აგროკლიმატური რუკა
აგროკლიმატური რუკა — თემატიკური რუკა, რომელშიც ასახულია გარკვეული ტერიტორიის ფარგლებში სასოფლო-სამეურნეო წარმოებისათვის საჭირო კლიმატური რესურსებისა და ამინდის პირობების სივრცითი და სივრცით-დროული ცვალებადობა. აგროკლიმატური ცნობარებისაგან განსხვავებით ეს რუკები ინფორმაციას იძლევა არა მარტო იმ პუნქტებისათვის, რომლებშიც წარმოებს დაკვირვება მეტეოროლოგიურ და ფენოლოგიურ მოვლენებზე, სასოფლო-სამეურნეო კულტურების ზრდა-განვითარებასა და მოსავლიანობის მდგომარეობაზე, არამედ ამ ტერიტორიის ნებისმიერი პუნქტისათვისაც. ეს განაპირობებს აგროკლიმატური რუკის დიდ მეცნიერულ და პრაქტიკულ მნიშვნელობას ქვეყნის სასოფლო-სამეურნეო წარმოების სწორად დაგეგმვასა და გაძღოლაში.
აგროკლიმატური რუკის თემატიკა მრავალფეროვანია:
- სავეგეტაციო პერიოდის უზრუნველყოფა სითბოთი და სინოტივით;
- ამინდის უარყოფითი პირობები სავეგეტაციო და ზამთრის პერიოდში;
- სასოფლო-სამეურნეო სამუშაოთა წარმოების კლიმატური პირობები და ვადები;
- სასოფლო-სამეურნეო კულტურების აღმოცენებისა და განვითარების კლიმატური პირობები (ცალკეული კულტურების მიხედვით);
- სასოფლო-სამეურნეო კულტურების განვითარების ფაზების დადგომის პირობები და ვადები.
აგროკლიმატური რუკის თემატიკა აგროკლიმატოლოგიის განვითარების კვალდაკვალ იზრდება. მისი მრავალფეროვნების გამო აუცილებელი ხდება აგროკლიმატური ატლასების შექმნა.
ლიტერატურა რედაქტირება
- ა. ასლანიკაშვილი, ქართული საბჭოთა ენციკლოპედია, ტ. 1, თბ., 1975. — გვ. 71.