ივლიანე ხაინდრავა
ივლიანე ლევანის ძე ხაინდრავა (დ. 8 აპრილი, 1951, თბილისი) — ქართველი სახელმწიფო და საზოგადო მოღვაწე, ქიმიკოსი. ეროვნული კონგრესის პრეზიდიუმის წევრი (1990-1992). საქართველოს რესპუბლიკური პარტიის წევრი 1992 წლიდან და თავმჯდომარე 1996-2000 წლებში. საქართველოს პარლამენტის 2 მოწვევის პარლამენტის (1992, 2004) წევრი.
დაიბადა 1951 წელს მწერალ ლევან ხაინდრავას ოჯახში. 1973 წელს დაამთავრა თბილისის სახელმწიფო პედაგოგიური ინსტიტუტი ქიმიკოსის სპეციალობით. 1973-1989 წლებში მუშაობდა საქართველოს მეცნიერებათა აკადემიის სისტემაში სამეცნიერო-კვლევით ინსტიტუტებში ლაბორანტის თანამდებობიდან უფროს მეცნიერ-თანამშრომლამდე; 1987 წელს მიიღო მთარგმნელ-რეფერენტის წოდება თბილისის უცხოენათა სახელმწიფო პედაგოგიური ინსტიტუტის სინქრონული თარგმნის კურსებზე.
1992-1995 წლებში იყო საქართველოს მე-3 მოწვევის პარლამენტის წევრი პარტიული სიით, საარჩევნო ბლოკი „11 ოქტომბერი“. 1996-2009 წლებში იყო პლურალიზმის ცენტრში სამხრეთკავკასიური კვლევების განვითარებისა და თანამშრომლობის პროგრამის დირექტორი; 2002 წლის აპრილ-აგვისტოში მოწვეული მკვლევარი დემოკრატიის კვლევების საერთაშორისო ფორუმში, ეროვნული ფონდი დემოკრატიისათვის (NED) (ვაშინგტონი, აშშ).
2004-2008 წლებში იყო საქართველოს მე-6 მოწვევის პარლამენტის წევრი პარტიული სიით. პარლამენტში შევიდა საარჩევნო ბლოკიდან „ნაციონალური მოძრაობა — დემოკრატები“ (კოალიცია, საპარლამენტო უმრავლესობა). თუმცა მალევე, 2004 წლის 30 ივნისს, „რესპუბლიკური პარტიის“ ოთხმა წარმომადგენელმა, მ.შ. ივლიანე ხაინდრავამ, საპარლამენტო უმრავლესობა დატოვა. მათი თქმით, აჭარაში გაყალბდა 20 ივნისს ჩატარებული უმაღლესი საბჭოს არჩევნები, ამასთან, არ ეთანხმებოდნენ აჭარის სტატუსის ისეთ მოდელს, რაც ხელისუფლებამ წარადგინა პარლამენტში.[1]
2008-2012 წლებში სამხრეთკავკასიური კვლევების პროგრამის დირექტორი რესპუბლიკურ ინსტიტუტში; 2012 წლის დეკემბრიდან — რესპუბლიკური ინსტიტუტის დირექტორი. 2013 წლიდან საქართველოს ეროვნული უშიშროების საბჭოს თავმჯდომარის მოადგილე იყო.
ხაინდრავას პროფესიულ ინტერესთა ძირითადი სფეროებია: ეროვნული და რეგიონული უსაფრთხოება, კონფლიქტები, არჩევნები, დემოკრატია და სამოქალაქო საზოგადოება. არის რამდენიმე ასეული პუბლიკაციის ავტორი ქართულ და უცხოურ ბეჭდვით და ელექტრონულ გამოცემებში, მრავალი საერთაშორისო კონფერენციისა და სემინარის მონაწილე, მომხსენებელი და მოწვეული ექსპერტი.
მისი ძმა არის გოგა ხაინდრავა, აგრეთვე აქტიური პოლიტიკური მოღვაწე.
რესურსები ინტერნეტში
რედაქტირება- ივლიანე ხაინდრავა — საქართველოს ბიოგრაფიული ლექსიკონი
- ივლიანე ხაინდრავა — საქართველოს პარლამენტის ოფიციალური საიტი (მოძველებული / არქივი / ახალი არქივი)
- ივლიანე ხაინდრავა — საქართველოს რესპუბლიკური პარტია დაარქივებული 2016-03-10 საიტზე Wayback Machine.
- ივლიანე ხაინდრავა — საქართველოს ეროვნული უშიშროების საბჭო დაარქივებული 2016-03-04 საიტზე Wayback Machine.
სქოლიო
რედაქტირება- ↑ „„რესპუბლიკური პარტიის“ ოთხმა წარმომადგენელმა ოთხშაბათს საპარლამენტო უმრავლესობა დატოვა“. რადიო თავისუფლება. 30 ივნისი, 2004. ციტირების თარიღი: 23 სექტემბერი, 2023. შეამოწმეთ თარიღის პარამეტრი
|access-date=და|date=-ში (დახმარება)