- ამერიკის შეერთებული შტატების თავდაცვის მინისტრმა რობერტ გეიტსმა განაცხადა, რომ აპირებს თანამდებობა 2011 წლის დეკემბერში დატოვოს. გეიტსმა ამის შესახებ ჟურნალ „Foreign Policy“-ს აუწყა. (რადიო თავისუფლება)
- 3,5 მილიონი პაკისტანელ ბავშვს წყლით გამოწვეული სასიკვდილო დაავადებები ემუქრება. განაცხადა დღეს გაეროს წარმომადგენელმა მაურიციო ჯულიანომ. მან თქვა, რომ მსოფლიო ჯანდაცვის ორგანიზაცია მზადაა 140 ათასამდე ადამიანს დაეხმაროს ქოლერის ეპიდემიის გავრცელების შემთხვევაში. პაკისტანის წყალმომარაგების სისტემა კატასტროფული წყალდიდობის შედეგად დაბინძურდა. გაეროს გენერალური მდივნის, ბან კი-მუნის თქმით კატასტროფამ სულ 20 მილიონამდე ადამიანი დააზარალა. (რადიო თავისუფლება)
- დღეს, 87 წლის ასაკში, ციხეში გარდაიცვალა საბერძნეთის ყოფილი დიქტატორი დიმიტრიოს იოანიდისი. იოანიდისი ხელმძღვანელობდა 1967 წლის სამხედრო გადატრიალებას საბერძნეთში და შემდეგ „შავი პოლკოვნიკების“ დიქტატურის დამყარებას, რომელიც 1974 წელს დაამხეს. 1973 წელს, როდესაც იოანიდისი საბერძნეთის სამხედრო პოლიციას ხელმძღვანელობდა, მან ათენის პოლიტექნიკური ინსტიტუტის სტუდენტების დიდი აქცია ჩაახშო. დიქტატურის დამხობის შემდეგ იოანიდისი გაასამართლეს და სიკვდილით დასჯა მიუსაჯეს სამშობლოს ღალატისთვის, თუმცა შემდეგ სასჯელი სამუდამო პატიმრობით შეუცვალეს. (რადიო თავისუფლება)
|