მხარგრძელი (ვაზის ჯიში)

მხარგრძელი — ქართული აბორიგენული თეთრყურძნიანი საღვინე ვაზის ჯიში კახეთიდან.

ბოტანიკური აღწერა

ზრდასრული ფოთოლი საშუალო ზომისაა, მომრგვალო, ზოგჯერ მოოვალო ფორმის, ხუთნაკვთიანი. ფოთლის ქვედა მხარის შებუსვა საშუალო სისქის აბლაბუდისებრ-ჯაგრისებრია. ყვავილი მდედრობითი სქესისაა. მხარგრძელის მტევანი გრძელი ან საშუალოზე გრძელია (16-დან 40 სანტიმეტრამდე, სიგანე 14 სმ.), კონუსური ფორმის, ხშირად დატოტვილი და მხრიანი. მეჩხერია, ზოგჯერ ძალიან მეჩხერი. მარცვალი საშუალო ზომისაა, მომრგვალო, ზოგჯერ მოოვალურო, მომწვანო-მოყვითალო ელფერის, ცვილისებრი ფიფქით ოდნავ დაფარული. კანი თხელი და საკმაოდ მკვრივი აქვს^ რბილობი საშუალო სიმკვრივის, მდნარი, ჰარმონიული, სასიამოვნო გემოთი და სუსტად გამოხატული ჯიშური არომატით.

მხარგრძელი საშუალო ზრდისაა. სავეგეტაციო პერიოდი 136-176 დღეა. სავეგეტაციო პერიოდი კვირტის გაშლიდან სრულ სიმწიფემდე 150 დღეა. მტევნის წონა 80-დან 228 გრამამდე მერყეობს, საჰექტარო მოსავლიანობა 7.0-8.0 ტონაა. ყურძნის სრული სიმწიფის პერიოდში მისი შაქრიანობა აღწევს 18-23.0%-ს, ხოლო მჟავიანობა — 6-9 გ/ლ-ს.

ჯიშური სუფრის ღვინო საშუალო ხარისხისაა. მხარგრძელისგან მიიღება გაცილებით უკეთესი ხარისხის ევროპული ტიპის სუფრის თეთრი მშრალი ღვინო, რომელიც ღია ჩალისფერია, სუსტი ჯიშური არომატითა და ნაზი გემოთი.

ლიტერატურა

• უჯმაჯურიძე ლ., კაკაბაძე გ., მამასახლიშვილი ლ., „ქართული ვაზის ჯიშები“, თბ., 2018, გვ. 274

რესურსები ინტერნეტში

• ვაზის ჯიშები // „ჩვენი სოფელი“ : გაზეთი, თბილისი, სექტემბერი, 2021, № 66, გვ. 9.