აზორის კუნძულები

*აზორის ავტონომიური რეგიონი*
აზორის ავტონომიური რეგიონი პორტ. Região Autónoma dos Açores; აზორის კუნძულები
	დევიზი: „Antes morrer livres que em paz sujeitos“ (პორტუგალიური); „სჯობს სიცოცხლესა ნაძრახსა სიკვდილი სახელოვანი“ (ქართულად)
	ჰიმნი: A Portuguesa;
	აზორის კუნძულები მდებარეობა
დედაქალაქი	პონტა-დელგადა1; ანგრა-დუ-ეროიჟმუ2; ჰორტა3
უდიდესი ქალაქი	პონტა-დელგადა
ოფიციალური ენა	პორტუგალიური
მთავრობა	ავტონომიური რეგიონი
ფართობი
მოსახლეობა
ვალუტა	ევრო
დროის სარტყელი	UTC-01:00
Internet TLD	.pt
სატელეფონო კოდი	351

აზორის კუნძულები (პორტ. Açores) — არქიპელაგი ატლანტის ოკეანეში. პორტუგალიის ავტონომიური რეგიონი. დედაქალაქი – პონტა-დელგადა. ამ არქიპელაგის ცხრა მთავარი კუნძული, სამ ცალკეულ ჯგუფს ქმნის და პორტუგალიის დასავლეთით 1600 კმ-ზეა გადაჭიმული. კუნძულები ვულკანთა ამოფრქვევისა და მიწისძვრათა შედეგად წარმოიქმნა. კლიმატი აქ ნოტიო სუბტროპიკულია და ამიტომ მცენარეები კარგად ხარობს. კუნძულ პიკოზე მდებარეობს პორტუგალიის ყველაზე მაღალი მწვერვალი - პიკო (2351 მ).

აზორის პოლიტიკურ-ადმინისტრაციული რეგიონული ავტონომია ხორციელდება პორტუგალიის კონსტიტუციის ფარგლებში და არ ლახავს სახელმწიფო სუვერენიტეტს. ავტონომიის ძირითადი სამართლებრივი საფუძვლებია პორტუგალიის კონსტიტუცია და აზორის ავტონომიური რეგიონის პოლიტიკურ-ადმინისტრაციული სტატუტი.

აზორის ავტონომიურ რეგიონს აქვს საკუთარი დროშა, გერბი, ბეჭედი და ჰიმნი, რომელიც მტკიცდება საკანონმდებლო ორგანოს მიერ.

სახელისუფლებო ორგანოები

აზორის ავტონომიური რეგიონის საკანონმდებლო ასამბლეა

რეგიონის საკანონმდებლო ორგანოა რეგიონის ერთ პალატიანი საკანონმდებლო ასამბლეა. იგი წარმოადგენს რეგიონის წარმომადგენლობით ორგანოს, რომელიც ახორციელებს საკანონმდებლო საქმიანობას და ზედამხედველობს რეგიონის მთავრობის საქმიანობას. საკანონმდებლო ასამბლეა შედგება 4 წლის ვადით არჩეული 57 დეპუტატისაგან.

საკანონმდებლო ასამბლეის უფლებამოსილების ცნობის შემდეგ ასამბლეის სხდომა ირჩევს პრეზიდენტს და ბიუროს. პრეზიდენტად შეიძლება არჩეული იქნეს ის დეპუტატი, რომელიც მიიღებს დეპუტატთა ხმების აბსოლუტურ უმრავლესობას. თუ ვერცერთმა კანდიდატმა ვერ მიიღო ხმათა დადგენილი უმრავლესობა კენჭი ეყრება საუკეთესო შედეგის მქონე 2 კანდიდატს. თუ პრეზიდენტი ამ შემთხვევაშიც ვერ აირჩა იმართება კიდევ ერთი კენჭისყრა და არჩეულად ითვლება ის კანდიდატი, რომელიც მეტ ხმას მიიღებს. საკანონმდებლო ასამბელის პრეზიდენტი წარმოადგენს ასამბლეას, ხელმძღვანელობს და კოორდინაციას უწევს მის საქმიანობას.

