მარია ფონ ჰესენ-კასელი

მარია ფონ ჰესენ-კასელი (გერმ. Maria von Hessen-Kassel, დან. Marie af Hessen-Kassel; დ. 28 ოქტომბერი, 1767 — გ. 22 მარტი, 1852) — დანიის დედოფალი 1808-39 და ნორვეგიის დედოფალი 1808-14 წლებში როგორც თავისი ბიძაშვილის, ფრედერიკ VI-ის მეუღლე. დანიის რეგენტი 1814-15 წლებში, თავისი ქმრის ქვეყანაში არ ყოფნის დროს.

მარია ფონ ჰესენ-კასელი
დანიის დედოფალი
კორონაცია:	31 ივლისი, 1815, კოპენჰაგენი
მმართ. დასაწყისი:	13 მარტი, 1808
მმართ. დასასრული:	3 დეკემბერი, 1839
წინამორბედი:	კაროლინა მატილდა ბრიტანელი
მემკვიდრე:	კაროლინა ამალია შლეზვიგ-ჰოლშტაინელი
ნორვეგიის დედოფალი
მმართ. დასაწყისი:	13 მარტი, 1808
მმართ. დასასრული:	14 იანვარი, 1814
წინამორბედი:	კაროლინა მატილდა ბრიტანელი
მემკვიდრე:	ჰედვიგ ელიზაბეთ შარლოტა ჰოლშტაინ-გოტორპელი
პირადი ცხოვრება
დაბ. თარიღი:	28 ოქტომბერი, 1767
გარდ. თარიღი:	22 მარტი, 1852, (84 წლის)
დაკრძ. ადგილი:	როსკილეს კათედრალი, დანია
მეუღლე:	ფრედერიკ VI, დანიისა და ნორვეგიის მეფე (ქ. 1790 - გარდ. 1839)
შვილები:	კაროლინა, დანიის პრინცესა ვილჰელმინა, შლეზვიგ-ჰოლშტაინის ჰერცოგინია
სრული სახელი:	მარია სოფია ფრედერიკა
დინასტია:	ჰესენელები
მამა:	კარლი, ჰესენ-კასელის ლანდგრაფი
დედა:	ლუიზა დანიელი
რელიგია:	ლუთერანიზმი
მარია ფონ ჰესენ-კასელი ვიკისაწყობში

ბიოგრაფია

მარია დაიბადა 1767 წლის 28 ოქტომბერს ჰესენში, გერმანიაში. იგი იყო ჰესენ-კასელის ლანდგრაფ კარლისა და მისი მეუღლის, ლუიზა დანიელის ქალიშვილი. დედის მხრიდან იგი დანიისა და ნორვეგიის მეფე ფრედერიკ V-ისა და დედოფალ ლუიზა ბრიტანელის შვილიშვილი იყო, ხოლო ბებიამისი თავისმხრივ დიდი ბრიტანეთისა და ირლანდიის მეფე ჯორჯ II-ისა და დედოფალ კაროლინა ბრანდენბურგ-ანსბახელის ქალიშვილი იყო. მამის მხრიდან იგი ჰესენ-კასელის ლანდგრაფ ფრიდრიხ II-ისა და მარია ბრიტანელის შვილიშვილი იყო, მარია ბრიტანელი კი ლუიზა ბრიტანელის ღვიძლი და იყო.

1790 წლის 31 ივლისს, მარია ცოლად გაჰყვა თავის ორმაგ ბიძაშვილ კრონპრინც ფრედერიკს, რომელიც დანიისა და ნორვეგიის მეფე კრისტიან VII-ისა (მარიას დედის ძმა) და დედოფალ კაროლინა მატილდა ბრიტანელის (მარიას ბებიების ძმისწული) ვაჟი იყო. 1784 წლიდან, პრინცი ფრედერიკი თავისი შეშლილი მამის ნაცვლად მართავდ ქვეყანას. 1808 წელს, კრისტიან VII-ის გარდაცვალების შემდეგ, ფრედერიკ VI დანიისა და ნორვეგიის მეფე, ხოლო მარია დედოფალი გახდა.

საფრანგეთის იმპერატორ ნაპოლეონ ბონაპარტის ზეგავლენით, 1814 წელს ფრედერიკ VI-ს ნორვეგიის ტახტი ჩამოერთვა და შვედებს გადაეცათ.

მარიასა და ფრედერიკს მემკვიდრის სერიოზული პრობლემა ჰქონდათ, თუმცა არა უშვილობის. მათი მრავალი შვილიდან მხოლოდ ორი გოგონა გადარჩა. ამის გამო, ფრედერიკს მემკვიდრედ თავისი რომელიმე ნათესავი უნდა აერჩია. მან თავის მემკვიდრედ თავისი ბიძაშვილი, კრისტიანი აირჩია, ხოლო თავისი ორივე ასული მის ვაჟსა და ძმაზე დააქორწინა კიდევ უფრო დასაახლოვებლად.

1839 წელს, ფრედერიკ VI-ის გარდაცვალების შემდეგ ტახტზე კრისტიან VIII ავიდა. დედოფალი მარია კვლავ სამეფო კარზე განაგრძობდა ცხოვრებას. 1848 წელს, ტახტი მისმა სიძემ, ფრედერიკ VII-მ დაიკავა, მაგრამ იგი ამ დროისათვის მარიას ქალიშვილთან უკვე განქორწინებული იყო უშვილობის გამო. თავად მარია გარდაიცვალა 1852 წლის 22 მარტს, კოპენჰაგენში, 84 წლის ასაკში.

შვილები

დანიის სამეფო ოჯახი 1821 წელს, მარცხნიდან მარჯვნივ: დედოფალი მარია, პრინცესა ვილჰელმინა, მეფე ფრედერიკ VI და პრინცესა კაროლინა

1. კრისტიანი (1791), გარდაიცვალა ჩვილი;
2. მარია ლუიზა (1792-1793), გარდაიცვალა ჩვილი;
3. კაროლინა (1793-1881), ცოლად გაჰყვა თავის ბიძაშვილს, პრინც ფრედერიკ დანიელს;
4. ლუიზა (1795), გარდაიცვალა ჩვილი;
5. კრისტიანი (1797), გარდაიცვალა ჩვილი;
6. იულიანა ლუიზა (1802), გარდაიცვალა ჩვილი;
7. ფრედერიკა მარია (1805), გარდაიცვალა ჩვილი;
8. ვილჰელმინა მარია (1808-1891), ცოლად გაჰყვა თავის ბიძაშვილს, მომავალში მეფე ფრედერიკ VII-ს, თუმცა უშვილობის გამო გასცილდა და იქორწინა მეფე კრისტიან IX-ის ძმაზე, შლეზვიგ-ჰოლშტაინის ჰერცოგ კარლზე, მაგრამ შვილები არც მასთან ეყოლა;

ლიტერატურა

• Danske dronniger; fortaellinger og karakteristikker af Ellen Jorgensen og Johanne Skovgaard, Kobenhavn H. Hagerup, 1910
• Queen Marie Sophie Frederikke at the website of the Royal Danish Collection at Rosenborg Castle