თაგვეთის ღვთისმშობლის ეკლესია

თაგვეთის ღვთისმშობლის ეკლესია — ეკლესია ხაშურის მუნიციპალიტეტის სოფელ თაგვეთში, მდებარეობს სოფლის აღმოსავლეთით 300-400 მ-ზე, მუხნარში. თარიღდება ფეოდალური ხანით. ეკლესია დანგრეულია, შემორჩენილია მხოლოდ ნახევარწრიული აფსიდის სამხრეთის მხარე. ამჟამად ნაეკლესიარზე ახალი ეკლესია დგას. ეკლესია დარბაზულია (8X5,2 მ) ეკლესიის მახლობლად აღმოჩნდა ქვიშაქვის ორნამენტირებული ფილა - ძველი ეკლესიის კანკელის ნაწილი. ფილაზე სიბრტყეში შეღრმავებით ორ გლუვ ლილვს შორის მოქცეული ჩუქურთმაა ამოკვეთილი. ორნამენტი შედგენილია ნასკვებით გადაბმული წრეებით, რომლებშიც ვარდულია ჩასმული. სტილისტური ნიშნებით ფილა IX-X სს-ით თარიღდება.

ლიტერატურა

• საქართველოს ისტორიისა და კულტურის ძეგლთა აღწერილობა, ტ. 5, თბ., 1990. — გვ. 434.