აზორის ავტონომიური რეგიონის მთავრობა

აზორის ავტონომიური რეგიონის აღმასრულებელ ხელისუფლებას ახორციელებს რეგიონის მთავრობა, რომელიც აზორის რეგიონული ადმინისტრაციის უმაღლეს ორგანოოს წარმოადგენს. პრეზიდენტი და რეგიონული სამდივნოები წარმოადგენს რეგიონულ სამთავრობო დეპარტამენტებს.

რეგიონული მთავრობა შედგება პრეზიდენტისა და რეგიონული მდივნებისაგან. რეგიონული მთავრობის წევრთა რაოდენობა და დასახელება, მათი სამოქმედო არეალი, კომპეტენცია და სტრუქტურა განისაზღვრება რეგიონული აქტით.

რეგიონული მთავრობის პრეზიდენტი ინიშნება რესპუბლიკის წარმომადგენლის მიერ საკანონმდებლო ასამბლეის არჩევნების შედეგების გათვალისწინებით მასში წარმოდგენილი პოლიტიკური ძალების წარმომადგენლების მოსმენის შემდეგ. ვიცე-პრეზიდენტები და რეგიონული მდივნები ინიშნებიან რესპუბლიკის წარმომადგენლის მიერ რეგიონის პრეზიდენტის წარდგინებით. რეგიონის მთავრობა უფლებამოსილებას იღებს რეგიონის საკანონმდებლო ასამბლეის წინაშე.

რეგიონის მთავრობა თავისი საქმიანობისას ხელმძღვანელობს სამთავრობო პროგრამით, რომელიც შეიცავს მთავრობის საქმიანობის ძირითად მიმართულებებს.

რესპუბლიკის წარმომადგენელი აზორის ავტონომიურ რეგიონში

აზორის ავტონომიურ რეგიონში რესპუბლიკის წარმომადგენელს ნიშნავს რესპუბლიკის პრეზიდენტი რესპუბლიკის მთავრობასთან კონსულტაციის შემდეგ. თანამდებობიდან გადადგომის შემთხვევების გარდა, რესპუბლიკის წარმომადგენლის უფლებამოსილების ვადა ემთხვევა რესპუბლიკის პრეზიდენტის უფლებამოსილების ვადას და იგი წყდება რესპუბლიკის ახალი წარმომადგენლის მიერ თანამდებობის დაკავებისთანავე. რესპუბლიკის წარმომადგენელი:

- არჩევნების შედეგების გათვალისწინებით ნიშნავს რეგიონის მთავრობის პრეზიდენტს;

- რეგიონის მთავრობის პრეზიდენტის წარდგინებით ნიშნავს და ათავისუფლებს რეგიონის მთავრობის სხვა წევრებს;

- ხელს აწერს და აქვეყნებს რეგიონის კანონებს;

- პორტუგალიის კონსტიტუციის 227-ე და 228-ე მუხლებით განსაზღვრული წესით იყენებს ვეტოს უფლებას.

აზორის კუნძულები

იხილეთ აგრეთვე

მადეირა

ლიტერატურა

Costa, Antonieta (2007). Pelo sinal do Espírito Santo By the sign of the Holy Spirit. Angra do Heroísmo: Presidência do Governo Reginal dos Açores. Direcção Regional da Cultural, გვ. 120p.

რესურსები ინტერნეტში

Azores Regional Government
Assembleia Legislativa da Região Autónoma dos Açores http://www.alra.pt/
Azores Weather & Climate დაარქივებული 2009-05-14 საიტზე Wayback Machine.
Açoreanos: the Azores online community დაარქივებული 2010-10-12 საიტზე Wayback Machine.