ნიკოლოზ დუბროვსკი

ნიკოლოზ ალექსანდრეს ძე დუბროვსკი (რუს. Николай Александрович Дубровский; დ. 16 მაისი, 1874, ახალციხე, — გ. 16 დეკემბერი, 1943, თბილისი) — ისტორიკოსი, პედაგოგი.

დაამთავრა ვარშავის უნივერსიტეტის ისტორიულ-ფილოსოფიური ფაკულტეტი (1901). 1902-1912 წლებში მუშაობდა ვარშავაში, 1914-1919 წლებში იყო თბილისის ქალთა კომერციული სასწავლებლის დირექტორი, 1919-1922 წლებში — აზერბაიჯანის სახელმწიფო უნივერსიტეტის ზოგადი ისტორიის კათედრის პროფესორი, 1919-1920 წლებში — იქვე, ისტორიის ფაკულტეტის დეკანი, 1920-1922 წლებში — აზერბაიჯანის პოლიტექნიკური ინსტიტუტის რექტორი.

1923-1932 წლებში დუბროვსკი მოსკოვის გ. პლეხანოვის სახელობის სახალხო მეურნეობის ინსტიტუტში ასწავლიდა დასავლეთ ევროპის სახალხო მეურნეობის ისტორიას. 1932 წლიდან გარდაცვალებამდე იყო თბილისის სახელმწიფო უნივერსიტეტის, 1933 წლიდან კი, იმავდროულად ქუთაისის პედაგოგიური ინსტიტუტის პროფესორი. იკვლევდა XIX საუკუნის დასავლეთ ევროპის ისტორიას; აქვს წერილები პოლონეთის ისტორიაზე.

ბიბლიოგრაფია

• Очерки по истории 30 и 40 годов XIX столетия в Западной Европе. Франция, июль 1830 г., Ростов-на-Дону, 1905.

ლიტერატურა

• ბერიძე ვ., ენციკლოპედია „საქართველო“, ტ. 2, თბ., 2012. — გვ. 502.
• Николай Александрович Дубровский (1874-1943) : (Забытые имена) / М. Каландадзе // Труды / Николай Дубровский. - Тбилиси, 2004.