ათაბასკის ტბა
ათაბასკის ტბა (ინგლ. Lake Athabasca) — დიდი მტკნარწყლიანი ტბა კანადაში, სასკაჩევანისა და ალბერტის პროვინციებში. მდებარეობს მდინარე მაკენზის სისტემის ზემო წელში, ზღვის დონიდან 213 მ სიმაღლეზე. მყინვარულ-ტექტონიკური წარმოშობისაა. გადაჭიმულია ნახევარმთვარისებურად, აღმოსავლეთიდან დასავლეთისაკენ 283 კმ-ზე. ზედაპირის ფართობი 7850 კმ², მაქსიმალური სიღრმე 124 მ. სანაპირო ხაზის სიგრძე ~1900 კმ. დასავლეთი ნაწილი წყალმარჩხია. ჩრდილოეთი ნაპირები მაღალია, კლდოვანი, სამხრეთი — დაბალი. იყინება ოქტომბრის ბოლოს. ტბის დასავლეთ დაბოლოებაში ჩაედინება მდინარე ათაბასკა, გამოედინება მონების მდინარე. განვითარებულია თევზჭერა. არის 23 სახეობის თევზი, მათ შორის: წერი, ფარგა, არქტიკული გოჭალა და კუმჟა. აღსანიშნავია, რომ 1961 წელს ტბაში დაიჭირეს კალმახი, რომლის წონამ სარეკორდო 46,3 კგ შეადგინა. ტბის ნაპირებზეა ოქროს საბადოები. ათაბასკის ტბის რაიონშია აგრეთვე ურანის მადნის საბადო. სამხრეთ ნაპირებთან მიბჯენილია ქვიშის დიუნები. ნაპირებზეა რამდენიმე დასახლება.
| ათაბასკის ტბა | |
|---|---|
 ათაბასკის ტბის სატელიტური ფოტო | |
| კოორდინატები: 59°16′ ჩ. გ. 109°27′ დ. გ. / 59.267° ჩ. გ. 109.450° დ. გ. | |
| მდებარეობა |  კანადა
|
| სიმაღლე ზღვის დონიდან | 213 მ |
| სიგრძე | 283 კმ |
| სიგანე | 50 კმ |
| ფართობი | 7850 კმ² |
| მაქსიმალური სიღრმე | 124 მ |
| ჩამდინარე მდინარეები | ათაბასკა |
| გამომდინარე მდინარე | მონების მდინარე |
  | |
იხილეთ აგრეთვე რედაქტირება
რესურსები ინტერნეტში რედაქტირება
- ათაბასკის ტბა — სტატია დიდი რუსული ენციკლოპედიიდან (რუსული)
- ათაბასკის ტბა — სტატია ენციკლოპედია ბრიტანიკიდან (ინგლისური)