საქართველოს ადგილობრივი თვითმმართველობის ორგანოების არჩევნები 2017

საქართველოს ადგილობრივი თვითმმართველობის ორგანოების არჩევნები (2017) — ადგილობრივი თვითმმართველობის ორგანოების არჩევნები საქართველოში, რომელიც გაიმართა 2017 წლის 21 ოქტომბერს.

მერის არჩევნები

თვითმმართველი ქალაქის მერის, თვითმმართველი თემის მერის უფლებამოსილების ვადაა 4 წელი. არჩევნებს ნიშნავს საქართველოს პრეზიდენტი პრემიერ-მინისტრის კონტრასიგნაციით, მერის უფლებამოსილების ვადის გასვლამდე 60 დღით ადრე.

თვითმმართველი ქალაქის მერად, თვითმმართველი თემის მერად შეიძლება აირჩეს საარჩევნო უფლების მქონე საქართველოს მოქალაქე, 25 წლის ასაკიდან, რომელსაც საქართველოში უცხოვრია სულ ცოტა 5 წლის განმავლობაში.

მერის არჩევნებში არჩეულად ჩაითვლება ის კანდიდატი, რომელმაც არჩევნებში მონაწილე ამომრჩეველთა ხმების 50%-ზე მეტი მიიღო.

თბილისის მერის არჩევნები

თბილისის მერობის კანდიდატები იყვნენ:

• კახაბერ კალაძე – ქართული ოცნების გენერალური მდივანი. 2012-2017 წლებში იყო საქართველოს ენერგეტიკის მინისტრი.

• ზაალ უდუმაშვილი – ერთიანი ნაციონალური მოძრაობის კანდიდატი, რუსთავი 2-ის გენერალური დირექტორის მოადგილე და ტელეწამყვანი. 2017 წლის ივნისში მიიღო გადაწყვეტილება წასულიყო პოლიტიკაში.

• ალექსანდრე ელისაშვილი – ქართველი ჟურნალისტი, პოლიტიკოსი, საბურთალოს დამოუკიდებელი დეპუტატი თბილისის საკრებულოში. საქართველოს შეწყალების კომისიის თავმჯდომარე 2014-2015 წლებში. თბილისის მერის არჩევნებში მონაწილეობდა დამოუკიდებელი კანდიდატის სტატუსით.

• ელენე ხოშტარია – ევროპული საქართველოს კანდიდატი. 2007-2012 წლებში იყო ევროპული და ევრო-ატლანტიკური ინტეგრაციის საკითხებში სახელმწიფო მინისტრის პირველი მოადგილე.

• ირმა ინაშვილი – საქართველოს პატრიოტთა ალიანსის გენერალური მდივანი, საქართველოს მერვე მოწვევის პარლამენტის დეპუტატი.
• კახა კუკავა – თავისუფალი საქართველოს თავმჯდომარე, საქართველოს პარლამენტის წევრი (2004-2008) და თბილისის საკრებულოს წევრი (2010-2014).
• გიორგი გუგავა – საქართველოს ლეიბორისტული პარტიის პოლიტიკური მდივანი, 2002-2006 და 2006-2008 წლებში თბილისის საკრებულოს წევრი. საქართველოს პარლამენტის წევრი (2008-2012).
• ნიკოლოზ სანებლიძე – ტრადიციონალისტთა კავშირის პოლიტიკური მდივანი, უზენაესი საბჭოს წევრი (1990-1991).
• გიორგი ვაშაძე – ახალი საქართველოს თავმჯდომარე, 2006–2010 წლებში საქართველოს იუსტიციის სამინისტროს სამოქალაქო რეესტრის სააგენტოს თავმჯდომარე. 2010–2012 წლებში საქართველოს იუსტიციის მინისტრის მოადგილე.

თბილისის მერის არჩევნებში აგრეთვე მონაწილეობდნენ: დავით შუკაკიძე, გიორგი ლილუაშვილი, თენგიზ შერგელაშვილი და ლაშა სტურუა.

კანდიდატი		პარტია	ხმების რაოდენობა	პროცენტულობა
	კახა კალაძე	ქართული ოცნება - დემოკრატიული საქართველო	204,061	51,09%
	ალეკო ელისაშვილი	დამოუკიდებელი	69,803	17,4%
	ზაალ უდუმაშვილი	ერთიანი ნაციონალური მოძრაობა	66,259	16,59%
	ელენე ხოშტარია	ევროპული საქართველო	28,411	7,11%
	ირმა ინაშვილი	საქართველოს პატრიოტთა ალიანსი	12,070	3,02%
	გიორგი ვაშაძე	ახალი საქართველო	7,800	1,95%