პალმ-ჯუმეირა

პალმ ჯუმეირა (არაბ. نخلة الجميرة) — ხელოვნური კუნძულები არაბთა გაერთიანებულ საამიროებში, დუბაის სანაპიროებზე. ხმელეთის ათვისების უდიდესი პროექტი, რომელიც შექმნილი დეველოპერული კომპანიის Nakheel-ის მიერ.^[1]

აღწერა

პროექტის განხორციელება 2001 წლის ივნისში დაიწყო. სამი კუნძულის მშენებლობას საფუძველი სპარსეთის ყურის დუბაის სანაპიროსთან ჩაეყარა. 2006 წლის ბოლოს კუნძულზე დაიწყო განაშენიანება.

კონსტრუქცია

ნახევარმთვარის კუნძულის ფრაგმენტი

კუნძულებზე მშენებლობა დაიწყო 2001 წლის ივნისში. დეველოპერებმა განაცხადეს, რომ 2006 წელს პირველი საცხოვრებელი სახლების გადაცემა მოხდებოდა. ^[2] მშენებლობის გარკვეული პრობლემა შეიქმნა 2008 წლის გლობალური საკრედიტო კრიზისის გამო. პროექტის დასრულების ვადა რამდენჯერმე გადაიდო.

სამი კუნძული პალმა-ჯუმეირა, ჯებელ-ალი და დეირა ხელოვნური კუნძულებია პალმის ხის სახით. ისინი შედგება კუნძულის 16 ფოთლისაგან. გარს ერტყმის ნახევარმთვარის ფორმის ტალღამჭრელები. ყველაზე პატარა ზომის ჯუმეირაა. პალმის ასაგებად ზღვის ფსკერზე 94 მილიონი კუბური მეტრის მოცულობის ქვიშა ჩაიყარა, ხოლო 11 კილომეტრის სიგრძის ნახევარმთვარის ფორმის ტალღამჭრელის გარეთა კიდე აიგო 6,3 მილიონი ტონა ქვისაგან. იმისათვის, რომ კუნძულის გარშემო წყალმა იმოძრაოს, ტალღამჭრელში ნაპრალებია დატოვებული, რაც ხელს შეუწყობს ამ არეალში ზღვის ცხოველებისა და თევზების გავრცელებას, ასევე რიფების წარმოქმნას.

კუნძულის ხედი

პალმის „ტანისა“ და „ფოთლების“ ფართობია 5 კმ². დაგებულია ასფალტის გზები. მატერიკს კუნძული უკავშირდება 300 მეტრიანი ხიდით. ქვიშის პლაჟების გასწვრივ მდიდრული ვილები, საცხოვრებლები, მდიდრული სასტუმროები, სავაჭრო კომპლექსები და კურორტებია განლაგებული. ყველაზე პოპულარულია პალმ-ატლანტისი, სადაც დამსვენებლებს დელფინებთან ერთად შეუძლიათ აუზში ცურვა.

კუნძულებიდან ყველაზე დიდია დეირა. მისი ფართობი ნიუ-იორკის მანჰეტენზე უფრო დიდია. ჯუმეირაზე მოსახლეობა პირველად 2009 წლის აპრილში გამოჩნდა. კუნძულზე ცხოვრობს რამდენიმე ცნობილი პიროვნება.

ჯებელ-ალი ჯუმეირაზე ორჯერ დიდი ზომისაა. მისი მშენებლობა დაიწყო 2002 წლის ოქტომბერში. წინასწარი გათვლებით, მშენებლობის დასრულების შემდეგ, კუნძულზე 250000 ადამიანის დასახლება იგეგმება. მასზე რამდენიმე თემატური პარკი და სხვადასხვა გასართობებია განთავსებული.

ტრანსპორტი

მონორეალი პალმ ჯუმეირაზე

Palm Jumeirah Monorail არის 5,4 კილომეტრიანი სარკინიგზო ხაზი, რომელიც პალმ-ჯუმეირას აკავშირებს მატერიკთან. დაგეგმილია შემდგომი გაფართოება დუბაის მეტროს წითელ ხაზამდე.^[3] ხაზმა ექსპლუატაცია დაიწყო 2009 წლის 30 აპრილს. ეს არის პირველი მონორეალი შუა აღმოსავლეთში.^[4]

ველური ბუნება

2020 წლის დასაწყისში, COVID-19 პანდემიის დროს ადამიანის აქტივობის შემცირების გამო, შეინიშნებოდა ველური ბუნების წარმომადგენელთა რაოდენობის ზრდა, მაგალითად, დელფინები საკმაოდ მომრავლდნენ პალმ-ჯუმეირას გარშემო. ^[5]

2009 წელს New York Times-მა გამოაქვეყნა ინფორმაცია, რომ NASA-ს თანამგზავრებმა ლაზერული ალტიმეტრით დაადგინეს, რომ პალმ-ჯუმეირა იძირებოდა წელიწადში 5 მმ-ით (0,20 დუიმი). საპასუხოდ, Nakheel-მა თქვა, რომ მათ არ მიუღიათ ანგარიშები ასეთი ტიპის სტრუქტურული პრობლემების შესახებ და მიუთითა, რომ ლაზერულ თანამგზავრების გაზომვის გარჩევადობა მხოლოდ 50 მმ-ია (2.0 ინჩი).^[6]