Total War: Warhammer III

Total War: Warhammer III (ქართ. ტოტალური ომი: საომარი ურო III) — „Total War“-ის სერიის რიგით მეთხუთმეტე სტრატეგიული თამაში და მესამე და დამასრულებელი Warhammer-ის ტრილოგიაში (პირველი ნაწილი გამოვიდა 2016 წელს, მეორე ― 2017 წელს). მოქმედება მიმდინარეობს Games Workshop-ის კუთვნილი ფენტეზი „Warhammer Fantasy Battles“-ის სამყაროში. შექმნილია Creative Assembly-ს და გამოქვეყნებულია Sega-ის მიერ 2022 წელს.

Total War: Warhammer III
დეველოპერ(ებ)ი	Creative Assembly
გამომცემელი	Sega
სერია	„Total War“
პლატფორმ(ებ)ი	Microsoft Windows Linux macOS
გამოსვლის თარიღი	მსოფლიო 17 თებერვალი, 2022
ჟანრ(ებ)ი	რეალური დროის ტაქტიკა რიგითობაზე დამყარებული სტრატეგია
რეჟიმ(ებ)ი	ერთმოთამაშიანი მრავალმოთამაშიანი
რეჟისორ(ებ)ი	იენ როქსბურგი
ვერსია	5.2.3
საიტი	ოფიციალური საიტი

გეიმპლეი

წინა ნაწილებთან შედარებით ძირითადი ცვლილებები შეიტანეს მაგიის და საალყო ბრძოლების გადამუშავებაში, მნიშვნელოვნად შეიცვალა მომხმარებლის ინტერფეისი, საომარი ერთეულების ზოგიერთი მახასიათებლები და ქცევები, მფრინავ არსებებსა და რაზმებს მიეცათ მიწაზე დაშვების და გადაადგილების საშუალება. ახალ ფრაქციებს აქვთ ბევრად მრავალფეროვანი და უნიკალური მექანიკები. ასევე შეიცვალა პერსონაჟების განვითარება და მათთვის რელიქვიების მიცემა/მოხსნა. შესამჩნევად გაუმჯობესდა მოკავშირეებთან და ვასალებთან ურთიერთქმედების მექანიკები, გაჩნდა მოკავშირე და ვასალი ფრაქციების საომარი რაზმების საკუთარ ჯარებში ჩართვის შესაძლებლობა და მრავალი სხვა სიახლე. „უკვდავი იმპერიების“ რუკაზე ასევე დამატებულია საზღვაოსნო გზები, რომლებიც რუკის ერთი მხრიდან მეორეზე სწრაფად გადაადგილების საშუალებას იძლევა.

სიუჟეტური კამპანია „ქაოსის სამფლობელოს“ რუკა მოიცავს ჩრდილოეთის პოლარული წრის მიმდებარე რეგიონებს, ― კერძოდ კისლევის, ნორსკას და ხატაეთის მოსაზღვრე ქაოსის ნაოხარ მიწებს, ― სადაც მატერიული სამყარო ირევა ქაოსის სამფლობელოში და საიდანაც ქაოსის მიმდევართა მთავარი საფრთხე მოდის. „უკვდავი იმპერიების“ რუკა მოიცავს მთელ მსოფლიოს, დასავლეთით ნაგაროთიდან აღმოსავლეთით ხატაეთამდე და ჩრდილოეთის პოლარული რეგიონებიდან სამხრეთის კონტინენტამდე.

სიუჟეტი

თამაშში შეიძლება გამოიყოს სამი სიუჟეტის მქონე კამპანია, რომლებშიც მოვლენები ერთმანეთის მიმდევრობით ხდება, და Sandbox-ის რეჟიმის „უკვდავი იმპერიები“. ქრონოლოგიურად სიუჟეტური კამპანიები პირველი ნაწილის მოვლენებამდე ხდება.

