ნანა ძაგნიძე

ნანა ძაგნიძე
ქვეყანა (სპორტი)	საქართველო
ეროვნება	ქართველი
დაბადების თარიღი	1 იანვარი, 1987 (37 წლის)
დაბადების ადგილი	ქუთაისი, საქართველო
წოდება	დიდოსტატი (2008)
ფიდე რეიტინგი	2570 (დეკემბერი, 2014)
მაქსიმალური რეიტინგი	2567 (მარტი, 2011)

ნანა ძაგნიძე (დ. 1 იანვარი, 1987) — ქართველი მოჭადრაკე, დიდოსტატი (2008). მოქმედი მსოფლიო ჩემპიონი სწრაფ ჭადრაკში. ევროპის ჩემპიონი პირად ჩათვლაში (2017), ოლიმპიური ჩემპიონი გუნდურ (2008) და პირად ჩათვლაში (2014).

ახალგაზრდული მიღწევები

საერთაშორისო ასპარეზზე ნანამ თავისი პირველ მნიშვნელოვან ტურნინზე დიდი წარმარტებით იასპარეზა, მოიპოვა რა ოქროს მედალი 1999 წლის მსოფლიოს ჩემპიონატზე 12 წლამდე გოგონათა შორის. 2003 წელს ძაგნიძემ უკვე 20 წლამდე გოგონათა შორის იპირველა, საბოლოო რეიტინგში კი ორი ქულით გაასწრო კონკურენტებს.

პროფესიონალური კარიერა

2008 წელს ნანა დრეზდენის საჭადრაკო ოლიმპიადის გამარჯვებული გახდა გუნდური ჩათვლაში, საქართველოს ნაკრებში მასთან ერთად მაია ჩიბურდანიძე, ლელა ჯავახიშვილი, მაია ლომინეიშვილი და სოფიკო ხუხაშვილი ირიცხებოდნენ. ძაგნიძე ქართველთა გუნდის ყველაზე შედეგიანი მოთამაშე იყო ქართული ჭადრაკის ლეგენდის მაია ჩიბურდანიძის შემდეგ.

2014 წელს ნორვეგიის ქალაქ ტრომსეში გამართულ 41-ე საჭადრაკო ოლიმპიადაზე ქალთა შორის ინდივიდუალურ ჩათვლაში საუკეთესოდ იასპარეზა, უკან მოიტოვა მსოფლიოს პირველი დაფა ქალებს შორის — ჩინელი ხოუ იფანი და ოქროს მედალი მოიპოვა.^[1]. ამავე წელს ნანამ ბილბაოში მიმდინარე ევროპის საკლუბო ჩემპიონატი მოიგო საჭადრაკო კლუბ ნონას შემადგენლობაში. კლუბმა, სადაც ძაგნიძესთან ერთად ბელა ხოტენაშვილი, სალომე მელია და ნინო ბაციაშვილი ასპარეზობდნენ, ტურნირის დასრულებამდე ერთი ტურით ადრე გაინაღდა ჩემპიონობა.^[2]

2015 წლის ოქტომბერში ევროპის საკლუბო ჩემპიონატზე, რომელიც მაკედონიის დედაქალაქ სკოპიეში ჩატარდა ზედიზედ მეორედ მოიპოვა ჩემპიონის ტიტული ბათუმურმა კლუბმა "ნონამ". გუნდის შემადგენლობაში ნანა ძაგნიძე, ბელა ხოტენაშვილი, ნინო ბაციაშვილი, ლელა ჯავახიშვილი და მირანდა მიქაძე თამაშობდნენ (მწვრთნელი - დავით ჯოჯუა, კაპიტანი - მარიკა ჯაფარიძე). ქართველმა მოჭადრაკეებმა შვეიცარიული სისტემით გამართულ ევროპის საკლუბო ჩემპიონატზე, სადაც 12 კლუბი მონაწილეობდა, 7 ტურში ყველა შეხვედრაში გაიმარჯვეს და ქულათა მაქსიმუმი - 14 ქულა მოაგროვეს. მე-2 ადგილი მაკედონიის გუნდმა "გამბიტმა" დაიკავა, მე-3 ადგილზე კი რუსეთის წარმომადგენელი "უგრა" გავიდა.^[3]

2017 წლის აპრილში ლატვიის დედაქალაქ რიგაში გამართულ ევროპის ქალთა ინდივიდუალურ ჩემპიონატზე ნანა ძაგნიძემ პირველი ადგილი დაიკავა და საქართველოს ისტორიაში პირველი ქალი მოჭადრაკე გახდა, რომელმაც ევროპის ჩემპიონობა მოიპოვა. ქართველმა დიდოსტატმა 11 შესაძლებლიდან 8,5 ქულას მოუყარა თავი და ნახევარი ქულით გაუსწრო მეორე-მესამე ადგილზე გასულ რუს დიდოსტატებს: ალექსანდრა გოლიაჩკინასა და ალისა გალიამოვას. ქუთაისელმა დიდოსტატმა საწყისი სამი პარტია (მამეჯაროვა, ბაბი, პაპი) უპრობლემოდ მოიგო. შემდეგ ანა მუზეჩუკს და ოლგა ზიმინას დაუზავდა, რასაც ევროპის ექს-ჩემპიონ თურქ ეკატერინე ატალიკთან გამარჯვება მოჰყვა. დარჩენილი ხუთი პარტიიდან, ძაგნიძემ ორი მოიგო (დანიელიანი, სოცკო), სამში კი ყაიმი დააფიქსირა (გორიაჩკინა, პოგონინა), მათ შორის, მსოფლიოს ექსჩემპიონ მარია მუზეჩუკთან.^[4]

