მიხეილ ნანობაშვილი

მიხეილ იროდიონის ძე ნანობაშვილი (მიშელ დარიალი) (დ. 1878, თელავი, საქართველო — გ. 13 სექტემბერი, 1941, პარიზი, საფრანგეთი) — უცხოეთში მოღვაწე ქართველი მომღერალი (ტენორი).

ბიოგრაფია

ახალგაზრდობაში თბილისში ეგზარქოსის გუნდში მღეროდა. 1896 წელს შევიდა პეტერბურგის კონსერვატორიაში, შემდეგ კი მეცადინეობდა პროფესორ გაბელთან.1900 წელს გაემგზავრა იტალიაში სწავლის გასაგრძელებლად, სწავლობდა მილანში. 1908-1924 წლებში ნანობაშვილი პარიზის „გრანდ ოპერის“ მომღერალი იყო. გასტროლებს მართავდა იტალიაში, აშშ-ში, თურქეთში, ესპანეთში, რუსეთში; ეწვია თბილისსაც (1911, 1920). ნანობაშვილს ჰქონდა ლამაზი ტემბრის ხავერდოვანი ხმა, ვირტუოზული ტექნიკა, აღსანიშნავია მის მიერ მაღალი ოსტატობით შესრულებული პარტიები; რაული (მეიერბერის „ჰუგენოტები“), ფაუსტი (ბოიტოს „მეფისტოფელი“), დონ ხოზე (ბიზეს „კარმენი“), ვერთერი (მასნეს „ვერთერი“) და სხვა. გარდაიცვალა პარიზში. დაკრძალულია იქვე, მონმარტრის წმინდა ვერსალის სასაფლაოზე.

ლიტერატურა

ცამციშვილი ა., უცხოეთში მოღვაწე ქართველი ხელოვანნი, თბ., 1962

ქართული საბჭოთა ენციკლოპედია, ტ. 7, თბ., 1984. — გვ. 312-313.
ქართული მუსიკის ენციკლოპედიური ლექსიკონი. – თბ., 2015. – გვ. 361.

რესურსები ინტერნეტში

მიხეილ ნანობაშვილი — საქართველოს ბიოგრაფიული ლექსიკონი