დაკარგული ღმერთი

მოკლე კამპანია-პროლოგი. სიუჟეტის მიხედვით, კისლევის ღმერთ-დათვის, ურსუნის, იდუმალი გაუჩინარების შედეგად სამეფო განუწყვეტელმა, მრავალწლოვანმა ზამთარმა მოიცვა. უნგოლი მთავარი იური ბარკოვი, ცარიცა კატარინის დავალებით, აგროვებს კისლევიტთა ექსპედიციას და ჩრდილოეთში, ქაოსის ნაოხარ მიწებში მიემართება ურსუნის სახსნელად, დარწმუნებული იმაში, რომ ესმის ურსუნის ხმა. ექსპედიცია გზად არაერთ ქაოსის მიმდევარ ნორსკათა დასახლებას ხვდება და ანადგურებს, და მის განმავლობაში იური ნელ-ნელა ქაოსის გავლენის ქვეშ ექცევა ჩრდილოელთა არტეფაქტების გამოყენების გამო. საბოლოოდ, სრულად ქაოსის გავლენის ქვეშ მოქცეული იური შედის პორტალში და ხვდება ქაოსის სამფლობელოში, სულთა სამჭედლოში, სადაც მას ხვდება ბე'ლაკორი. ქაოსის პირველი დემონმთავარი აღიარებს, რომ ურსუნი მისი ტყვეა, და რომ ბე'ლაკორი თავად მანიპულირებთა იურით, რომ საკუთარი გავლენის ქვეშ მოექცია. შედეგად იური ქაოსით დაწყევლილი იარაღით ურსუნს აყენებს სასიკვდილო ჭრილობას. ღმერთ-დათვის აგონური ღრიალი არღვევს ზღვარს მატერიალურ სამყაროსა და ქაოსის სამფლობელოს შორის და იწვევს მრავალი პორტალისმაგვარი ნაპრალის წარმოქმნას მთელ მსოფლიოში. ღრიალის ძალა იურის დასახიჩრებულ სხეულს ისვრის რეალურ სამყაროში, მაგრამ, სანამ იგი მოკვდება, ქაოსის ღმერთები აჯილდოებენ მას მიღწეულის აღსანიშნავად და დემონთა მთავრად აქცევენ.

ქაოსის სამფლობელო

ურსუნის ღრიალით გამოწვეული ნაპრალები იქცევენ მრავალი მხარის ყურადღებას საკუთარი მიზნებისთვის. სანამ ურსუნი ნელა კვდება სულთა სამჭედლოში, ბე'ლაკორი მის ღვთავებრივ ძალებს შთანთქავს, რომ თავად გახდეს ქაოსის ახალი ღმერთი, და ამის დაშვება არ შეიძლება. კისლევის მმართველები ესწრაფვიან თავიანთი ღმერთის გადარჩენას, ხატაეთის დრაკონი უფლისწულები თავიანთ გაუჩინარებულ დას ეძებენ, მუდამ გაუმაძღარ ოგრებს ღმერთის ხორცი იზიდავთ, მომაკვდავი ღმერთის ტანჯვა იზიდავს ქაოსის დიად დემონებსაც, ხოლო ახლადამაღლებული დემონმთავარი, ― ღმერთმკვლელი, ― ჩადენილის დასრულებას ესწრაფვის.

საბოლოოდ ურსუნი კვდება, მაგრამ კამპანიის დასასრული დამოკიდებულია გამარჯვებული ფრაქციის სახეზე:

• კისლევი: კისლევის მმართველები გლოვობენ თავიანთ დაღუპულ ღმერთს, მაგრამ მათი ერთგულება და რწმენა აცოცხლებს მას და თავისი ძლევამოსილი ღრიალით ურსუნი ასრულებს კისლევის გრძელ ზამთარს.
• ხატაეთი: დრაკონები ასრულებენ ჯადოსნურ რიტუალს ურსუნის სულის გამოსაძახებლად. სამუდამო გაუჩინარებამდე ურსუნი უმხელს მათ, სად შეუძლიათ თავიანთი დაკარგული დის მოძებნა.
• ოგრები: ოგრები ნადიმობენ ღმერთი-დათვის გვამზე და ნარჩენებს დიად ხახაში ყრიან საკუთარი მარად მშიერი ღვთაების დასანაყრებლად.
• სკარბრანდი: სკარბრანდი ურსუნის თავის ქალას მსხვერპლად სწირავს კჰორნს იმის იმედით, რომ საბოლოოდ მიიღებს საკუთარი ღმერთის პატიებას. პასუხად მხოლოდ სისხლის ღმერთის ხარხარი ისმის.
• კაიროსი: კაიროსი ჭამს ურსუნის თვალებს და მისი მზერით საბოლოოდ იძენს აწმყოს ხედვის უნარს.
• ნ'კარი: ნ'კარი ატყვევებს მომაკვდავი ღმერთის უკანასკნელ შეგრძნებებს, მის ტანჯვას და ტკივილს ძვირფასი კისლევის ხალხისთვის, რომლებიც მის გარეშე განწირულები იქნებიან.
• კუ'გათი: ჭირისმამა ურსუნის გვამს იყენებს თავისი უძლიერესი სნეულების, ― ღმერთყვავილის, ― შესაქმნელად, რომელიც ღმერთებსაც კი დაავადებს.
• დემონმთავარი: ღმერთმკვლელი შთანთქავს ურსუნის ღვთაებრივ ძალებს და მის ძალაუფლებას კისლევის მიწებზე, რითაც ხდება სამეფოს ახალი, გულშავი, ღმერთი.

