19 — ინგლისელი მომღერალ ადელის სადებიუტო სტუდიური ალბომი. იგი გამოვიდა 2008 წლის 28 იანვარს, ლეიბლზე XL Recordings. 2006 წლის მაისში, ბრიტანეთის ხელოვნებათა და ტექნოლოგიის კოლეჯში სწავლის დასრულების შემდეგ ადელმა დაიწყო სიმღერების გამოქვეყნება და კურსისთვის ჩაიწერა სამი სიმღერისგან შემდგარი დემო-ფირი, რომელიც მეგობარს გადასცა. მეგობარმა დემო Myspace-ზე გამოაქვეყნა, სადაც მას დიდი წარმატება ხვდა წილად და მიიქცია XL Recordings-ის ინტერესი. ამას მოჰყვა ადელსა და ლეიბლს შორის გაფორმებული კონტრაქტი და დამატებითი ვოკალი ჯეკ პენიატის ჩანაწერზე. ამ სესიის დროს მომღერალმა ჯიმ ებისი გაიცნო, რომელიც შემდგომში მისი სადებიუტო ალბომის პროდიუსერი გახდა.
ადელი მთლიანი ალბომის სიმღერების ავტორია, თუმცა ჩაწერისას მუშაობდა რამდენიმე თანაავტორთან და პროდიუსერთან, რომელთა შორის იყვნენ საშა სკარბერკი, ეგ უაიტი და ჯიმ ებისი. მათი დახმარებით შეიქმნა ალბომი წარუმატებელ სასიყვარულო ურთიერთობებზე.[12] გამოცემისთანავე კრიტიკოსებმა 19 დადებითად შეაფასე და თვლიდნენ, რომ მას ჰქონოდა შანსი, ქცეულიყო თავისი თაობის ერთ-ერთ გავლენიან და პატივსაცემ შემსრულებლად.[13]19-მ მიიღო რამდენიმე პრესტიჟული ჯილდო, მათ შორის, მერკურის ჯილდო და გრემის ჯილდო საუკეთესო ახალი შემსრულებლის კატეგორიაში.[14] მეორე სინგლი, "Chasing Pavements" აგრეთვე გრემის გამარჯვებული იყო - პოპ-მუსიკის კატეგორიაში საუკეთესო ქალი შემსრულებლის პოზიციაზე.
[14]
19 კომერციულადაც წარმატებული იყო, მოხვდა რა გამოცემისთანავე ბრიტანეთის ჩარტში №1 პოზიციაზე[15] და მიაღწია Billboard 200-ის მეოთხე ადგილამდე. ალბომი ბრიტანეთში რამდენიმეჯერ იყო სერტიფიცირებული პლატინის სტატუსით და აშშ-ში ორმაგი პლატინის სტატუსის მატარებელია.[16][17] მისმა მსოფლიო გაყიდვებმა დაახლოებით 7 მილიონი ასლი შეადგინეს.
[18]