თბილისის ილია ვეკუას სახელობის სკოლა
ილია ვეკუას სახელობის სკოლა, 42-ე სკოლა (სრული სახელწოდება — აკადემიკოს ი.ვეკუას სახელობის ფიზიკა-მათემატიკის 42–ე საჯარო სკოლა[1]) — საჯარო სკოლა თბილისში, სადაც გაძლიერებული პროგრამით ისწავლება ფიზიკა-მათემატიკური საგნები და განკუთვნილია მოსწავლეთათვის, ვინც მათ მიმართ ინტერესით და მიდრეკილებით გამოირჩევა.
ისტორია რედაქტირება
სკოლა დაარსდა 1950 წელს. თავდაპირველად იგი ჩვეულებრივ ზოგადსაგანმანათლებლო საშუალო სკოლა იყო. 1962 წლიდან მათემატიკოსების — დავით კვესელავას, ფილიმონ ხარშილაძისა და ნინო ვადაჭკორიას (სკოლის მათემატიკის პედაგოგების) და ფიზიკოს აპოლონ კალატოზიშვილის (იმხანად — სკოლის დირექტორის) ინიციატივით, დაიწყო ნიადაგის მზადება ფიზიკა-მათემატიკური პროფილის კლასის გასახსნელად, რაც განხორციელდა 1963-64 სასწავლო წლებში. 1966 წელს სკოლას მიენიჭა აკადემიკოს ილია ვეკუას სახელი (მეცნიერის სიცოცხლეშივე). ილია ვეკუასა და მათემატიკის გამოთვლითი ცენტრის მეცადინეობით, შესაძლებელი გახდა 1982 წელს სკოლისათვის სპეციალური, ფიზიკა-მათემატიკური სკოლის სტატუსის მინიჭება[2].
სკოლაში ჩარიცხვა ხორციელდება გამოცდების საფუძველზე. მიღება თავდაპირველად წარმოებდა მე-8 , 1992 წლიდან კი — უკვე მე-7 კლასიდან [3]. სწავლება თავდაპირველად იყო ორენოვანი და მიმდინარეობდა როგორც ქართულ- ისე რუსულენოვან სექტორებზე. სკოლაში მოქმედებდა უცხო ენის საგნის დიფერენცირებული სწავლება (ინგლისურ- გერმანულ- და ფრანგულენოვანი ჯგუფები).
90-იან წლებში სკოლაში სწავლა გახდა ფასიანი და ცალკე გამოიყო გაძლიერებული ქიმია-ბიოლოგიური, ჰუმანიტარული, ეკონომიკური პროფილის ჯგუფები, სადაც სწავლება სპეციფიკური პროგრამით მიმდინარეობდა და სასწავლო გადასახადიც უფრო მაღალი იყო. ამგვარმა სისტემამ რამდენიმე წლის განმავლობაში იმოქმედა. 2000-იანი წლებიდან სკოლაში სხვა რამდენიმე მნიშვნელოვანი ცვლილებაც მოხდა: გაუქმდა რუსულენოვანი სექტორი, 2007 წელს სკოლას გაუუქმდა სპეციალური, "ფიზიკა-მათემატიკური" სკოლის სტატუსიც და ეწოდა "42-ე საჯარო სკოლა" [4]. 2010 წელს, განათლების მინისტრ დიმიტრი შაშკინის განკარგულებით, სკოლას დაუბრუნდა ძველი სახელწოდება და სწავლების მიმართულება [5], რაც განმეორებით იურიდიულად დაამტკიცა 2016 წელს მინისტრმა ალექსანდრე ჯეჯელავამ, როდესაც სკოლას მიენიჭა საჯარო სამართლის იურიდიული პირის სტატუსიც [4].
სკოლა მდებარეობს ჩაიკოვსკის ქუჩაზე და ითვლის 800-ზე მეტ მდე მოსწავლესა და 50–მდე მასწავლებელს[6][7]. 2016 წლის ინფორმაციით, სკოლის მასწავლებლებიდან 6-ს ჰქონდა წამყვანის სტატუსი [8]. სწავლება მიმდინარეობს მე-7-დან მე-12 კლასის ჩათვლით. მოქმედებს "საშაბათო სკოლა" მათემატიკით დაინტერესებული უმცროსკლასელებისათვის.
სკოლის მოსწავლეები წლების განმავლობაში წარმატებით ასპარეზობენ სასკოლო საერთაშორისო ოლიმპიადებზე ფიზიკაში, მათემატიკასა და ინფორმატიკაში, როგორც პირად, ისე - გუნდურ დონეზე და გამოირჩევიან მაღალი მოსწრებით ერთიან ეროვნულ გამოცდებზე [5]. მოქმედებს მოსწავლეთა თვითმმართველობა, რომელიც ორგანიზებას უწევს მოსწავლეთა სხვადასხვა აქტივობას. ყოველწლიურად იმართება სამეცნიერო კონფერენციები სხვადასხვა საგანში.
დევიზი რედაქტირება
”შენ ამ სკოლაში მასპინძელი ხარ და არა სტუმარი. გაუფრთხილდი მშობლიური სკოლის ღირსებას."
სქოლიო რედაქტირება
- ↑ https://www.bia.ge/company/87419
- ↑ დაარქივებული ასლი. დაარქივებულია ორიგინალიდან — 2020-04-09. ციტირების თარიღი: 2020-01-20.
- ↑ https://chain-reaction.iliauni.edu.ge/thbilisis-42-sajaro-skola/
- ↑ 4.0 4.1 https://matsne.gov.ge/ka/document/view/3397579?publication=0
- ↑ 5.0 5.1 https://www.mes.gov.ge/content.php?id=737&lang=geo
- ↑ საქართველოს განათლებისა და მეცნიერების სამინისტრო
- ↑ https://edu.aris.ge/schools/akademikos-ilia-vekuas-saxelobis-fizika-matematikis-qalaq-tbilisis-42-sadjaro-skola
- ↑ https://edu.aris.ge/news/romel-skolas-hyavs-yvelaze-meti-sertificirebuli-pedagogi-saqartveloshi.html