ანაგის წმინდა მარიამის ეკლესია

ანაგის წმინდა მარიამის ეკლესია — არქიტექტურული ძეგლი სიღნაღის მუნიციპალიტეტში, სოფელ ანაგაში.

აღწერა

ანაგის წმინდა მარიამის ეკლესია დარბაზული ტიპის ნაგებობაა, ნაშენია რიყის ქვითა და აგურით კირხსნარზე. გადახურულია კრამიტით. შესასვლელი დასავლეთიდან და ჩრდილოეთიდან აქვს. კარის ღიობები სწორკუთხაა, რომელთა თავზე აგურით შეისრული თაღის დეკორატიული წყობაა გაკეთებული. ყველა კედელში თითო სარკმელია. დასავლეთისა და აღმოსავლეთის კედლებზე სარკმლის ზემოთ აგურის ჩაწევით კვარცხლბეკზე აღმართული ჯვარი და ორ-ორი რომბია გამოყვანილი. ეკლესიის დასავლეთ კიდეზე ფანჩატურის ტიპის აგურის სამრეკლოა დადგმული. დასავლეთიდან ეკლესიას აგურის ფილაქანი გასდევს.

რესურსები ინტერნეტში

•  კულტურული მემკვიდრეობის პორტალი, № 12793