ქაოსის ფალავნები

კერძოდ ამ კამპანიაში ითვლება, რომ წინაში გაიმარჯვა კისლევმა. ურსუნის გადარჩენით კისლევის უსასრულო ზამთარი დასრულდა, მაგრამ ქაოსის სამფლობელოში მიმავალი ნაპრალები არ გამქრალან ― მხოლოდ დაიხურნენ, და მათი გახსნა და გამოყენება სხვა მიზნისთვისაც შეიძლება.

ათასწლეულების განმავლობაში ბნელ ღმერთთა მიმდევართა ჯარები ერთმანეთს ებრძოდნენ ძველთაძველი ზანბაიჯინის ნანგრევებს შორის და დაღუპულთა სულები გროვდებოდნენ ნაქალაქარის შუაგულში განთავსებულ ბრძოლის სამსხვერპლოში. მომაკვდავი ურსუნის ღრიალმა დაასუსტა სამსხვერპლოზე დადებული შემბოჭველი შელოცვები და ქაოსის რომელი ძალაც მიისაკუთრებს მასში დატყვევებულ უთვალავ სულს, შეძლებს დანარჩენებზე უპირატესობის მოპოვებას. ქაოსის ყოველი ღმერთი თავის გამორჩეულ მიმდევართა შორის ირჩევს მას, ვინც, მისი აზრით, შეძლებს ზანბაიჯინის ნანგრევებამდე მიღწევას და ბრძოლის სამსხვერპლოს დასაკუთრებას.

კოოპერატიული კამპანიები

სიუჟეტური კამპანიების გარდა, მრავალმოთამაშიანი გუნდებისთვის ასევე გათვალისწინებულია კოოპერატიული კამპანიები შედარებით მცირე ზომის რუკებზე: Sandbox-ის ტიპის Darkness and Disharmony მაქსიმუმ რვა მოთამაშით, სადაც ხატაეთის, ოგრების და დემონთა ფრაქციები მოქმედებენ დიადი ხატაეთის და მის მიმდებარე ტერიტორიებე, და შედარებით მოკლე Something Rotten in Kislev მაქსიმუმ სამი მოთამაშით, კისლევის და მის მიმდებარე ტერიტორიებზე.

ფრაქციები

• კისლევი:
  • ყინულის სამეფო კარი. ცარიცა კატარინ ბოხა;
  • დიადი მართლმორწმუნეობა. უზენაესი პატრიარქი კოსტალტინი;
  • ურსუნის მაცოცხლებლები. ცარი ბორის „ურსუს“ ბოხა;
  • ტყის ასულნი. დედა ოსტანკია.
• დიადი ხატაეთი:
  • ჩრდილოეთ პროვინციები. მიაო ინგი, გრიგალთა დრაკონი;
  • დასავლეთ პროვინციები. ჭაო მინგი, რკინის დრაკონი;
  • ზურმუხტის სამეფო კარი. იუენ პო, ზურმუხტის დრაკონი.
• ოგრების სამეფოები:
  • ოქროკბილას ტომი: ზეტირანი გრიზუს ოქროკბილა;
  • დიადი ხახის მიმდევრები: წინასწარმეტყველი სკრაგ ყასაბი;
  • კაციჭამიები. გოლგფაგ კაციჭამია.
• ქაოსის მეომრები:
  • ჩრდილთა ლეგიონი. ქაოსის ბნელი ბატონი ბე'ლაკორი;
  • ხოცვის დედოფლის ლეგიონი. ვალკია სისხლიანი;
  • წარმტაცი ლეგიონები. აზაზელი;
  • არეულობის მარიონეტები. ვილიჩ წყეული;
  • ნაყოფიერნი. ფესტუს წურბელთბატონი.
• კჰორნი:
  • კჰორნის განკვეთილნი. სკარბრანდ განკვეთილი;
  • სისხლიანი მოხეტიალეები. უ'ჟულ თავმკვეთი;
  • კჰორნის გამომწვევლები. არბაალ დაუმარცხებელი.