2017 წლის ნოემბერში ბათუმის საჭადრაკო კლუბმა ნონამ 11 მატჩქულით (17,5 პარტიებში აღებული ქულა) ევროპის საკლუბო ჩემპიონატზე ანტალიაში ოქრო მოიპოვა. კლუბ ნონას შემადგენლობაში თამაშობდნენ: ნანა ძაგნიძე, ჰარიკა დრონავალი (ინდოეთი), ნინო ბაციაშვილი, ბელა ხოტენაშვილი და სალომე მელია.^[5]

ამავე წლის დეკემბერში ნანამ, საუდის არაბეთის დედაქალაქ ელ-რიადში მსოფლიოს ჩემპიონატზე ელვისებურ ჭადრაკში გაიმარჯვა. ქართველმა დიდოსტატმა 16,5 ქულა დააგროვა და ნახევარი ქულით გაასწრო მეორე ადგილზე გასულ ვალენტინა გუნინას (რუსეთი), მესამე ადგილზე კი 14 ქულით ჟუ ვენჟუნი (ჩინეთი) განთავსდა.^[6]^[7]

2018 წლის ევროპის ინდივიდუალურ ჩემპიონატზე, რომელიც სლოვაკეთის ქალაქ ვისოკე ტატრიში გაიმართა ძაგნიძემ ტიტულის დაცვა ვერ მოახერხა და მეორე ადგილს დასჯერდა. 11 ტურის შემდეგ, ნანამ რვა ქულა დააგროვა და ერთი ქულით ჩამორჩა რუს ვალენტინა გუნინას, რომელმაც მესამედ მოიპოვა ტიტული.^[8]

პირადი ცხოვრება

ძაგნიძე მეუღლესთან ერთად 2017 წელს

ნანა ძაგნიძე დაიბადა 1987 წლის 1 იანვარს ქუთაისში. ჭადრაკის თამაში 5 წლის ასაკიდან დაიწყო და თავიდანვე მრავალი წარმატება მოიპოვა. სკოლის დამთავრების შემდეგ სწავლობდა თბილისის სახელმწიფო უნივერსიტეტის საერთაშორისო ურთიერთობების ისტორიის ფაკულტეტზე. პარალელურად სწავლობდა თბილისის დავით აღმაშენებლის სახელობის უნივერსიტეტში, აქვს იურისტის დიპლომი.^[9]

ჰყავს მეუღლე, ყოფილი მოჭადრაკე შალვა კაკულია, რომელთანაც 2011 წლის ივნისში დაქორწინდა. წყვილს ჰყავს ორი ვაჟიშვილი ნიკოლოზი (2012) და გიორგი (2014).^[10]^[11]

2017 წელს მიენიჭა ვანის საპატიო მოქალაქის წოდება,^[12] 2018 წლის დასაწყისში დაასახელეს საქართველოს 2017 წლის საუკეთესო სპორტსმენად არაოლიმპიურ სახეობებში, საქართველოს ჭადრაკის ფედერაციის გენერალურმა სპონსორმა, სოკარ ენერჯი ჯორჯიამ კი, საზეიმო შეხვედრა გაუმართა.^[13]^[14]

რესურსები ინტერნეტში

ნანა ძაგნიძე — ფიდეს ჩანაწერი (ინგლისური)
ნანა ძაგნიძის პარტიების არქივი — chessgames.com

სქოლიო

[1] 41st Olympiad Tromso 2014 (Women): The best players chess-results.com

[2] საჭადრაკო კლუბი ნონა ევროპის ჩემპიონია! WorldSport.Ge

[3] საჭადრაკო კლუბი ნონა ევროპის ჩემპიონია http://msy.gov.ge

[4] ნანა ძაგნიძის გამარჯვება და ტრაგედია AmerikisKhma.com

[5] ბათუმის საჭადრაკო კლუბი ნონა ევროპის ჩემპიონი გახდა Batumelebi.Netgazeti.ge

[6] ქართული ჭადრაკის უდიდესი გამარჯვება! GCF.org.ge

[7] ნანა ძაგნიძე მსოფლიო ჩემპიონია sputnik-georgia.com

[8] ძაგნიძე ევროპის ვიცე-ჩემპიონია WorldSport.Ge

[9] ნანა ძაგნიძე: საერთოდ, ხასიათის მოჭადრაკე ვარ! PrimeTimeNews.Ge. დაარქივებულია ორიგინალიდან — 2016-03-06. ციტირების თარიღი: 2014-09-20.

[10] როგორ გახდა ქართველი ქალი პირველად ევროპის ჩემპიონი ჭადრაკში Tbiliselebi.ge

[11] ნანა ძაგნიძეს ვაჟი შეეძინა WorldSport.Ge

[12] ვანელობის დღსასწაულს გრიგოლ ლილუაშვილი ადგილობრივი ხელისუფლების წარმომადგენლებთან ერთად დაესწრო droa.ge

[13] სოკარ ენერჯი ჯორჯიამ, ნანა ძაგნიძეს საზეიმო შეხვედრა მოუწყო iPress.ge^{[მკვდარი ბმული]}

[14] ნანა ძაგნიძე და სხვა საუკეთესო არაოლიმპიელები Fortuna.ge

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]