ევრიფაგია

ევრიფაგია (ბერძ. εὐρύς — „ფართო“ და φάγος — „შთამნთქმელი“), ყოვლისმჭამელობა, პანტოფაგია (ბერძ. πᾶν — „საყოველთაო“) — საკვები რეჟიმი იმ ცხოველებისა, რომლებიც ჭამენ ცხოველური და მცენარეული შედგენილობის სხვადასხვა საკვებს. იგი პოლიფაგიის უკიდურესი ხარისხია. ახასიათებს, მაგალითად, გარეულ ღორს, მურა დათვს, რუხ ვირთაგვას, ყორანს, უხერხემლოებიდან — ტარაკანების სინანთროპულ სახეობებს, ბევრ გველკუდას. ევრიფაგებს სხვა ცხოველებთან შედარებით უპირატესობა აქვთ, რამდენადაც შეუძლიათ მრავალნაირ გარემო პირობებში, უფრო ფართო არეალებში არსებობა. ზოგიერთი ევრიფაგი, განსაკუთრებით სინანთროპები, კოსმოპოლიტური სახეობა გახდა.