არჩილ თალაკვაძე

არჩილ თალაკვაძე (დ. 16 იანვარი, 1983, მახარაძე, საქართველოს სსრ) — ქართველი პოლიტიკოსი. საქართველოს პარლამენტის წევრი (ქართული ოცნება — დემოკრატიული საქართველო) და საპარლამენტო უმრავლესობის ლიდერი 2016-2019 წლებში, საქართველოს მე-9 მოწვევის პარლამენტის თავმჯდომარე 2019 წლის 25 ივნისიდან 2020 წლის 11 დეკემბრამდე, საქართველოს მე-10 მოწვევის პარლამენტის თავმჯდომარე 2020 წლის 11 დეკემბრიდან 2021 წლის 24 აპრილამდე.

არჩილ თალაკვაძე
საქართველოს მე-10 მოწვევის პარლამენტის თავმჯდომარე
თანამდებობაზე ყოფნის დრო
11 დეკემბერი, 2020 – 24 აპრილი, 2021
პრეზიდენტი	სალომე ზურაბიშვილი
პრემიერ-მინისტრი	გიორგი გახარია, ირაკლი ღარიბაშვილი
მემკვიდრე	კახა კუჭავა
საქართველოს მე-9 მოწვევის პარლამენტის თავმჯდომარე
თანამდებობაზე ყოფნის დრო
25 ივნისი, 2019 – 11 დეკემბერი, 2020
პრეზიდენტი	სალომე ზურაბიშვილი
პრემიერ-მინისტრი	მამუკა ბახტაძე, გიორგი გახარია
წინამორბედი	ირაკლი კობახიძე
საპარლამენტო უმრავლესობის ლიდერი
თანამდებობაზე ყოფნის დრო
18 ნოემბერი, 2016 – 25 ივნისი, 2019
პრეზიდენტი	გიორგი მარგველაშვილი, სალომე ზურაბიშვილი
პრემიერ-მინისტრი	გიორგი კვირიკაშვილი, მამუკა ბახტაძე
მემკვიდრე	ირაკლი კობახიძე
დაბადებული	16 იანვარი, 1983 (1983-01-16) მახარაძე, საქართველოს სსრ
მოქალაქეობა	საქართველო
ეროვნება	ქართველი
პოლიტიკური პარტია	ქართული ოცნება — დემოკრატიული საქართველო
მეუღლე	ქეთევან ბუბუტეიშვილი
შვილები	2
განათლება	თბილისის სახელმწიფო სამედიცინო უნივერსიტეტი საქართველოს საზოგადოებრივ საქმეთა ინსტიტუტი ლონდონის ეკონომიკის სკოლა
პროფესია	ექიმი, მენეჯერი, ეკონომისტი
საქმიანობა	პოლიტიკა
ხელმოწერა

განათლება

2000 წელს დაამთავრა ოზურგეთის N1 საჯარო სკოლა და ჩაირიცხა თბილისის სახელმწიფო სამედიცინო უნივერსიტეტში. 2010 წელს დაასრულა საქართველოს საზოგადოებრივ საქმეთა ინსტიტუტის საზოგადოებრივი ჯანდაცვის პოლიტიკის და მენეჯმენტის პროგრამა. 2015 წელს ჩაირიცხა ლონდონის ეკონომიკის სკოლის აღმასრულებელი მენეჯმენტის პროგრამაში.

კარიერა

არჩილ თალაკვაძე 2007-2010 წლებში მუშაობდა ადამიანის უფლებათა დაცვის სფეროში, საქართველოს სახალხო დამცველის ოფისში, მრჩევლის პოზიციაზე. 2011-2012 წლებში მუშაობა დაიწყო დირექტორის მოადგილედ, აშშ საერთაშორისო განვითარების სააგენტოს დემოკრატიული მმართველობის პროგრამაში, რომელიც სამოქალაქო საზოგადოების გაძლიერებას, პოლიტიკური სისტემის განვითარებას, მედიის თავისუფლებას და დემოკრატიულ რეფორმებს ემსახურებოდა. 2012-2014 წლებში მუშაობდა საქართველოს სასჯელაღსრულებისა და პრობაციის მინისტრის მოადგილედ, სადაც პენიტენციური ჯანდაცვის რეფორმა წარმატებით გაატარა - შედეგად 11-ჯერ შემცირდა სასჯელაღსრულების დაწესებულებებში პატიმართა გარდაცვალების მაჩვენებლები, მინიმუმამდე შემცირდა ტუბერკულოზის გავრცელება და დაიწყო “C” ჰეპატიტის პროგრამა. 2014-2016 წლებში არჩილ თალაკვაძე დაინიშნა საქართველოს შინაგან საქმეთა მინისტრის მოადგილედ, სადაც ორი წლის განმავლობაში საერთაშორისო ურთიერთობებს, მიგრაციის სამსახურის რეფორმას და ცენტრალური აპარატის მუშაობას უძღვებოდა. 2015-2016 წლებში იყო “გლობალური ფონდის” (The Global Fund) მმართველი საბჭოს წევრი, საქართველოს მთავრობის კვოტით.

2016 წლის საპარლამენტო არჩევნებში არჩეულ იქნა ოზურგეთის ოლქის მაჟორიტარად (მიიღო 14 839 ხმა, შესაბამისად 52,88%) IX მოწვევის პარლამენტში „ქართული ოცნებიდან“, სადაც 2019 წლამდე იყო საპარლამენტო უმრავლესობის ლიდერი და საკონსტიტუციო კომისიის წევრი. 2019-2021 წლებში ეკავა საქართველოს პარლამენტის თავმჯდომარის თანამდებობა. 2020 წლის საპარლამენტო არჩევნებში პარტია “„ქართული ოცნება - დემოკრატიული საქართველოს“ მიერ, წარდგენილი იყო პროპორციული სიის მე-2 ნომრად.

ოჯახი

ჰყავს მეუღლე და ორი შვილი.

სხვა საქმიანობა

2017 წლიდან თალაკვაძე ოზურგეთის სარაგბო კლუბ „არწივების“ საპატიო და სარბოლო კლუბის „მია ფორსის“ პრეზიდენტია. შავი ზღვის საპარლამენტო ასამბლეის (PABSEC) საქმიანობაში შეტანილი განსაკუთრებული წვლილისთვის დაჯილდოებულია ღირსების მედლით.

რესურსები ინტერნეტში

• არჩილ თალაკვაძე — საქართველოს ბიოგრაფიული ლექსიკონი
• არჩილ თალაკვაძე — საქართველოს პარლამენტის ოფიციალური საიტი (მოძველებული / არქივი / ახალი არქივი)

სქოლიო

პოლიტიკური თანამდებობები
წინამორბედი: ირაკლი კობახიძე	საქართველოს მე-9 და მე-10 მოწვევების პარლამენტის თავმჯდომარე 2019 – 2021	შემდეგი: კახა კუჭავა