კარლსონი

კარლსონი (შვედ. Karlsson på taket — კარლსონი, რომელიც სახურავზე ცხოვრობს ან სახურავის ბინადარი კარლსონი) — ლიტერატურული პერსონაჟი, რომელიც შეიქმნა შვედი მწერლის, ასტრიდ ლინდგრენის მიერ.

კარლსონი
ილონ ვიკლანდის მიერ დახუტული კარლსონი
პირველი გამოჩენა	სახურავის ბინადარი კარლსონი
შემქმნელი	ასტრიდ ლინდგრენი
მსახიობი	მატს ვიკსტრომი
ინფორმაცია
ზედმეტსახელ(ებ)ი	მსოფლიოში საუკეთესო (მაგ.: საუკეთესო მოჩვენება, ძაღლების საუკეთესო მწვრთნელი)
სქესი	მამრობითი
ოჯახი	დედა, მამა, ბებია (ნახსენებია წიგნებში ამა თუ იმ ადგილას)
საცხოვრებელი	სახლი სახურავზე, ქ. სტოკჰოლმი
ეროვნება	შვედი

კარლსონი ცხოვრობს შვედეთში, პატარა სახლში, რომელიც მრავალსართულიანი კორპუსის სახურავზეა აშენებული. კარლსონი საუკეთესო მეგობარია შვიდი წლის სვანტე, სვანტესონების უმცროსი ვაჟი, რომელსაც უბრალოდ ბიჭუნას ეძახიან.

არსებობს მოსაზრება, რომ ლინდგრენმა პერსონაჟი შექმნა მისტერ ო'მეილის მიხედვით, რომელიც კროკეტ ჯონსონის 1942 წლის კომიქსში გამოჩნდა.

აღწერილია ტრილოგიაში:

• ბიჭუნა და სახურავის ბინადარი კარლსონი (1955)
• სახურავის ბინადარი კარლსონი კვლავ მოფრინდა (1962)
• სახურავის ბინადარი კარლსონი კვლავ ოინბაზობს (1968)

ადაპტაციები

პერსონაჟები ბორის სტეპანცევის მიერ ილუსტრირებულ საფოსტო მარკაზე, 2012.

არსებობს კარლსონის თავგადასავლების რამდენიმე ეკრანიზაცია. შვედური მხატვრული ფილმი „მსოფლიოს საუკეთესო კარლსონი“, გამოვიდა 1974 წელს. 2002 წელს გამოვიდა შვედური სრულმეტრაჟიანი ანიმაციური ფილმიც. არსებობს შვედეთის/ფრგ-ს ერთობლივი ანიმაციური სერიალიც.

საბჭოთა პერიოდში გამოვიდა ბორის სტეპანცევის ორი მოკლემეტრაჟიანი ანიმაციური ფილმი („ბიჭუნა და კარლსონი“, „კარლსონი დაბრუნდა“). კარლსონს ახმოვანებს ვასილი ლივანოვი, ხოლო ფრეკენ ჰილდურ ბოკს - ფაინა რანევსკაია.

1971 მოსკოვის სატირის თეატრმა დადგა სპექტაკლი წიგნების მიხედვით, რომელშიც კარლსონის როლს განასახიერებდა სპარტაკ მიშულინი. გამოვიდა ტელესპექტაკლიც. როგორც სასცენო, ასევე ტელევერსიაში პერსონაჟის როლს ასრულებდა მიშულინი. ფრეკენ ბოკის როლში ორივე ვერსიაში იყო ტატიანა პელცერი.

კრიტიკა

კარლსონის პიროვნული თვისებები წარსულში იმ პედაგოგთა და მშობელთა კრიტიკას იმსახურებდა, რომლებსაც სწამდათ, რომ ასეთი ქცევა გავლენას იქონიებდა ბავშვებზეც. კერძოდ, აკრიტიკებდნენ იმ ფაქტს, რომ კარლსონი არ სცემს პატივს უფროს პიროვნებებს, არ ენდობა და ეშინია ბავშვთა მომვლელების.