თებერვალი - 2014 წლის მეორე თვე. დაიწყო შაბათს და დამთავრდა 28 დღის შემდეგ, პარასკევს.
|
|
- ორგანიზაციამ „რეპორტიორები უსაზღვრებოდ“ გამოაქვეყნა „მსოფლიო მედიის თავისუფლების ინდექსი“. საუკეთესო სამეული ასეთია — ფინეთი, ნიდერლანდები და ნორვეგია. ხოლო სიის ბოლოს შემდეგი ქვეყნები მოექცა: თურქმენეთი, ჩრდილოეთი კორეა და ერიტრეა. „რეპორტიორები უსაზღვრებოდ“ ყოველ წელს აქვეყნებს „მედიის თავისუფლების ინდექსს“ და ზომავს ინფორმაციის თავისუფლების ხარისხს ცალკეულ ქვეყანაში. ეს ნაშრომი ასახავს ჟურნალისტების, მედია-ორგანიზაციებისა და ინტერნეტის თავისუფლების ხარისხს. „მედიის თავისუფლების ინდექს — 2014“-ში 180 ქვეყნის მდგომარეობაა ასახული. საქართველოს 84-ე ადგილი უკავია (შარშან კი მე-100 იყო), (რადიო თავისუფლება)
- მსოფლიოს უმსხვილესმა ავტომწარმოებელმა TOYOTA-მ მსოფლიო მასშტაბით ახლადაღმოჩენილი ხარვეზის გამო 1 900 000 TOYOTA PRIUS HYBRID გაიწვია. მიზეზი პროგრამული ხარვეზია, რაც მოძრაობის მომენტში ავტომობილის მოულოდნელ გაჩერებას იწვევს. TOYOTA-ს განცხადებით, ჯერჯერობით, ხარვეზის 400 შემთხვევა აღმოაჩინეს სამხრეთ ამერიკასა და იაპონიაში გაყიდულ მოდელებში. მიუხედავად იმისა, რომ ბოლო წლებში TOYOTA-მ ხარვეზის გამო ბაზრიდან 10 მილიონზე მეტი ავტომობილი გაიწვია, ის ამ დრომდე მსოფლიოს ყველაზე მსხვილ ავტომწარმოებლად რჩება. (ტაბულა)
- ალჟირში 11 თებერვალს მომხდარ ავიაკატასტროფას ბორტზე მყოფი 78 ადამიანიდან 77 ემსხვერპლა. ამის შესახებ ინფორმაციას BBC ავრცელებს. სამხედრო თვითმფრინავ C-130 Hercules-ის ბორტზე ალჟირელი სამხედროები და მათი ოჯახის წევრები იმყოფებოდნენ. თვითმფრინავი ქალაქ ტამანრასეტიდან კონსტანტინში მიფრინავდა და ფრენის დასრულებამდე რამდენიმე წუთით ადრე მთას შეეჯახა. კატასტროფის სავარაუდო მიზეზად ადგილზე რთული მეტეოროლოგიური პირობები სახელდება, თუმცა ზუსტი მიზეზი დადგენილი არ არის. ალჟირის პრეზიდენტმა აბდელაზიზ ბუტეფლიკამ ქვეყანაში სამდღიანი გლოვა გამოაცხადა. (ტაბულა)
|
