ავსტრია-საქართველოს ურთიერთობები

ავსტრია-საქართველოს ურთიერთობები — ორმხრივი დიპლომატიური ურთიერთობები საქართველოსა და ავსტრიის რესპუბლიკას შორის.

ავსტრია-საქართველოს ურთიერთობები

ავსტრია	საქართველო

დიპლომატიური ურთიერთობების ქრონოლოგია

დიპლომატიური ურთიერთობები საქართველოსა და ავსტრიის რესპუბლიკას შორის დამყარდა 1992 წლის 25 მარტს. 1993 წელს გაიხსნა საქართველოს საელჩო ავსტრიის რესპუბლიკაში.

საქართველოს საგანგებო და სრულუფლებიანი ელჩები ავსტრიის რესპუბლიკაში

• ქეთევან ციხელაშვილი (2020–დღემდე)
• დავით დონდუა (2018–2020)
• კონსტანტინე ზალდასტანიშვილი (2013–2017)
• პაატა გაფრინდაშვილი (2009–2013)
• ვიქტორ დოლიძე (2005–2009)
• კონსტანტინე ჟღენტი (2004–2005)
• გიორგი არსენიშვილი (2001–2004)
• ლევან მიქელაძე (1996–2001)

ავსტრიის რესპუბლიკის საგანგებო და სრულუფლებიანი ელჩები საქართველოში

• არად ბენკო 2016–2020 (პირველი ელჩი რეზიდენციით თბილისში, სადაც ავსტრიის რესპუბლიკის საელჩო ოფიციალურად გაიხსნა 2016 წლის სექტემბერში)

2013–2016 წლებში საქართველოს გადაფარვა ხდებოდა აზერბაიჯანში ავსტრიის საელჩოდან:

• აქსელ ვეხი (2015–2016)
• სილვია მაიერ-კაჟბიჩი (2013–2014)

1998–2012 წლებში საქართველოს გადაფარვა ხდებოდა ავსტრიიდან

• მიხაელ პოსტლი (2010–2012)
• მარიუს კალიგარისი (2006–2010)
• ჰაიდემარია გიურერი (1998–2006)

თანამშრომლობის სფეროები

საქართველოსა და ავსტრიის რესპუბლიკას შორის ჩამოყალიბებულია მჭიდრო პარტნიორული ურთიერთობები პოლიტიკურ, სავაჭრო-ეკონომიკურ, ენერგეტიკის, გარემოს დაცვის, პოლიციის, კულტურისა და განათლების სფეროებში. აღსანიშნავია ავსტრიის განვითარების სააგენტოს (ADA) საქმიანობა საქართველოში ტურიზმის, სოფლის მეურნეობის, ენერგეტიკისა და სატყეო მეურნეობის ხელშეწყობის მიმართულებით.

საქართველოსა და ავსტრიის რესპუბლიკას შორის ხელმოწერილია 11 შეთანხმება, რომელიც მოიცავს თანამშრომლობას ეკონომიკის, საჰაერო ტრანსპორტის, ინვესტიციების წახალისებისა და დაცვის, შემოსავლებსა და კაპიტალზე ორმაგი დაბეგვრის თავიდან აცილების და სხვა სფეროებში.

საპარლამენტო და სამთავრობო დელეგაციების ვიზიტები

საქართველოსა და ავსტრიას შორის რეგულარულად ხორციელდება უმაღლესი/მაღალი დონის საპარლამენტო და სამთავრობო დელეგაციების ვიზიტები. ბოლო წლებში საქართველოს სტუმრობდნენ ავსტრიის ფედერალური პრეზიდენტი, ევროპის, ინტეგრაციისა და საგარეო საქმეთა მინისტრი, ეროვნული საბჭოს (პარლამენტის) მაღალი რანგის წარმომადგენლები და სხვა.

ინტენსიურად მიმდინარეობს საპარლამენტთაშორისო თანამშრომლობა. საქართველოს პარლამენტში შექმნილია ავსტრიასთან მეგობრობის ჯგუფი, ხოლო ავსტრიის პარლამენტში მოქმედებს ავსტრია-საქართველოს მეგობრობის ჯგუფი.

ორ ქვეყანას შორის სხვადასხვა სფეროში გააქტიურებული ურთიერთობების გათვალისწინებით, ავსტრიის ფედერალური მთავრობის გადაწყვეტილებით, 2016 წლის სექტემბერში თბილისში ავსტრიის რესპუბლიკის საელჩო გაიხსნა.

ეკონომიკური თანამშრომლობა

დინამიკურად ვითარდება ქართულ-ავსტრიული ეკონომიკური თანამშრომლობა. იზრდება ავსტრიული კომპანიების დაინტერესება საქართველოს ეკონომიკური და საინვესტიციო პოტენციალით. ავსტრიული კაპიტალით და კომპანიების მონაწილეობით განხორციელდა და გრძელდება მნიშვნელოვანი საინვესტიციო პროექტები ლოგისტიკის, ენერგეტიკის, ტურიზმისა და სხვა სფეროებში („გებრიუდერ ვაისი“, „არაგვიჰესი“, „მესტიაჭალა“, „დოპელმაიერი“ და სხვა). ორმხრივი ურთიერთობების გაღრმავების მიზნით რეგულარულად იმართება ერთობლივი ბიზნესფორუმები, ხოლო ორ წელიწადში ერთხელ იკრიბება საქართველო-ავსტრიის შერეული ეკონომიკური კომისია, რომელიც ერთობლივად განსაზღვრულ პრიორიტეტულ სფეროებში თანამშრომლობის საკითხებს განიხილავს.

