ჯულიეტა ვაშაყმაძე

ჯულიეტა ვაშაყმაძე (დ. 14 აგვისტო, 1933, თბილისი, საქართველოს სსრ — გ. 27 დეკემბერი, 2020, თბილისი, საქართველო) — ქართველი მსახიობი და ტელეწამყვანი. საქართველოს სსრ-ის დამსახურებული არტისტი (1967).

ჯულიეტა ვაშაყმაძე
დაბადების თარიღი	14 აგვისტო, 1933 თბილისი, საქართველოს სსრ, სსრკ
გარდაცვალების თარიღი	27 დეკემბერი, 2020 (87 წლის)
ეროვნება	ქართველი

ბიოგრაფია

საშუალო განათლება თბილისის პირველ ქალთა სკოლაში მიიღო, რომელიც 1952 წელს ოქროს მედალზე დაამთავრა და სწავლა განაგრძო საქართველოს პოლიტექნიკურ ინსტიტუტში არქიტექტურის ფაკულტეტზე. 1958 წელს, როცა იგი ბოლო კურსზე იყო, სერგო ზაქარიაძის რჩევით, შოთა რუსთაველის სახელობის საქართველოს თეატრალურ ინსტიტუტში განაგრძო სწავლა და 1960 წელს პოლიტექნიკური ინსტიტუტის პარალელურად დაამთავრა სამსახიობო ფაკულტეტი.

საქართველოს ტელევიზიის დაარსების დღიდან, 1956 წლის 30 დეკემბრიდან, ჯულიეტა ვაშაყმაძე იწყებს მუშაობას ჯერ დიქტორად, ხოლო 1968 წლიდან ტელეკომენტატორად. სხვადასხვა დროს მიჰყავდა საინფორმაციო, თეატრალური, კულტურული, სოციალური და სხვა სახის ტელეგადაცემები.

დაქორწინებული იყო ტელერეჟისორ შალვა გაბუნიაზე, წყვილს ქალიშვილი და ორი ვაჟიშვილი ჰყავს — გიორგი, რომელიც თავადაც ცნობილი ტელეწამყვანია და დათა, ასევე სატელევიზიო მუშაკი, პროდიუსერი.

2013 წლის 30 დეკემბერს, საქართველოს ტელევიზიის დაარსების 57 წლისთავთან დაკავშირებით, საზოგადოებრივმა მაუწყებელმა მთაწმინდის პარკში, თბილისის ტელეანძის სიახლოვეს, საპატიო ვარსკვლავი გაუხსნა ტელევიზიის პირველ წამყვანებს: ჯულიეტა ვაშაყმაძეს, ლია მიქაძეს და შურიკო მაჭავარიანს. გარდა ტელევიზიისა, ჯულიეტა ვაშაყმაძემ კინოშიც მიიღო აქტიური მონაწილეობა.

გარდაიცვალა 2020 წლის 27 დეკემბერს, 87 წლის ასაკში.

ფილმოგრაფია

• 1959: „ყვავილი თოვლზე“ (ციცინო) რეჟ. შოთა მანაგაძე
• 1960: „პაპა გიგია“ (თინა) რეჟ. ზაქარია გუდავაძე
• 1962: „თოჯინები იცინიან“ (დოდო) რეჟ. ნიკოლოზ სანიშვილი
• 1963: „მზე ჭიქაში“ (ლია, ტექნოლოგი ქალი) რეჟ. მერაბ ჯალიაშვილი
• 1968: „არაჩვეულებრივი გამოფენა“ (თინა) რეჟ. ელდარ შენგელაია

ჯილდოები, პრემიები და პრიზები

• 1967: საქართველოს სსრ-ის დამსახურებული არტისტი
• 1996: ღირსების ორდენი

რესურსები ინტერნეტში

• ჯულიეტა ვაშაყმაძე — საქართველოს ბიოგრაფიული ლექსიკონი
• ჯულიეტა ვაშაყმაძე კინოფილმების ინტერნეტ-მონაცემთა ბაზაში
• ჯულიეტა ვაშაყმაძე [დაარქივებული] — ეროვნული ფილმოგრაფია