დავიდ მალიანი

დავიდ მალიანი (სომხ. Դավիթ Մալյան; დ. 17 აპრილი, 1904, ზაქათალა — გ. 17 ივლისი, 1976, ერევანი) — სომეხი და საბჭოთა მსახიობი, საბჭოთა კავშირის (1974) და სომხეთის სსრ-ის სახალხო (1942) არტისტი.

დავიდ მალიანი
დაბადების თარიღი	17 აპრილი, 1904 ზაქათალა
გარდაცვალების თარიღი	17 ივლისი, 1976 (72 წლის) ერევანი, სომხეთის სსრ, სსრკ
საქმიანობა	მსახიობი
ჯილდოები	სსრკ სახალხო არტისტი

არის ჰენრიხ მალიანის (სსრკ სახალხო არტისტი, 1982) ბიძა.

ბიოგრაფია

დავიდ მალიანი დაიბადა 1904 წელს ქალაქ ზაქათალაში. დაწყებითი განათლება ადგილობრივ სამრევლო სკოლაში მიიღო, რომელიც დაუსრულებელი დატოვა, რადგან 1918 წელს ოჯახთან ერთად აზერბაიჯანიდან საქართველოში, ჯერ თელავში, შემდეგ თბილისში გადავიდა საცხოვრებლად.

მალიანმა პროფესიული განათლება მიიღო თბილისის დრამატულ სტუდია „აიარტუნში“ 1924 წელს არშაკ ბურჯალიანის და სტეპან კაპანაკიანის ხელმძღვანელობით. მცირე ხნით მუშაობდა ერევნის პირველ სახელმწიფო თეატრში, შემდეგ სამუშაოდ გადავიდა თბილისში, სომხურ დრამატულ თეატრში.

1929-1930 წლებში დავიდ მალიანი მუშაობდა ლენინაკანის დრამატულ თეატრში (ამჟამინდელი ვარდან აჯემიანის სახელობის გიუმრის დრამატული თეატრი. ამის შემდეგ მან ორი სეზონი გაატარა ერევნის მუშათა თეატრში. შემდეგ მსახიობი გადავიდა „არმენფილმში“ და 1937 წელს დამკვიდრდა სუნდუკიანის სახელობის ერევნის დრამატულ თეატრში, როგორც მსახიობი.

თეატრში ნათამაშები როლებიდან აღსანიშნავია: ჯეიდი („მომგებიანი პოზიცია“), კრეჩინსკი („კრეჩინსკის ქორწილი“), მიქაელიანი („კაპიტანი“, 1938), ჰარი სმიტი („რუსული საკითხი“, 1947), მიქაელ ნალბანდიანი („მიქაელ ნალბანდიანი“, 1952), ავალიანი, („სიმაღლეებში“), ტიგრანი („გამბედაობა“), ტუსიანი („მოკლული მტრედი“, 1944), კარენი („ცოცხალი ლეში“, 1951), ჩეპურნოი („მზის შვილები“, 1953) და სხვა.

იყო საბჭოთა კავშირის კომუნისტური პარტიის წევრი (1942 წლიდან), სომხეთის სსრ-ის II მოწვევის უმაღლესი საბჭოს დეპუტატი.

ავტორია წიგნისა „სახეები, შეხვედრები“ (1974).

დავიდ მალიანი 1976 წლის 17 ივლისს გარდაიცვალა ერევანში. დაკრძალულია თოხმახის სასაფლაოზე.

დავიდ მალიანის მემორიალური დაფა ერევანში

ჯილდოები და აღიარება

• 1936 : სომხეთის სსრ-ის დამსახურებული არტისტი
• 1942 : სომხეთის სსრ-ის სახალხო არტისტი
• 1974 : სსრკ სახალხო არტისტი
• 1950, 1952 : სტალინური პრემია ლიტერატურისა და ხელოვნების დარგში
• 1944, 1956 : შრომის წითელი დროშის ორდენი
• მედალი „კავკასიის დაცვისათვის“
• მედალი 1941-1945 წლების დიდ სამამულო ომში მამაცური შრომისათვის

ხსოვნა

ერევანში არის დავიდ მალიანის ქუჩა

ფილმოგრაფია

წელი	ფილმი	მშობლიური სახელწოდება	როლი
1926	შორი და შორშორი	Շոր և Շորշոր	ეშმაკი
1935	პეპო	Պեպո	კაკული
1937	ექვსი ზალპი	Վեց համազարկ	ოფიცერი
1938	ზანგეზური	Զանգեզուր	მაკიჩი
1939	სევანის მეთევზეები	Սևանի ձկնորսները	არამი
1939	მთის მარში	Լեռնային արշավ	ვარდანი
1941	სისხლი სისხლის წილ	Արյան դեմ արյուն	ტანკის მეთაური
1941	პატრიოტების ოჯახი	Հայրենասերների ընտանիքը	ლევონი
1943	დავიდ-ბეგი	Դավիթ Բեկ	თავადი შაუმიანი
1955	ადრესატის ძიებაში	Հասցեատիրոջ որոնումները	სურენი
1955	მოჩვენებანი ტოვებენ მწვერვალებს	Ուրվականները հեռանում են լեռներից	სატუნცი
1956	გული მღერის	Սիրտն է երգում	მარკარიანი
1957	ვის უღიმის ბედი	Ում է ժպտում կյանքը	მეცატურიანი
1957	ცნობილია პირადად	Անձամբ ճանաչում եմ	ოსკარ კონი
1960	დაბადებულნი სიცოცხლისთვის	Կոչված են ապրելու	პეტროსიანი
1961	თორმეტი თანამგზავრი	Տասներկու ուղեկիցներ	მინასიანი

ლიტერატურა

• ა. არაქსმანიანი, „დავიდ მალიანი“. 1957.

რესურსები ინტერნეტში

• დავიდ მალიანი — კინოფილმების ინტერნეტ მონაცემთა ბაზა (ინგლისური)
• დავიდ მალიანი
• ვერიკო ანჯაფარიძე და დავით მალიანი