ღიმი, ყინტორა (ლათ. Chaerophyllum) — ერთ-, ორ- ან მრავალწლოვან მცენარეთა გვარი ქოლგოსანთა ოჯახისა. აქვს ორჯერ-ოთხჯერ ფრთისებრ-განკვეთილი ფოთლები და თეთრი (იშვიათად მეწამული, ვარდისფერი ან სხვა ელფერით) ყვავილები, რომლებიც შეკრებილია რთულ ქოლგებად. დაახლოებით 40 სახეობა გავრცელებულია ევროპაში, აზიასა და ამერიკაში (ამ უკანასკნელში მხოლოდ რამდენიმე). გვხვდებ კავკასიაშიც. ღიმი (Ch. bulbosum) საკვებად ვარგისია, აქვს სქელი ბოლქვისებრი ფესვები. დასავლეთ ევროპაში იგი კულტურაშია შეტანილი. საკვებადაა ვარგისი რამდენიმე სხვა სახეობის ფესვებიც. იყენებენ საკვებ, სასალათე და სალნელებელ მცენარეებად. მათრობელა ყინტორა (C. temulum), რომელიც კავკასიაშიც გვხვდება, შხამიანი მცენარეა. პრესკოტის ღიმი (Ch. prescottii) და ღიმი (Ch. bulbosum) მარცვლოვანთა ნათესების სარეველა მცენარეებია. საქართველოში აგრეთვე გვხვდება ყინტორა (Ch. aureum); სულ ჩვენში გავრცელებულია 11 სახეობა, მათ შორის 5 — Chaerophyllum humile Stev. (Ch. Kiapazi Woronow ex Schischk.), Ch. borodinii Albow., Ch. roseum Bieb. (Ch. millefolium DC.), Ch. rubellum Albov., Ch. confusum Woronow — კავკასიის ენდემია.[1]
