ვაშინგტონ-ნაველი

ვაშინგტონ-ნაველი (Washington Navel) — ჭიპიანი ფორთოხლის ჯიში. მის სამშობლოდ ითვლება კალიფორნია. მოჰყავთ ტენიან სუბტროპიკებში.

ხე დაბალია ან საშუალო სიმაღლის, ფართოდ გადაშლილი ვარჯით. აქვს დიდი, ოვალური მუქი მწვანე ფოთლები და მცირე რაოდენობით პატარა ეკლები. ნაყოფი დიდია, მრგვალი ან ოდნავ წაგრძელებული, ჯიშისათვის დამახასიათებელი ჭიპით. კანი მოწითალო-ნარინჯისფერია, გლუვი ან ხორკლიანი, წვნიანია, მომჟავო-ტკბილი გემოსი. თესლი არ აქვს, იშვიათად გვხვდება 1- ან 2-თესლიანი. მწიფს ნოემბერში. დიდხანს შენახული შრება და უგემურდება.

საქართველოში ვაშინგტონ-ნაველის მრავალი სახესხვაობაა გავრცელებული.

ლიტერატურა

• გიორგბერიძე ნ., ქართული საბჭოთა ენციკლოპედია, ტ. 4, თბ., 1979. — გვ. 330.