იზა გიგოშვილი

იზა შალვას ასული გიგოშვილი (დ. 16 თებერვალი, 1938, თბილისი — გ. 17 იანვარი, 2003) — ქართველი მსახიობი. საქართველოს სახალხო არტისტი (1981). 1979 წელს მიენიჭა სსრკ სახელმწიფო პრემია.

იზა გიგოშვილი
დაბადების სახელი	იზა გიგოშვილი
დაბადების თარიღი	16 თებერვალი, 1938 თბილისი, საქართველოს სსრ, სსრკ
გარდაცვალების თარიღი	17 იანვარი, 2003 (64 წლის)
ეროვნება	ქართველი
ალმა-მატერი	რუსთაველის თეატრალური ინსტიტუტი
საქმიანობა	მსახიობი
ჯილდოები	საქართველოს სახალხო არტისტი (1981) სსრკ სახელმწიფო პრემია (1979)

ბიოგრაფია

1963 წელს დაამთავრა საქართველოს რუსთაველის სახელობის თეატრალური ინსტიტუტის სამსახიობო ფაკულტეტი. 1963–1967 იყო თბილისის რუსთაველის სახელობის თეატრის მსახიობი, 1967–1969 — მარჯანიშვილის სახელობის თეატრისა, 1969-იდან კვლავ რუსთაველის თეატრშია. 1997 წელს დააარსა სამეფო უბნის თეატრი.

გიგოშვილის თამაში გამოირჩევა სინატიფით, პლასტიკით, მოხდენილობითა და გარდასახვის უნარით; შექმნა მომხიბლავი და გულწრფელობით აღსავსე თავგანწირულ, შეუპოვარ ქალთა სახეები: ძაბული (კონსტანტინე გამსახურდიას „მთვარის მოტაცება“), კაბილა (ალფრედ დე მიუსე „სიყვარული სახუმარო არ არის“), ჰერმია (უილიამ შექსპირის „ზაფხულის ღამის სიზმარი"), ქსენია (ბორის ლავრენიოვის „რღვევა“), ნატო (ალექსანდრე ჩხაიძე „ხიდი“), გრუშე ვაჩნაძე (ბერტოლტ ბრეხტი „კავკასიური ცარცის წრე“), ზიტა (გოტჰოლდ ეფრაიმ ლესინგი „ნათან ბრძენი“), შუშანიკი (იაკობ ცურტაველი „შუშანიკის წამება“), თამარი (კარლო გოლდონი „მშვენიერი ქართველი ქალი“) და სხვა.

ფილმოგრაფია

გადაღებულია ფილმებში

• 1968: „ქერათმიანი ქალიშვილი“ რეჟ. დიმიტრი ბათიაშვილი
• 1974: „ანარეკლი“ (ირმა) რეჟ. ოთარ აბესაძე
• 1977: „ამაღლება“ რეჟ. ნოდარ მანაგაძე
• 1978: „დათა თუთაშხია“ (ბუდარას ცოლი) რეჟისორები გრიგოლ (გიგა) ლორთქიფანიძე, გურამ (გიზო) გაბესკირია
• 1979: „მთის ნოველა“ რეჟ. მერაბ თავაძე
• 1982: „მარადისობის კანონი“ (მარგო) რეჟ. ვალერიან კვაჭაძე
• 1982: „მე დავბრუნდები“ რეჟ. მერაბ თავაძე
• 1984: „ქართველები ცაში“ (მგზავრი) რეჟ. ომარ გვასალია
• 1992: „თვინიერი“ რეჟ. ავთანდილ ვარსიმაშვილი
• 2001: „ხვეული კიბით“ რეჟ. მერაბ თავაძე

ნათამაშები როლები

რუსთაველის თეატრი

• „კავკასიური ცარცის წრე“ (გრუშე ვაჩნაძე) რეჟ. რობერტ სტურუა

ჯილდოები, პრემიები და პრიზები

• 1976: საქართველოს სსრ დამსახურებული არტისტი
• 1979: სსრკ სახელმწიფო პრემია
• 1979: შოთა რუსთაველის სახელობის პრემია
• 1981: საქართველოს სახალხო არტისტი

ლიტერატურა

• ცუცქირიძე შ., ენციკლოპედია „საქართველო“, ტ. 1, თბ., 1997. — გვ. 615–616.

რესურსები ინტერნეტში

• იზა გიგოშვილი [დაარქივებული] — ეროვნული ფილმოგრაფია
• იზა გიგოშვილი — საქართველოს ბიოგრაფიული ლექსიკონი