პარიზის ქრონიკა

„პარიზის ქრონიკა“, „ცხოვრება საქართველოჲსა“, XVIII საუკუნის I ნახევრის ქართული ანონიმური საისტორიო თხზულება. აღწერილია 1373-1683 წლების ისტორიული მოვლენები. ქრონიკის ერთადერთი არასრული ხელნაწერი ინახება პარიზის ეროვნულ ბიბლიოთეკაში. პირველად გამოსცა მარი ბროსემ პარიზში 1830 წელს (ლითოგრაფიული გამოცემა).

„პარიზის ქრონიკა“ კომპილაციაა. მისი უმთავრესი წყაროებია: რედაქტირებული „ქართლის ცხოვრება“, „მესხური მატიანე“, ფარსადან გორგიჯანიძის „საქართველოს ცხოვრება“, გრიგოლ დოდორქელის „ცხოვრება და წამება ქეთევან დედოფლისა“, იოსებ თბილელის პოემა „დიდმოურავიანი“, როსტომ-ხანის 1648 წლის სიგელი, არჩილ მეფის „გაბაასება თეიმურაზისა და რუსთველისა“. ბევრი წყარო არ არის მოღწეული თავდაპირველი სახით და შემონახულია „პარიზის ქრონიკაში“ ჩართული მათი ზოგიერთი ნაწყვეტი.

გამოცემები

• Marie-Félicité Brosset. Chronique géorgienne, Société royale asiatique de France, Paris, 1830 (Google Books)
• პარიზის ქრონიკა, ანუ ცხოვრება საქართველოჲსა და დიდი მოურავის ამბები. მეორე გამოც. ზ. ჭიჭინაძისაგან, ტფ., 1903
• ცხოვრება საქართველოჲსა (პარიზის ქრონიკა), გ. ალასანიას გამოც., თბ., 1980
• Парижская хроника / Пер., исслед., примеч. и указ. Г.Г. Аласания. Тбилиси, 1991 (საქართველოს პარლამენტის ეროვნული ბიბლიოთეკა)

ლიტერატურა

• ქართული საბჭოთა ენციკლოპედია, ტ. 7, თბ., 1984. — გვ. 690.