ასპუჭაკასებრნი (ლათ. Sylviidae) — ფრინველების ოჯახი ბეღურასნაირთა რიგისა. აერთიანებს მომცრო მგალობელ ფრინველებს. უმეტესად აღმოსავლეთ ნახევარსფეროში გავრცელებული. ასპუჭაკასებრნი ბინადრობენ ტყეებსა და ბუჩქნარებში, ბუდეს აგებენ მიწაზე, ბუჩქზე, ლერწამსა და ხეზე. მეტწილად დებენ 5 კვერცხს, კრუხობის ხანგრძლივობა 11–12 დღეა. ცნობილი იყო ასპუჭაკასებრნთა 386 სახეობა, თუმცა უკანასკნელი კვლევების მიხედვით სახეობების რიცხვი 70-ს, გვარებისა კი 20-ს შეადგენს.[1] საქართველოში გვხვდება 8 გვარი, რომელშიც შედის 19 სახეობა. ასპუჭაკას (Sylvia) გვარიდან აღსანიშნავია მიმინოსებრი (Sylvia nisoria), რუხი (Sylvia communis), შავთავა (Sylvia atricapilla) და ბაღის (Sylvia borin) ასპუჭაკა. იკვებებიან მწერებით. მავნე მწერების განადგურებით ასპუჭაკასებრნებს მეურნეობისათვის მნიშვნელოვანი სარგებლობა მოაქვს.
