ვერონა (საგარეჯოს მუნიციპალიტეტი)

ვერონა — სოფელი საქართველოში (კახეთის მხარე), საგარეჯოს მუნიციპალიტეტში (გომბორის ადმინისტრაციული ერთეული).

სოფელი
ვერონა
ქვეყანა	საქართველო
მხარე	კახეთის მხარეკახეთის მხარე
მუნიციპალიტეტი	საგარეჯოს მუნიციპალიტეტი
თემი	გომბორი
კოორდინატები	41°51′06″ ჩ. გ. 45°14′32″ ა. გ.
ცენტრის სიმაღლე	1200 მ
მოსახლეობა	57 კაცი (2014)
ეროვნული შემადგენლობა	ქართველები 100 %
სასაათო სარტყელი	UTC+4
საფოსტო ინდექსი	3804

მდებარეობს გომბორის ქედის სამხრეთ-დასავლეთ კალთაზე, მდინარე გომბორის (ივრის მარცხენა შენაკადი) მარცხენა მხარეს, ზღვის დონიდან 1200 მ-ზე, საგარეჯოდან 53 კმ-ის დაშორებით.

ისტორია

სოფელ ვერონის ტერიტორია უძველესი დროიდან იყო დასახლებული. 1950 წელს სოფლის ერთ-ერთ ყანაში აღმოჩნდა დანგრეული ქვის სამარხი, რომელშიც იყო გვიანდელი ბრინჯაოს – ადრინდელი რკინის ხანის ე. წ. კახური ტიპის ბრინჯაოს მახვილი (ძვ. წ. XII ს. II ნახ. – X ს.). 1974 წელს კახეთის არქეოლოგიურმა ექსპედიციამ (ხელმძღვ. კ. ფიცხელაური) სოფლის დასაწყისში გათხარა ძვ. წ. VIII–VI საუკუნეების ვერონის სამაროვანი.

სოფელი ვერონა (ვერენა) მოხსენიებულია კახთა მეფე ალექსანდრე I-ის 1579 წლის შეწირულობის სიგელში. სოფლის მახლობლად, მაღალ კლდოვან მთაზე, ადგილობრივი კლდის ქვით ნაგები IX–X საუკუნეების ციხის ნანგრევებია. ციხეს ვახუშტი ბატონიშვილიც იხსენიებს: „ციხე ვერენისა, მაგარი“. შემორჩენილია ქვითკირის კედლები, მრგვალი ბურჯები და კოშკები. ციხის ქვედა ტერასაზე დგას გვიანდელი შუა საუკუნეების კოშკი.

დემოგრაფია

2014 წლის აღწერის მონაცემებით სოფელში ცხოვრობს 57 ადამიანი.

აღწერის წელი	მოსახლეობა	კაცი	ქალი
2002	94	42	52
2014	57	32	25

ლიტერატურა

• ვერონა // ენციკლოპედია „საქართველო“, ტ. 3, თბ., 2014.

• მაისურაძე ბ., ვერონის არქეოლოგიური ძეგლები // ენციკლოპედია „საქართველო“, ტ. 3, თბ., 2014.

• ქართლის ცხოვრების ტოპოარქეოლოგიური ლექსიკონი, გვ. 218-219, თბ., 2013 წელი.

• აფრასიძე გ., საქართველოს ისტორიისა და კულტურის ძეგლთა აღწერილობა, ტ. 1-III, თბ., 2019. — გვ. 101.