მთავარი მენიუს გახსნა

წერეთლები, არისტოკრატიული საგვარეულო დასავლეთ საქართველოში. გადმოცემის მიხედვით, წერეთლების წინაპრები 1395 წ. ჩრდილოეთ კავკასიიდან იმერეთში გადმოხვეწილან, რათა თავი დაეღწიათ თემურ-ლენგის მიერ ადგილობრივთა გამაჰმადიანებისთვის. ისტორიულ ასპარეზზე საგვარეულო შედარებით გვიან გამოვიდა. წერეთლები განსაკუთრებით მე-18 საუკუნეში დაწინაურდნენ; ეკავათ იმერეთის სამეფოს სახლთუხუცესის და სარდლის სახელოები, ასრულებდნენ მეფის მნიშვნელოვან პოლიტიკურ და დიპლომატიურ დავალებებს. ნათესაური კავშირები ჰქონდათ ბაგრატიონთა დინასტიის წარმომადგენლებთან როგორც დასავლეთ, ისე აღმოსავლეთ საქართველოში.

ქართველებს შორის პირველი მხედრიონი წერეთლებს ჰყავდათ, რომელიც იმერეთის სამეფოს გაუქმებამდე შეინარჩუნეს. მხედრიონი აზნაურებისგან შედგებოდა. ისინი მუდმივად სამხედრო ვალდებული იყვნენ და უნდა ემსახურათ მანამ, სანამ ცხენზე ჯდომა შეეძლებოდათ.

წერეთლებმა პირველებმა შემოიღეს სამხედრო საქმეში წერილობითი შეტყობინება, რაც მათ ციხესიმაგრეში ხორციელდებოდა. "წერეთი" უკავშირდება სიტყვა "წერას" და ძველ ქართულში კვალის გაყვანას ნიშნავს. თიხის თხელ ფირფიტაზე წვეტიანი იარაღით გამოჰყავდათ ასო-ნიშნები, შემდეგ ფირფიტას აშრობდნენ, ფუთავდნენ და შიკრიკს ატანდნენ დანიშნულების ადგილას... წერეთლები სათავეში ედგნენ საწერეთლოში შემავალ სხვადასხვა აზნაურთაგან შემდგარ სამხედრო ნაწილებს. მათ მშვიდობიან პერიოდშიც კი არ ჰქონდათ უიარაღოდ და უცხენოდ ყოფნის უფლება. ისინი შესანიშნავი საბრძოლო უნარებით, ორგანიზებულობითა და სიქველით გამოირჩეოდნენ. მოწინააღმდეგეთა ქალებს, ბავშვებს და მოხუცებს არ ერჩოდნენ, არ უნგრევდნენ სალოცავებს.

წერეთელთა სათავადო, საწერეთლო, ზემო იმერეთში (ზემო ქვეყანა, ისტორიული არგვეთის ტერიტორია) მდებარეობდა. საგვარეულო ორ ძირითად — საჩხერისა და სხვიტორის — შტოდ იყოფოდა. ასევე ფლობდნენ მოდინახესა და სხვა ციხეებს, ერთ-ერთ საძვალედ ჰქონდათ ჯრუჭის მონასტერი. საწერეთლოში XIX ს. დამდეგს 57 სოფელი შედიოდა, რომლებშიც 1000 კომლზე მეტი ყმა-გლეხი ცხოვრობდა. რუსეთის მიერ იმერეთის დაპყრობის პერიოდში (1810) წერეთლების ნაწილი იმპერიას მიემხრო, ნაწილი კი სოლომონ II-ს ერთგულობდა.

წერეთლების ერთი შტო 1724 წ. ქართლის მეფე ვახტანგ VI-ს რუსეთში გაჰყვა და იქ დამკვიდრდა. ეს შტო ცნობილი იყო ცერტელევების გვარით.

იხილეთ აგრეთვერედაქტირება