დენიელ რედკლიფი

დენიელ რედკლიფი (ინგლ. Daniel Radcliffe; დ. 23 ივლისი, 1989) — ინგლისელი მსახიობი, რომელმაც სახელი გაითქვა ჰარი პოტერის ფილმების სერიის მთავარი პერსონაჟის, ჰარი პოტერის თამაშით. მისი დებიუტი ათი წლის ასაკში, 1999 წელს შედგა BBC-ის ფილმში „დევიდ კოპერფილდი“. მსახიობი ჰარი პოტერის როლზე 11 წლის ასაკში შეარჩიეს. როლის ათწლიანი თამაში 2011 წელს დასრულდა და ხსენებული პერსონაჟის განსახიერებამ რედკლიფს მსოფლიო პოპულარობა და 100 მილიონ ამერიკულ დოლარზე მეტი მოუტანა.

დენიელ რედკლიფი
დენიელ რედკლიფი 2015 წელს
დაბადების სახელი	დენიელ ჯეიკობ რედკლიფი
დაბადების თარიღი	23 ივლისი, 1989 (1989-07-23) ლონდონი, ინგლისი
აქტიური	1999–დღემდე

„ჰარი პოტერი“

2000 წელს, პროდუსერმა დევიდ ჰეიმენმა, პატარა დენიელს ურჩია ბედი ეცადა და „ჰარი პოტერი და ფილოსოფიური ქვის“ ქასტინგზე მისულიყო. ხსენებული ფილმის გადაღება ჯოან როულინგის წიგნის მიხედვით იგეგმებოდა. მიუხედავად იმისა, რომ მომავალ მსახიობს ხსენებული წიგნი წანაკითხი არ ჰქონდა, ის ქასტინგზე მაინც მივიდა. რეჟისორ კრის კოლამბუსს, რომელსაც დენიელი 1999 წლის BBC-ის ფილმში უკვე ენახა, მოეწონა პატარა მსახიობი. რეჟისორმა მას რამდენიმე სცენის გათამაშება სთხოვა, საბოლოოდ კი ფილმის მთავარი პერსონაჟის შემსრულებელ მსახიობად დაამტკიცა. ჰარის როლის დენიელის მიერ განსახიერება ასევე ძალიან მოეწონა თავად წიგნის ავტორსაც, რომელმაც აღნიშნა, რომ „კოლამბუსი უკეთეს ჰარის ვერც იპოვიდა“.

ფილმი „ჰარი პოტერი და ფილოსოფიური ქვა“ (ამერიკული ვერსიით: ჰარი პოტერი და ჯადოქრის ქვა - Harry Potter and the Sorcerer's Stone) 2001 წელს გამოვიდა და გადაღებებზე დახარჯული თანხა რამდენიმე დღეში გამოიმუშავა. „ფილოსოფიურმა ქვამ“ უამრავი ბავშვისა და ზრდასრულის მოწონება დაიმსახურა. ფილმს ასევე დადებითად შეხვდნენ კრიტიკოსებიც და ფენტეზის ჟანრში ერთ-ერთ საუკეთესო შედევრად აღიარეს. პირველ ფილმს წლების მანძილზე მომდევნო შვიდი ფილმიც მოჰყვა, რომლებმაც მსახიობს უფრო და უფრო მეტი წარმატება, შემოსავალი და მსოფლიო პოპულარობა მოუტანა.

პირადი და საჯარო ცხოვრება

რედკლიფი ფილმების გადაღებების პარალელურად სკოლაში სწავლობდა. მართალია კლასში ის საკმაოდ ნიჭიერი ბავშვი იყო, მაგრამ ძირითად დროსა და ყურადღებას მაინც ყოველთვის გადასაღებ მოედანს უთმობდა და სწავლის მიმართ განსაკუთრებული სიბეჯითე არასდროს გამოუვლენია. რედკლიფმა ჰარი პოტერის ქასტინგზე გაიცნო თავისი საუკეთესო მეგობრები: რუპერტ გრინტი, ემა უოტსონი და ტომ ფელტონი. მიუხედავად იმისა რომ მსახიობს ჰქონდა რამდენიმე რომანი, ის ჯერჯერობით დაუქორწინებელია. რაც შეეხება მის რელიგიას, მისი დედა ინგლისელი ებრაელია, მამა კი ინგლისელი პროტესტანტი. თავად დენიელმა კი 2012 წელს ინტერვიუში განაცხადა, რომ მართალია მშობლების რელიგიას პატივს სცემს, მაგრამ თავად ათეისტია.

აღსანიშნავია, რომ რედკლიფი შემოსავლის გარკვეულ ნაწილს ქველმოქმედებაშიც ხარჯავს. ის ხშირად ეხმარება ბავშვთა ჰოსპისებსა და სხვადასხვა არასამთავრობო ორგანიზაციებს.

ფილმოგრაფია

წელი		ქართულად	მშობლიური სახელწოდება	როლი
2001	ფ	პანამას მკერავი	The Tailor of Panama	მარკ პენდელი
2001	ფ	ჰარი პოტერი და ფილოსოფიური ქვა	Harry Potter and the Philosopher's Stone	ჰარი პოტერი
2002	ფ	ჰარი პოტერი და საიდუმლო ოთახი	Harry Potter and the Chamber of Secrets	ჰარი პოტერი
2004	ფ	ჰარი პოტერი და აზკაბანის ტყვე	Harry Potter and the Prisoner of Azkaban	ჰარი პოტერი
2005	ფ	ჰარი პოტერი და ცეცხლოვანი თასი	Harry Potter and the Goblet of Fire	ჰარი პოტერი
2007	ფ	ჰარი პოტერი და ფენიქსის ორდენი	Harry Potter and the Order of the Phoenix	ჰარი პოტერი
2007	ფ	დეკემბრის ბიჭები	December Boys	მეპსი
2009	ფ	ჰარი პოტერი და ნახევარპრინცი	Harry Potter and the Half-Blood Prince	ჰარი პოტერი
2010	ფ	ჰარი პოტერი და სიკვდილის საჩუქრები - ნაწილი 1	Harry Potter and the Deathly Hallows – Part 1	ჰარი პოტერი
2011	ფ	ჰარი პოტერი და სიკვდილის საჩუქრები - ნაწილი 2	Harry Potter and the Deathly Hallows – Part 2	ჰარი პოტერი
2012	ფ	ქალბატონი შავებში	The Woman in Black	არტურ კიპსი
2013	ფ	რა იქნებოდა, რომ	What If	უოლასი
2015	ფ	ვიქტორ ფრანკენშტეინი	Victor Frankenstein	იგორი

რესურსები ინტერნეტში

• დენიელ რედკლიფი კინოფილმების ინტერნეტ-მონაცემთა ბაზაში
• DanRadcliffe.co.uk დაარქივებული 2010-06-11 საიტზე Wayback Machine. არაოფიციალური საიტი; ნამუშევრები Warner Bros.–სთან; დენიელის პუბლიცისტი, და დენიელის ოჯახი.
• DanRadcliffe.com დაარქივებული 2010-09-23 საიტზე Wayback Machine. არაოფიციალური საიტი; ნამუშევრები Warner Bros.–სთან; დენიელის პუბლიცისტი, და დენიელის ოჯახი.
• დენიელ რედკლიფის ინტერვიუ ფენიქსის ორდერისთვის – TheCinemaSource.com-ზე
• დენიელ რედკლიფის შემოსავალი ჰარი პოტერის როლის თამაშისთვის დაარქივებული 2016-11-20 საიტზე Wayback Machine.