ემზარ კვიციანი (დ. 25 აპრილი 1961, ჩხალთა, საქართველოს სსრ) — საქართველოს მეცხრე მოწვევის პარლამენტის დეპუტატი. საქართველოს ყოფილი პრეზიდენტის, ედუარდ შევარდნაძის სამხარეო რწმუნებული კოდორის ხეობაში 2001-2003 წლებში. ეს თანამდებობა 2004 წლის დეკემბერში აფხაზეთის მაშინდელი ლეგიტიმური მთავრობის თავმჯდომარე ირაკლი ალასანიას გადაწყვეტილებით გაუქმდა.[1]

ემზარ კვიციანი
Emzar Kvitsiani (VOA).jpg
დაბადების თარიღი 25 აპრილი, 1961 (1961-04-25) (59 წლის)
დაბადების ადგილი ჩხალთა, საქართველოს სსრ, სსრკ
მოქალაქეობა საბჭოთა კავშირის დროშა სსრკ
საქართველოს დროშა საქართველო
განათლება კიევის უმაღლესი საერთო სამხედრო სამეთაურო სასწავლებელი
ეროვნება ქართველი
პარტია APG-logo.png საქართველოს პატრიოტთა ალიანსი
საქმიანობა საქართველოს პარლამენტის IX მოწვევის წევრი
მეუღლე/ები თეთნულდი ანსიანი

ემზარ კვიციანი ლიდერობდა გასამხედროებულ ჯგუფ „მონადირეს“, რომელშიც დაახლოებით 300-400 კაცი შედიოდა, რომელიც თავის დროზე კოდორის ხეობის აფხაზური სამხედრო ფორმირებებისგან დასაცავად შეიქმნა. ჯგუფი 2002 წელს საქართველოს თავდაცვის სამინიტროს დაქვემდებარებაში შევიდა, მაგრამ ფაქტობრივად მისი წევრები დამოუკიდებლად იღებდნენ გადაწყვეტილებებს. 2005 წელს თავდაცვის მინისტრმა ირაკლი ოქრუაშვილმა ხელი მოაწერა განკარგულებას „მონადირის“ დაშლის შესახებ, რამაც კოდორის ხეობის ადგილობრივი მოსახლეობის უკმაყოფილება და დაუმორჩილებლობა გამოიწვია.[1]

2006 წლის ივლისში განხორციელებული საპოლიციელო ოპერაციის შედეგად სამთავრობო ძალებმა კვიციანის მომხრეების უმრავლესობის განიარაღება შეძლეს, თუმცა თავად კვიციანმა რამდენიმე ახლო პირთან ერთად რუსეთში გაქცევა მოახერხა. საქართველოს პოლიციამ კვიციანის ადგილსამყოფელზე ინფორმაციისთვის 100.000 ლარის ჯილდო დააწესა.[2]

2014 წლის 28 თებერვალს, ემზარ კვიციანი მოსკოვიდან დაბრუნდა საქართველოში და თბილისის საერთაშორისო აეროპორტშივე დააკავეს. მისი თქმით, ის შეგნებულად წავიდა ამ ნაბიჯზე, რადგან ახალი ხელისუფლების პირობებში სიმართლის დადგენის იმედი ჰქონდა[3]. 17 ნოემბერს, ზუგდიდის სასამართლომ ის დამნაშავედ ცნო უკანონო გასამხედროებული ჯგუფის შექმნისა და 2006 წელს კოდორის ხეობაში ამბოხის მოწყობისათვის და 12-წლიანი თავისუფლების აღკვეთა შეუფარდა[4].

2015 წლის 28 იანვარს, პროკურატურასთან მიღწეული საპროცესო შეთანხმების შემდეგ, ქუთაისის სააპელაციო სასამართლომ კვიციანი პატიმრობიდან გაათავისუფლა[5].

2015 წლის მარტიდან არის პარტია საქართველოს პატრიოტთა ალიანსის წევრი[6]. 2016 წლის საპარლამენტო არჩევნების შემდეგ გახდა საქართველოს პარლამენტის დეპუტატი.

რესურსები ინტერნეტშირედაქტირება

სქოლიორედაქტირება