კავკასიური კამეჩი

კავკასიური კამეჩი — სარძეო-სახორცე მიმართულების კამეჩის ჯიში. გავრცელებულია საქართველოში, აზერბაიჯანში, სომხეთსა და ირანში. სიმაღლე მინდაოში 133-137 სმ; კურო კამეჩის ცოცხალი მასაა 650–780 კგ, ფურკამეჩის — 400–550 კგ, ახალშობილი ზაქის — 28–32 კგ. ლაქტაციის პერიოდი 200–220 დღეა. წლიური მონაწველი 1200–1600 კგ, უდიდესი 3500 კგ-მდე. რძის ცხიმიანობა 6,6–9%. კავკასიური კამეჩის რძისაგან ამზადებენ მაღალხარისხოვან პროდუქტებს: კარაქს (100 კგ რძისაგან იღებენ 7,1 კგ კაქარს), ყველს, ნაყინს, ერბოსა და მაწონს. ჭარბი ფოსფორის გამო ხორცს წითელი ფერი აქვს. კავკასიური კამეჩი კარგად სუქდება როგორც საიალაღო, ისე ინტენსიური სუქებისას (დღეღამური წონამატი 1128 გ). ნაკლავის გამოსავლიანობა 45–52%. ტყავი სქელი (0,6– 0,9 მმ) და მძიმეა (25–50 კგ), რაც ცოცხალი მასის 6,5–8,5%-ს შეადგენს, იყენებენ ფეხსაცმლის ლანჩად.

ⅩⅠⅩ ს-ის 40-იან წლებამდე ჯიში ფართოდ გავრცელებული იყო სომხეთსა და საქართველოში, დღესდღეობით კი, უმეტესწილად აზერბაიჯანში გვხვდება.

ლიტერატურა

• სააკოვა ლ., ქართული საბჭოთა ენციკლოპედია, ტ. 5, თბ., 1980. — გვ. 311.

• სააკოვა ლ., გოგოლი გ., ენციკლოპედია „საქართველო“, ტ. 4, თბ., 2018. — გვ. 450.
• Nardone, Alessandro (11 იანვარი, 2010). „Buffalo Production and Research“. Italian Journal of Animal Science. 5 (2). doi:10.4081/ijas.2006.203.