ტალღურასებრნი (ლათ. Lymantriinae) — ღამის პეპლების ქვეოჯახი ერებუსისებრთა ოჯახისა (Erebidae). აქვთ საშუალო ზომის შებუსვილი და მოუქნელი სხეული.[1] ფართო ფრთების შლილი 2–10 სმ-ია.[2] წინა ფრთები მოთეთრო-მონაცრისფრო-მოყავისფროა, სუსტად მოხატული ან ერთფერი. უკანა ფრთები მკრთალი და მოუხატავია.[1] ზოგიერთი სახეობის დედალს (მაგ., გვარ Orgyia-ის წარმომადგენლებს) ფრთები არ გააჩნია. ჩვეული მოვლენაა სქესობრივი დიმორფიზმი.[2] უმრავლესობას რუდიმენტული პირის ორგანოები აქვს და არ იკვებება. მატლი უხვადაა შებუსვილი, იკვებება ხემცენარეთა ფოთლებით ან წიწვებით, იშვიათად — ბალახით.[1] მამლები აქტიურები არიან დღისით, რა დროსც ეძებენ სუსტად მფრენ დედლებს. ქვეოჯახში 3000-მდე სახეობაა, რომლებიც გავრცელებული არიან მთელ დედამიწაზე, განსაკუთრებით ძველი სამყაროს ტროპიკებში.[2] საქართველოში გვხვდება 20. ტალღურასებრთა უმრავლესობა მეზოფილური ტყის ბინადარია, გვხვდება სუბტროპიკულ ტყეშიც, ერთეულები — სტეპში. ზოგიერთი სახეობა ტუნდრაში იჭრება, ზოგი კი არქტიკის უკიდურეს საზღვარს აღწევს.[1] თითქმის ყველა სახეობა ყოვლისმჭამელია, უმრავლესობა ვითარდება ხეებზე. პარკებში ჭუპრდებიან მრავალ სუბსტრატზე.[2] ტალღურასებრთა უმრავლესობა ტყისა და ხეხილის მავნებელია. მასობრივი გამრავლების დროს საქართველოში დიდი ზიანი მოაქვთ არაფარდ აბრეშუმხვევიას, მონაზონას, ოქროკუდას.[1]
