შარახ ფაჩალია

შარახ ფაჩალია (დ. 20 მაისი, 1914, სოფელი ააცი, გუდაუთის რაიონი — გ. ნოემბერი, 2000, სოხუმი) — აფხაზი მსახიობი, თეატრის რეჟისორი და დრამატურგი. აფხაზეთის ასსრ-ის სახალხო არტისტი (1940), საქართველოს სსრ სახალხო არტისტი (1955), სსრკ სახალხო არტისტი (1982).

შარახ ფაჩალია
დაბადების თარიღი	20 მაისი, 1914 ააცი, სოხუმის ოკრუგი, ქუთაისის გუბერნია, რუსეთის იმპერია
გარდაცვალების თარიღი	ნოემბერი, 2000 სოხუმი
ეროვნება	აფხაზი
მოქალაქეობა	სსრკ  საქართველო აფხაზეთის რესპუბლიკა
პროფესია	მსახიობი, რეჟისორი, დრამატურგი
ჯილდოები

ბიოგრაფია

1933 წელს დაამთავრა სოხუმის ვ. დომოგაროვის დრამატული სტუდია, 1939 წელს კი — თბილისის შ. რუსთაველის სახელობის თეატრთან არსებული აფხაზური სტუდია.

1931 წლიდან სოხუმის თეატრის აფხაზური დასის მსახიობი და რეჟისორი იყო. მის მიერ შესრულებული როლებიდან აღსანიშნავია: იაგო (შექსპირის „ოტელო“), დანაყაი, ძუკუ (მ. ლაკერბაის „დანაყაი“, „საბიდას ხევში“), ბატალი (ჭანბას „მაჰაჯირი“), შუშანი (გ. გულიას „გმირთა კლდე“), ვლადიმერ ხარაზია (შ. ფაჩალიას „უკვდავება“), ოსიპი (გოგოლის „რევიზორი“), ოთარბეგი (ა. სუმბათაშვილის „ღალატი“), აგაბო ბოგვერაძე (ო. იოსელიანის „სანამ ურემი გადაბრუნდება“), ხაჯარათი (ბ. შინკუბას „სიმღერა კლდეზე“) და სხვა. დადგმებიდან აღსანიშნავია: დ. დავურინის „ვოლკოვების ოჯახი“, ა. ოსტროევსკის „უდანაშაულო დამნაშავენი“, დ. გულიას „მოჩვენებანი“, ა. ცაგარელის „ხანუმა“ და სხვა. ეწეოდა ლიტერატურულ მოღვაწეობას. აფხაზეთის თეატრისა და დრამატურგიის განვითარებას ხელი შეუწყო მისმა პიესებმა: „გუნდა“, „დიდი ქორწილი“, „უკვდავება“, „მაზლოუ“, „დაღუპული სიცოცხლე“ და სხვა.

2005 წლიდან ტყვარჩელის კომედიის თეატრი, რომლის დამაარსებელი და სამხატვრო ხელმძღვანელი იყო შარახ ფაჩალია, ატარებს მის სახელს.

აფხაზეთში გამოცემული საფოსტო მარკა შარახ ფაჩალიას გამოსახულებით

ფილმოგრაფია

• 1974 — „თეთრი ყაბალახი“ (ესლანი)
• 1975 — „შავი ზღვის პირას“ (ეპიზოდი)
• 1977 — „ახალმთვარეობის ღამეს“ (გედლაჩი)
• 1986 — „ჩეგემური დეტექტივი“ (თავმჯდომარე)

რესურსები ინტერნეტში

• შარახ ფაჩალია — საქართველოს ბიოგრაფიული ლექსიკონი
• შარახ ფაჩალია — კინოფილმების ინტერნეტ მონაცემთა ბაზა (ინგლისური)