ჯობსი (ფილმი)

ჯობსი (ინგლ. Jobs) — 2013 წლის ამერიკული ბიოგრაფიული დრამა, რომელიც დაფუძნებულია სტივ ჯობსის ცხოვრებაზე, 1974 წლიდან რიდის კოლეჯის სტუდენტობის პერიოდიდან 2001 წელს iPod-ის დანერგვამდე. მისი რეჟისორია ჯოშუა მაიკლ შტერნი, სცენარის ავტორი მეტ უაიტლი. სტივ ჯობსს განასახიერებს ეშტონ კაჩერი, ჯოშ გადი კი Apple Computer-ის თანადამფუძნებელ სტივ უოზნიაკს.

სიუჟეტი

ფილმი იწყება 2001 წელს Apple Town Hall-ის შეხვედრაზე შუახნის სტივ ჯობსის მიერ iPod-ის წარდგენით. შემდეგ ფილმის სიუჟეტი 1974 წელს რიდის კოლეჯში ბრუნდება, სადაც სწავლობდა ჯობსი, მაგრამ სწავლის მაღალი საფასურის გამო იძულებულია დატოვოს სასწავლებელი. დეკანი, ჯეკ დადმანი გაკვეთილებზე დასწრების ნებას აძლევს. ჯობსი განსაკუთრებით დაინტერესებულია კალიგრაფიის კურსით. ის შეხვდება თავის მეგობარს დანიელ კოტკეს, რომელთან ერთად ორი წელი ინდოეთში გაატარებს დროს.

ლოს-ალტოსში დაბრუნების შემდეგ ის ცხოვრობს თავის მამობილ-დედობილ - პოლთან და კლარასთან ერთად. მუშაობს Atari-ში ვიდეო თამაშების შემქმნელად. პარტნიორობას ავითარებს თავის მეგობარ სტივ უოზნიაკთან მას შემდეგ, რაც აღმოაჩენს, რომ უოზნიაკმა შექმნა „პერსონალური კომპიუტერის“ პროტოტიპი (Apple I). ისინი თავიანთ ახალ კომპანიას Apple Computer-ს აფუძნებენ. ჯობსი თავის კომპანიაში წარმატებულ სპეციალისტებს იზიდავს. 1977 წელს ისინი Apple II-ს უშვებენ.

წარმატებამ ჯობსი ძალიან დააშორა თავის ახლო მეგობრებს. მისი არაპროგნოზირებადი ქმედებების გამო ის ჩამოაშორეს Apple Lisa-სა და Macintosh-ზე მიმდინარე სამუშაოებს. 1985 წელს ჯობსი იძულებული გახდა კომპანიიდან წასულიყო.

შემდეგ ფილმის სიუჟეტი გადადის 1996 წელში, როცა სტივ ჯობსი ქორწინდება და აგვარებს ოჯახურ ურთიერთობებს. ის კომპანია NeXT-ს ხელმძღვანელობს, რომელის შეძენა Apple-მა გადაწყვიტა. გენერალური დირექტორი ჯილ ამელიო სთავაზობს ჯობსს კომპანიაში დაბრუნებას კონსულტანტის სტატუსით. ჯობსი თანხმდება წინადადებას. ჩქარა კომპანიის გენერალური დირექტორი თავად ხდება და საბოლოოდ ამელიოს ათავისუფლებს. კომპანიაში კი ჯონ აივის იწვევს.

როლებში

ეშტონ კაჩერი — სტივ ჯობსი
ჯოშ გადი — სტივ უოზნიაკი
ლუკას ჰასი — დანიელ კოტკე
ვიქტორ რასუკი — ბილ ფერნანდესი
ედი ჰესელი — კრის ესპინოზა
რონ ელდარდი — როდ ჰოლტი
ნელსონ ფრანკლინი — ბილ ატკინსონი
ელდენ ჰენსონი ენდი ჰერცფელდი
ჯეიმზ ვუდსი — ჯეკ დადმანი
ჯონ გეტსი — პოლ ჯობსი
ლესლი ენ უორენი — კლარა ჯობსი
ები ბრამელი — ლორენ პაუელ ჯობსი
ანიკა ბერტეა — ლიზა ბრენან-ჯობსი (ზრდასრული)
ავა აკესი — ლიზა ბრენანი (ბავშვი)
ანა ო'რეილი — კრისან ბრენანი

რესურსები ინტერნეტში

„ჯობსი“ — კინოფილმების ინტერნეტ-მონაცემთა ბაზა (ინგლისური)