშვილი;
- ქართული დასი - ლიდერი ჯონდი ბაღათურია;
- საქართველოს ლეიბორისტული პარტია - ლიდერი შალვა ნათელაშვილი;
- ეროვნული ფორუმი - ლიდერი კახა შარტავა.[1]
საბჭომ საპარლამენტო არჩევნების თარიღის შეცვლაზე მთავრობის უარის გამო წამოიწყო საპროტესტო კამპანია. ეროვნული საბჭო იყო ორგანიზატორი 2007 წლის ნოემბრის აქციებისა და აქციების შედეგად მიაღწია მიხეილ სააკაშვილის გადადგომასა და 2008 წლის იანვარში პლებისციტის დანიშვნას საპარლამენტო არჩევნების თარიღის შესახებ.
2008 წლის საპრეზიდენტო არჩევნები
რედაქტირებაერთიანმა ეროვნულმა საბჭომ 2008 წლის საპრეზიდენტო არჩევნებში კანდიდატად წარადგინა პარლამენტის წევრი ლევან გაჩეჩილაძე, რომელმაც შიდაკოალიციურ არჩევნებში დაამარცხა დავით უსუფაშვილი. ამ ნომინაციას არ შეუერთდა საქართველოს ლეიბორისტული პარტია, რომელმაც საპრეზიდენტო არჩევნებისთვის საკუთარი პარტიის ლიდერი შალვა ნათელაშვილი წამოაყენა. გაჩეჩილაძე გავიდა მეორე ადგილზე საპრეზიდენტო არჩევნებში ხმათა 25,7%-ით. ხოლო იმავე დღეს ჩატარებულ პლებისციტზე მოსახლეობამ მხარი დაუჭირა საპარლამენტო არჩევნების ჩატარებას გაზაფხულზე.
2008 წლის საპარლამენტო არჩევნები
რედაქტირებაერთიანი ეროვნული საბჭო კოალიციის სახით მონაწილეობდა საპარლამენტო არჩევნებში. ამ არჩევნებისთვის საბჭო დატოვა რესპუბლიკურმა პარტიამ, ხოლო გაერთიანებას შეუერთდა ახალი მემარჯვენეები. ბლოკი არჩევნებში მონაწილეობდა სახელით „გაერთიანებული ოპოზიცია: ეროვნული საბჭო, მემარჯვენეები“. კოალიციამ პარლამენტში შეიყვანა 17 დეპუტატი (15 დეპუტატი პროპორციული სიით და 2 მაჟორიტარი).
2010 წლის ადგილობრივი არჩევნები
რედაქტირებაარჩევნების შემდგომ გაერთიანება დროებით დაიშალა. ის ხელახლა აღდგა 2010 წლის თვითმართველობის არჩევნების წინ. ამჯერად ბლოკში გაერთიანდნენ საქართველოს კონსერვატიული პარტია, მოძრაობა სამართლიანი საქართველოსთვის და ხალხის პარტია. ეროვნულმა საბჭომ თბილისის მერობის კანდიდატად დაასახელა ზვიად ძიძიგური. ბლოკმა თბილისში ხმათა 5,5%, ხოლო დანარჩენ საქართველოში ხმათა 8,8% მიიღო. ამ შედეგით ეროვნულმა საბჭომ თბილისის საკრებულოში ორი, ხოლო საქართველოს 33 მუნიციპალიტეტში 41 მანდატი მოიპოვა „ეროვნული საბჭოს“ სიით თბილისის საკრებულოში შევიდნენ კობა დავითაშვილი და კახა კუკავა. 2012 წელს კობა დავითაშვილი პარლამენტის დეპუტატი გახდა, ხოლო საკრებულოში მისი ადგილი დაიკავა კახაბერ ფირუაშვილმა.[2]
არჩევნების შემდეგ კოალიცია დაიშალა და მასში შემავალმა პარტიებმა დამოუკიდებლად განაგრძეს ფუნქციონირება.
შედეგები არჩევნებში
რედაქტირება
| წელი | არჩევნები | მიღებული პროცენტი | შენიშვნა |
|---|---|---|---|
| 2008 | საპარლამენტო | 17.73% | გაიყვანა 17 დეპუტატი |
| 2010 | ადგილობრივი | 8,8% საქართველოში 5.5% თბილისში |
მოიპოვა მანდატები 34 საკრებულოში |