ანატოლიის ზეგანი
ანატოლიის ზეგანი (თურქ. Anadolu Yaylası) — ზეგანი თურქეთში, მცირე აზიის მთიანეთის შიგა ნაწილი. ჩრდილოეთით ესაზღვრება პონტოს მთები, სამხრეთით ტავრის მთები. აღმოსავლეთიდან დასავლეთისაკენ გადაჭიმულია დაახლოებით 700 კმ-ზე, სიგანე 400 კმ-მდე. ზედაპირი ძირითადად მოსწორებულია; ალაგ-ალაგ აღმართულია დაკბილული ქედებიც. გაბატონებული სიმაღლეები 800–1500 მ. ცალკეული მწვერვალების სიმაღლე 2000 მ აღემატება. არის ჩამქრალი ვულკანები. მაქსიმალური სიმაღლეა 3917 მ (სტრატოვულკანი ერჯიასი).[1]
| ანატოლიის ზეგანი | |
|---|---|
| |
| კოორდინატები: 39° ჩ. გ. 35° ა. გ. / 39° ჩ. გ. 35° ა. გ. | |
| ქვეყანა |  თურქეთი
|
| უმაღლესი წერტილი | ერჯიასი |
| სიმაღლე | 3917 მ |
| სიგრძე | 700 კმ |
| სიგანე | 400 კმ |
| ამგებელი ქანები | დანალექი ქანები |
  | |
აგებულია პალეოგენური და ნეოგენური დანალექი ქანებით. ზეგნის საფუძველშია უძველესი მცირე მთის მასივები, რომლებიც აგებულია კამბრიუმამდელი კრისტალური და ნაწილობრივ, პალეოზოური დანალექი ქანებით. სამხრეთში არის ღრმულები, მლაშობები და მარილიანი ტბები. აღსანიშნავია მარილიანი თუზის ტბა. მთავარი მდინარეებია ყიზილ-ირმაქი და საქარია.[1]
დამახასიათებელია სუბტროპიკულ-კონტინენტური ჰავა, გრილი ზამთრით. ატმოსფერული ნალექების რაოდენობა წელიწადში ცენტრალურ ნაწილში — 200 მმ-იდან განაპირა ნაწილებში — 350–500 მმ-მდე. გაბატონებულია რუხი და მურა ნიადაგები. გვხვდება მშრალი სტეპები და ნახევარუდაბნოები. ზეგნის ჩრდილოეთ განაპირა მხარეს მდებარეობს თურქეთის დედაქალაქი ანკარა. განვითარებულია ოაზისური მიწათმოქმედება და მესაქონლეობა.[1]
რესურსები ინტერნეტში
რედაქტირებასქოლიო
რედაქტირება- ↑ 1.0 1.1 1.2 Анатолийское плоскогорье | Большая российская энциклопедия. დაარქივებულია ორიგინალიდან — 2019-10-01. ციტირების თარიღი: 2020-06-06.