ახშნის გორისჯვრის ეკლესია
ახშნის გორისჯვრის ეკლესია — კომპლექსი ახმეტის მუნიციპალიტეტის სოფელ ახშნის სამხრეთ-აღმოსავლეთით. 700 მ-ზე, მთის ერთ-ერთ ტოტზე. კომპლექსში შედის ეკლესია, სამლოცველო, ნანგრევებად ქცეული რამდენიმე ნაგებობა და გალავანი.
ჯაბა ლაბაძის ფოტო
ე კ ლ ე ს ი ა სამნავიანი ბაზილიკაა (13,5X10,5 მ). განეკუთვნება IX საუკუნის II ნახევარს. გვიანი გადაკეთებების შედეგად თავდაპირველი სახე მნიშვნელოვნად აქვს შეცვლილი. XV-XVI საუკუნეების გადაკეთებების შედეგად მნიშვნელოვნადაა შეცვლილი, როგორც ბაზილიკის, ასევე აგებიდან მოგვიანებით მიშენებული გარშემოსავლელის ინტერიერი. ეკლესიაში შემორჩენილია მოხატულობის კვალი.
ს ა მ ლ ო ც ვ ე ლ ო (6,8X4,3 მ) ეკლესიის ჩრდილო-აღმოსავლეთ კუთხესთან დგას. განეკუთვნება XV-XVI საუკუნეებს, ძლიერ დაზიანებულია. მოგვიანებით სამლოცველოს დასავლეთ ნაწილზე სამრეკლო დაუშენებიათ.
გ ა ლ ა ვ ა ნ ი გეგმით თითქმის სწორკუთხა მოხაზულობისაა, შემორჩენილია ფრაგმენტების სახით, გალავნის სამხრეთ-დასავლეთ კუთხეში და სამხრეთის კედლის გასწვრივ შემორჩენილია ნაგებობათა ნაშთები.
ლიტერატურა რედაქტირება
- საქართველოს ისტორიისა და კულტურის ძეგლთა აღწერილობა, ტ. 2, თბ., 2008. — გვ. 64-66.