კასკადოვანი მთები
კასკადოვანი მთები (ინგლ. Cascade Range) — ქედი აშშ-სა და კანადაში. შედის კორდილიერების სისტემაში. ჩრდილოეთიდან-სამხრეთისაკენ გადაჭიმულია 1100 კმ-ზე, სიგანე 130 კმ. მაქსიმალური სიმაღლე 4392 მ (ვულკანი რეინირი). სახელი ეწოდა მდინარეებზე (კოლუმბია, ფრეიზერი, კლამათი და სხვა) საფეხურისებრი ჩანჩქერების (კასკადების) სიმრავლის გამო. კასკადოვანი მთების ძირი აგებულია მეზოზოური კრისტალური ქანებით, რომლებიც ზემოდან პალეოგენ-ნეოგენური ლავებითაა დაფარული. ამ ძლიერ დანაწევრებული ვულკანური ზეგნის ზედაპირზე ამოწეულია იზოლირებული ვულკანური კონუსები, როგორებიცაა: ბეიკერი, რეინირი, ჰუდი, ლასენ-პიკი და სხვა. ვულკანების უმეტესობა ჩამქრალია. მათ ფერდობებზე არის მრავალრიცხოვანი ფუმაროლები და ცხელი წყაროები.
| კასკადოვანი მთები | |
|---|---|
 ვულკანი რეინირი | |
| კოორდინატები: 46°51′01″ ჩ. გ. 121°45′35″ დ. გ. / 46.850528° ჩ. გ. 121.759889° დ. გ. | |
| ქვეყანა |  აშშ კანადა
|
| უმაღლესი წერტილი | რეინირი |
| სიმაღლე | 4392 მ |
| სიგრძე | 1100 კმ |
| სიგანე | 130 კმ |
  | |
XIX საუკუნის ბოლოსა და XX საუკუნის დასაწყისში აქტიურობით გამოირჩეოდა ვულკანები რეინირი და ლასენ-პიკი. ვულკანური მწვერვალები დაფარულია ფართო თოვლის ველებითა და მყინვარებით. კასკადოვანი მთების დასავლეთი ნოტიო ფერდობები შემოსილია მუქწიწვოვანი ტყით, აღმოსავლეთ მშრალ კალთებზე არის ფიჭვის ტყე. 2800-3000 მ სიმაღლეზე ტყეს ცვლის სუბალპური და ალპური მდელოები. არის სპილენძისა და ოქროს საბადოები.
რესურსები ინტერნეტში
რედაქტირება- კასკადოვანი მთები — სტატია დიდი რუსული ენციკლოპედიიდან (რუსული)
- კასკადოვანი მთები — სტატია ენციკლოპედია ბრიტანიკიდან (ინგლისური)