პეტრე კობახიძე
პეტრე (პიერ) კალისტრატეს ძე კობახიძე (დ. 29 ივნისი, 1906, ზუგდიდი — გ. 17 აგვისტო, 1963, სოხუმი) — ქართველი მსახიობი, საქართველოს სახალხო არტისტი.
| პიერ კობახიძე | |
|---|---|
| დაბადების სახელი | პეტრე კობახიძე |
| დაბადების თარიღი |
29 ივნისი, 1906 თბილისი |
| გარდაცვალების თარიღი | 17 აგვისტო, 1963 (57 წლის) |
| საქმიანობა | მსახიობი |
ბიოგრაფია
რედაქტირება1924 წელს დაამთავრა აკაკი ფაღავას სტუდია და ნიჭიერი ახალგაზრდა ჩარიცხეს რუსთაველის სახელობის თეატრში, რომელსაც კოტე მარჯანიშვილი ხელმძღვანელობდა. შემდეგ დიდმა რეჟისორმა თავის მიერ შექმნილ თეატრში მიიწვია და სიცოცხლის ბოლომდე ამ თეატრის წამყვანი მსახიობი იყო.
სცენაზე პიერ კობახიძემ შექმნა მრავალრიცხოვანი და მრავალფეროვანი გმირების გალერეა: ურიელი („ურიელი კოსტა“), ფერდინანდი („ვერაგობა და სიყვარული“), არმანი („მარგარიტა გოტიე“), პეტრუჩიო („ჭირვეული ცოლის მორჯულება“), პარატოვი („უმზითვო“), ანტონიუსი („ანტონიუს და კლეოპატრა“), ჩონტა („მოკვეთილი“), იცკა („იცკა რიჟინაშვილი“), ვაშაძე („მისი ვარსკვლავი“, სსრ კავშირის სახელმწიფო პრემია) და სხვები. ჭეშმარიტად ნიჭიერმა მსახიობმა შესძლო იმავე სცენააზე წარმატებით შეესრულებინა ურიელი დიდი უშანგი ჩხეიძის შემდეგ.
პიერ კობახიძე ნაყოფიერად მუშაობდა საქართველოს რადიოში. იყო პირველი სპორტული კომენტატორი; ძველი რადიოჩანაწერებიდან დღესაც თანამედროვედ ჟღერს მის მიერ შექმნილი როლები, ქართველ პოეტთა ნაწარმოებების მისეული, პიერისეული, განუმეორებელი შესრულება. პოეზიის სიყვარული მსახიობს ბავშვობიდან დაჰყვა. ქართულ პერიოდიკაში მრავლადაა გაფანტული მისი ლექსები პეტრე ხეთელის ფსევდონიმით. ხელოვანმა რეჟისურაშიც სცადა ძალა: დადგა გ. ქელბაქიანის „შესაფერი ჯილდო“, კ. კალაძის „ლალი“, მ. ჯაფარიძის „ბეღურა“ და სხვა. დაჯილდოვებული იყო ორი შრომის წითელი დროშის ორდენით, „საპატიო ნიშნის“ ორდენით და მედლებით.
დაკრძალულია მწერალთა და საზოგადო მოღვაწეთა დიდუბის პანთეონში.
ფილმოგრაფია
რედაქტირება- 1926: „სამანიშვილის დედინაცვალი“ რეჟისორები კოტე მარჯანიშვილი, ზაქარია ბერიშვილი
ნათამაშები როლები
რედაქტირებამარჯანიშვილის თეატრი
რედაქტირება- კარლ გუცკოვის „ურიელ აკოსტა“ (ურიელი)
- ფრიდრიხ შილერის „ვერაგობა და სიყვარული“ (ფერდინანდი)
- ალექსანდრე დიუმას „მარგარიტა გოტიე“ (არმანი )
- უილიამ შექსპირის „ჭირვეული ცოლის მორჯულება“ (პეტრუჩიო)
- ალექსანდრე ოსტროვსკის „უმზითვო“ (პარატოვი)
- უილიამ შექსპირი„ანტონიუს და კლეოპატრა“ (ანტონიუსი)
- ვაჟა-ფშაველას „მოკვეთილი“ (ჩონტა)
- გერცელ ბააზოვის „იცკა რიჟინაშვილი“ (იცკა)
- ილო მოსაშვილის „მისი ვარსკვლავი“ (ვაშაძე)
ჯილდოები, პრემიები და პრიზები
რედაქტირება- 1946: საქართველოს სახალხო არტისტი
- 1952: სსრკ სახელმწიფო პრემია
- შრომის წითელი დროშის ორდენი (2 ორდენი)
- საპატიო ნიშნის ორდენი
ლიტერატურა
რედაქტირება- ცხომარია, მ., ქართული საბჭოთა ენციკლოპედია, ტ. 5, თბ., 1980. — გვ. 565-566.
- ზ. ბაბუნაშვილი, თ. ნოზაძე, „მამულიშვილთა სავანე“, გვ. 223, თბ., 1994
- გუგუშვილი, ვ. პიერ კობახიძე, თბილისი, 1968