გუმათის წყალსაცავი

გუმათის წყალსაცავი — წყალსაცავი საქართველოში. მდებარეობს მდინარე რიონის შუა დინებაში, წყალტუბოს მუნიციპალიტეტის ტერიტორიაზე, სოფელ გუმათთან, ზღვის დონიდან 210 მ სიმაღლეზე. საექსპლუატაციოდ გადაეცა 1958 წელს.

გუმათის წყალსაცავი
კოორდინატები: 42°20′11″ ჩ. გ. 42°41′49″ ა. გ.
ქვეყანა	საქართველო
ტერიტორიული ერთეული	წყალტუბოს მუნიციპალიტეტი (იმერეთის მხარე)
ზღვის დონიდან	210 მ
სიგრძე	11 კმ
სიგანე	0,5 კმ
ფართობი	3,1 კმ²
მოცულობა	0,042 კმ³
უდიდესი სიღრმე	24 მ
ჩაედინება	რიონი
გამოედინება	რიონი
შევსების წელი	1958
ჰესი	გუმათჰესი
კაშხლის სიმაღლე	30 მ

შექმნილია 30 მ რკინაბეტონის კაშხალით. უდიდესი სიღრმე 24 მ, ფართობი 3,1 კმ². მოცულობა 42 მლნ. მ³ (მაქსიმალური დონის დროს). წყალსაცავი დღე-ღამური რეგულირებისაა, საჭიროების შემთხვევაში შეიძლება კვირეული რეგულირებაც. აწესრიგებს მდინარე რიონის ჩამონადენს გუმათჰესისათვის.

გუმათის წყალსაცავი წაგრძელებულია მდინარის ხეობის მიმართულებით. უდიდესი სიგრძეა 11 კმ, სიგანე 60-იდან 550 მ-მდე. ნაპირები სუსტადაა დანაწევრებული, ადგილ-ადგილ ფლატიანია. ზვირთცემა სუსტია. მდინარე რიონს წყალსაცავში წლიურად 5 მლნ. ტ-ზე მეტი მყარი ჩამონადენი შეაქვს, რის გამოც სწრაფად ისილება.

იხილეთ აგრეთვე

• საქართველოს წყალსაცავები

ლიტერატურა

• აფხაზავა ი., ქართული საბჭოთა ენციკლოპედია, ტ. 3, თბ., 1978. — გვ. 306.

რესურსები ინტერნეტში

• გუმათის წყალსაცავის ადგილმდებარეობა