თანამშრომლობა განათლების, მეცნიერებისა და კულტურის სფეროებში

აქტიურად მიმდინარეობს თანამშრომლობა განათლების, მეცნიერებისა და კულტურის სფეროებში, ასევე იდგმება ნაბიჯები ავსტრიაში საქართველოსა და ქართული კულტურის ცნობადობის გაზრდის მიზნით, რასაც ხელს უწყობს მრავალრიცხოვანი ღონისძიებები, განხორციელებული და მიმდინარე პროექტები (გამოფენები, მუსიკალურ სასწავლებლებს შორის თანამშრომლობა, ქართული ენის სწავლება, ქართველი ავტორების ნაწარმოებების საჯარო კითხვა და სხვა). ამის გარდა, ვენის დიპლომატიური აკადემია ყოველწლიურად გასცემს სტიპენდიებს, როგორც წარჩინებული უცხოელი სტუდენტებისათვის, ასევე ქართველი სახელმწიფო მოხელეებისათვის.

ბოლო ოთხწლიან პერიოდში (2016–2020) საქართველო-ავსტრიას შორის არსებული ორმხრივი ეკონომიკური ურთიერთობების განვითარების პოზიტიური დინამიკა ფიქსირდება, რის გამოხატულებასაც წარმოადგენს იმ ავსტრიული კომპანიების რიცხვის ზრდა, რომლებიც თავის საქმიანობას საქართველოში წარმართავენ.

სასჯელაღსრულებისა და პრობაციის სფეროში თანამშრომლობა

საქართველოს სასჯელაღსრულებისა და პრობაციის სამინისტროს და ავსტრიის რესპუბლიკის იუსტიციის ფედერალურ სამინისტროს შორის ურთიერთგაგების მემორანდუმი გაფორმდა. დოკუმენტი, რომელსაც საქართველოს სასჯელაღსრულებისა და პრობაციის მინისტრმა კახა კახიშვილმა და ავსტრიის რესპუბლიკის ვიცე-კანცლერმა, იუსტიციის ფედერალურმა მინისტრმა ვოლფგანგ ბრანდშტეტერმა მოაწერეს ხელი, სასჯელაღსრულებისა და პრობაციის სფეროში თანამშრომლობას ითვალისწინებს.

მემორანდუმის თანახმად, უწყებები ორმხრივი თანამშრომლობისა და მყარი პარტნიორობის ჩამოყალიბებას შეუწყობენ ხელს. დაგეგმილია თანამშრომლობა პენიტენციური სისტემების მართვის, პენიტენციურ დაწესებულებებში ადამიანის უფლებების დაცვის, უსაფრთხოების, მსჯავრდებულთა რეაბილიტაცია-რესოციალიზაციის, პენიტენციური ჯანდაცვის, თანამშრომელთა პროფესიული შესაძლებლობების განვითარებისა და სხვა მიმართულებებით, ასევე, ინფორმაციისა და საუკეთესო პრაქტიკის გაზიარების მიზნით, ექსპერტებისა და შესაბამისი სფეროების წარმომადგენელთა მონაწილეობით კონფერენციების, შეხვედრებისა და სხვა სახის ღონისძიებების ორგანიზება.

გალერეა

• 
  მაია ფანჯიკიძე და მიხაელ შპინდელეგერი
• 
  სებასტიან კურცი და გიორგი მარგველაშვილი
• 
  მაია ფანჯიკიძე და სებასტიან კურცი
• 
  სალომე ზურაბიშვილისა და ალექსანდერ ვან დერ ბელენის შეხვედრა
• 
  სებასტიან კურცისა და გიორგი კვირიკაშვილის შეხვედრა
• 
  დავით ზალკალიანი და რეინჰოლდ ლოპატკა

ბიბლიოგრაფია

• Agstner, Rudolf. Österreich im Kaukasus 1849-1918. — Diplomatische Akademie, 1999. — ISBN 978-3-902021-12-0.
• Bihl, Wolfdieter. Die Kaukasus-Politik der Mittelmächte. — Böhlau, 1992. — ISBN 978-3-205-05517-4.

რესურსები ინტერნეტში

ვიკისაწყობში არის გვერდი თემაზე:

ავსტრია-საქართველოს ურთიერთობები

• ურთიერთობები საქართველოსა და ავსტრიის რესპუბლიკას შორის დაარქივებული 2020-11-16 საიტზე Wayback Machine. — საქართველოს საგარეო საქმეთა სამინისტრო
• საქართველოს პარლამენტის მეგობრობის ჯგუფები — საქართველოს პარლამენტი
• ავსტრიის საგარეო საქმეთა ფედერალური სამინისტრო
• ორმხრივი ურთიერთობები დაარქივებული 2020-11-01 საიტზე Wayback Machine. — საქართველოს საგარეო საქმეთა სამინისტრო
• საქართველოს მიერ გაფორმებული „ორმაგი დაბეგვრის თავიდან აცილების შესახებ“ შეთანხმებები — საქართველოს ფინანსთა სამინისტრო
• შეთანხმება საქართველოს რესპუბლიკასა და ავსტრიის რესპუბლიკას შორის ორმხრივი საგარეო ეკონომიკური კავშირების შესახებ

საინფორმაციო სააგენტოები

„ინტერპრესნიუსი“ · „ჯი-ეიჩ-ენი“