ვიატკა (მდინარე)

ვიატკა (რუს. Вятка) — მდინარე რუსეთში, უდმურტეთში, კიროვის ოლქსა და თათრეთში (ქვემო დინება); მდ. კამის მარჯვენა შენაკადი. სიგრძე 1314 კმ, აუზის ფართობი 129 ათ. კმ². სათავეს იღებს ზემო კამის მაღლობზე. ვიატკისათვის დამახასიათებელია დინების მიმართულების მკვეთრი ცვლილებები (ჩრდილოეთიდან სამხრეთ-დასავლეთისკენ, შემდეგ სამხრეთ-აღმოსავლეთისკენ) და დიდი დაკლაკნილობა მთელ მანძილზე. ვაკის ტიპური მდინარეა, ძირითადად მიედინება ფართო და დამრეცფერდობებიან ხეობაში. ქვემოთში ხეობის გაფართოებული და შევიწროებული მონაკვეთები ერთმანეთს ცვლის 1–5 კმ-ის მონაცვლეობით. მრავლადაა ჩქერები. იკვებება ძირითადად თოვლის წყლებით. წყლის საშუალო წლიური ხარჯი 890 მ³/წმ. გაყინულია ნოემბრის 1-ლი ნახევრიდან აპრილის მე-2 ნახევრამდე. ძირითადი შენაკადებია: კობრა, ლეტკა, ველიკაია, მოლომა, პიჟმა (მარჯვენა); ჩეფცა, ბისტრიცა, ვოია, კილმეზი (მარცხენა). მდიდარია თევზით (კაპარჭინა, ნაფოტა, ლოქორია, ჩეხონი, ლოქო, წერი, ქორჭილა, ფარგა და სხვ.). ვიატკის აუზში 4000-ზე მეტი მცირე ზომის ტბაა საერთო ფართობით 192 კმ². დასაცურებელია. ხორციელდება რეგულარული ნაოსნობა ქალაქ კიროვიდან (700 კმ), გაზაფხულზე კირსის ნავმისადგომიდან (1000 კმ-ზე მეტი). მთავარი ქალაქებია: სლობოდსკოი, კიროვო-ჩეპეცკი, კიროვი, ორლოვი, კოტელნიჩი, სოვეტსკი, ვიატსკიე-პოლიანი.

ვიატკა რუს. Вятка
ვიატკა ქალაქ კიროვში
ქვეყანა	რუსეთი
ტერიტორიული ერთეულები	უდმურტეთი, კიროვის ოლქი, თათრეთი
ქალაქები	სლობოდსკოი, კიროვო-ჩეპეცკი, კიროვი, ორლოვი, კოტელნიჩი, სოვეტსკი, ვიატსკიე-პოლიანი
მარჯვენა შენაკადები	კობრა, ლეტკა, ველიკაია, მოლომა, პიჟმა
მარცხენა შენაკადები	ჩეფცა, ბისტრიცა, ვოია, კილმეზი
სათავე	ზემო კამის მაღლობი 58°26′52″ ჩ. გ. 52°10′38″ ა. გ.
შესართავი	კამა 55°35′27″ ჩ. გ. 51°29′46″ ა. გ.
სიგრძე	1314 კმ
აუზის ფართობი	129 ათ. კმ²
მდინარის სისტემა	კამა → ვოლგა → კასპიის ზღვა
წყლის ხარჯი (საშ.)	890 მ³/წმ
— სათავე, — შესართავი
ვიატკა ვიკისაწყობში