ზამთარი ახლოვდება

„ზამთარი ახლოვდება“
სატახტოთა თამაში -ს ეპიზოდი
ეპიზოდის ნომ.	ეპიზოდი 1
სცენარი	დევიდ ბენიოფი ; დ. ბ. უაისი
რეჟისორი	ტიმ ვან პატენი
მუსიკა	რამინ ჯავადი
ოპერატორი	ალიკ სახაროვი
ეთერი	17 აპრილი, 2011
ეპიზოდების ქრონოლოგია
„―“	„მეფის გზა“

ზამთარი ახლოვდება (ინგლ. Winter Is Coming) — HBO-ს შუა საუკუნეების ფენტეზის ჟანრის ტელესერიალის, სატახტოთა თამაშის პირველი ეპიზოდი. პირველი სეზონის პირველი ეპიზოდი დაფუძნებულია ჯ. რ. რ. მარტინის წიგნის, სატახტოთა თამაშის პირველ თავებზე. სცენარისტები არინ ტელესერიალის შემქმნელები: დევიდ ბენიოფი და დ. ბ. უაისი. ეპიზოდის რეჟისორია ტიმ ვან პატენი.

ტელესერიალის პირველ ეპიზოდში იშლება სატახტოთა თამაშის სამყარო და მთავარი პერსონაჟები ჩნდებიან. ეპიზოდის ცენტრშია სტარკების ოჯახი. მეფის ხელის („Hand of the King“) გარდაცვალების შემდეგ მისი ადგილის დასაკავებლად ხელმწიფე ნედ სტარკს ირჩევს, რის შემდეგაც ეს უკანასკნელი პოლიტიკაში ჩათრეული აღმოჩნდება. ეპიზოდმა მეტწილად დადებითი შეფასებები დაიმსახურა. განსაკუთრებით მოწონება დაიმსახურა სამსახიობო შესრულებამ. პირველი ეპიზოდი 2.2 მილიონმა მაყურებელმა ნახა. გაშვებამდე 1 კვირით ადრე HBO-მ ეპიზოდის პირველი 15 წუთი ინტერნეტში ხელმისაწვდომი გახადა.

ეპიზოდის სახელწოდება მომდინარეობს სტარკების სახლის დევიზიდან (სატახტოთა თამაშის სამყაროში ― „სახლის სიტყვები“), რომელსაც პირველ და მომდევნო ეპიზოდებშიც აჟღერებენ.

სიუჟეტი

კედლის მიღმა

ვესტეროსის კონტინენტზე, ჩრდილოეთში, ყინულის მასიური ბარიერია, კედელი. ღამის გუშაგების რეინჯერები ტყეში დაზვერვაზე არიან, როდესაც დემონურ თეთრ მოსიარულეებს აღმოაჩენენ. უილი, ერთადერთი გადარჩენილი რეინჯერი, სამხრეთში გარბის.

კინგსლენდინგი

დედოფალი სერსეი ლანისტერი მეფის ხელის, ჯონ არინის ცხედარს უყურებს, რა დროსაც ჯეიმი ლანისტერი უახლოვდება. სერსეი ჯეიმის ეუბნება, რომ ისინი უკვე თავმოკვეთილები იქნებოდნენ, არინს და-ძმის შესახებ ვინმესთვის რომ მოეთხრო.

პენტოსი

ვიწრო ზღვის მიღმა, თავისუფალ ქალაქ პენტოსში ვისერის ტარგარიენი თავის დას, დეინერის ტარგარიენს აქორწინებს კჰალ დროგოზე, მომთაბარეთა ბელადზე. მას იმედი აქვს, რომ მომავალში კჰალისგან ვესტეროსის დასაპყრობად დიდ ლაშქარს მიიღებს.

უინტერფელი

უინტერფელში კეტლინ სტარკი დისგან, ლაისასგან მიღებული წერილიდან შეიტყობს, რომ ჯონ არინი მოწამლეს. კოშკზე აცოცებული ბრან სტარკი დედოფალ სერსეის დაინახავს, რომელიც მეფეს საკუთარ ძმასთან, ჯეიმისთან ღალატობს. ჯეიმი ბრანს კოშკის ფანჯრიდან აგდებს.