კოფრჩხილა (ლათ. Falcaria) — მრავალ, ორ- ან ერთწლოვან ბალახოვან მცენარეთა გვარი ქოლგოსანთა ოჯახისა.
გვარში ერთადერთი (ძველი კლასიფიკაციებით 4–5) სახეობაა[1] — ჩვეულებრივი კოფრჩხილა (Falcaria vulgaris). გავრცელებულია ევრაზიის ზომიერ სარტყელში და ჩრდილოეთ აფრიკაში. გვხვდება საქართველოშიც. 20–60 სმ სიმაღლის ორწლოვანი ბალახია. გვხვდება მშრალ მდელოზე, ქვიან ფერდობზე, ტყის პირზე, ველზე, გზის პირზე. ნათესების (ძირითადად საგაზაფხულო კულტურების) სარეველაა. ნორჩ ფოთლებს ხარშავენ და საკაზმად ან მხალად იყენებენ, ამწნილებენ.