• სლაანეში:
  • სლაანეშის მაცდურნი. ნ'კარი მთავარმაცდური.
• ცინჩი:
  • ცინჩის ორაკულები. კაიროს ბედისმქარგავი;
  • ცბიერნი. სახემცვლელი.
• ნურგლი:
  • ნურგლის სნეულთშემოქმედნი. კუ'გათ ჭირისმამა;
  • მატლის სპა. თამურხან მატლმბრძანებელი;
  • სნეულებათა აღმრიცხველნი. ეპიდემიუსი.
• ქაოსის დემონები:
  • ქაოსის ლეგიონი. დემონმთავარი.
• ქაოსის ჯუჯები:
  • ჰაშუტის მიმდევრები. უზენაესი ქურუმი ასტრაგოთ რკინისხელა;
  • აზგორჰის ლეგიონი. შავი ციხესიმაგრის მბრძანებელი დრაჟოათ ფერფლიანი;
  • ჟარის სპა. ჟარის კოშკის მეთაური ჟატან შავი.
• ადამიანთა იმპერია:
  • ვისენლანდი და ნულნი. ელსპეთ ფონ დრაკენი.
• ჯუჯები:
  • ინოვაციის ოსტატები. მალაკაი მაკაისონი.
• მწვანეკანიანები:
  • რკინისკლანჭას ორკები. გორბად რკინისკლანჭა.

დამატებები

უფასო დამატებები

დასახელება	თარიღი	აღწერა
Immortal Empires (უკვდავთა იმპერიები)	23 აგვისტო, 2022	დამატება ავტომატურად იტვირთება და გაერთიანებულ რუკაზე სამივე ნაწილში არსებული ფრაქციებით თამაშის საშუალებას იძლევა.
Ulrika Magdova: Legendary Hero (ულრიკა მაგდოვა: ლეგენდარული გმირი)	13 აპრილი, 2023	უნიკალური ლეგენდარული გმირი იმპერიისა და კისლევის ფრაქციებისთვის.
Harald Hammerstorm (ჰარალდ გრიგალურო)	26 მაისი, 2023	უნიკალური ლეგენდარული გმირი ქაოსის მეომრების ფრაქციებისთვის.
Aekold Helbrass (ეკოლდ ჰელბრასი)	31 აგვისტო, 2023	ლეგენდარული გმირი ცინჩის, ქაოსის დემონების და ქაოსის მეომრების ზოგიერთი ფრაქციისთვის.
Epidemius: Tallyman of Nurgle (ეპიდემიუსი: ნურგლის აღმრიცხველი)	30 აპრილი, 2024	ნურგლის ლეგენდარული ლორდი, ეპიდემიუსი, და მისი კუთვნილი ფრაქცია, სნეულებათა აღმრიცხველნი.
Arbaal the Undefeated (არბაალ დაუმარცხებელი)	12 დეკემბერი, 2024	კჰორნის ლეგენდარული ლორდი, არბაალ დაუმარცხებელი, და მისი კუთვნილი ფრაქცია, კჰორნის გამომწვევლები.

ფასიანი დამატებები

დასახელება	თარიღი	აღწერა
Ogre Kingdoms (ოგრების სამეფოები)	24 თებერვალი, 2022	ოგრების სამეფოების ორი ფრაქცია საკუთარი გეიმპლეური მექანიკით და სიუჟეტით „ქაოსის სამფლობელოს“ რუკაზე: ოქროკბილას ტომი (ზეტირანი გრიზუს ოქროკბილა) და დიადი ხახის მიმდევრები (წინასწარმეტყველი სკრაგ ყასაბი).
Blood for the Blood God III (სისხლი სისხლის ღმერთს III)	23 აგვისტო, 2022	კოსმეტიკური დამატება, შეიცავს სისხლიან ეფექტებს. უფასოდ ხელმისაწვდომია იმ მოთამაშეებისთვის, რომლებმაც ანალოგიური დამატება შეიძინეს პირველი ანდა მეორე ნაწილისთვის.
Champions of Chaos (ქაოსის ფალავნები)	23 აგვისტო, 2022	ქაოსის მეომართა ოთხი ახალი ფრაქცია საკუთარი გეიმპლეური მექანიკებით და სიუჟეტით „ქაოსის სამფლობელოს“ რუკაზე: ხოცვის დედოფლის ლეგიონი (ვალკია სისხლიანი), წარმტაცი ლეგიონები (აზაზელი), არეულობის მარიონეტები (ვილიჩ წყეული), ნაყოფიერნი (ფესტუს წურბელთბატონი).
Forge of the Chaos Dwarfs (ქაოსის ჯუჯების სამჭედლო)	13 აპრილი, 2023	ქაოსის ჯუჯათა სამი ფრაქცია საკუთარი გეიმპლეური მექანიკებით და სიუჟეტით „ქაოსის სამფლობელოს“ რუკაზე: ჰაშუტის მიმდევრები (ასტრაგოთ რკინისხელა), აზგორჰის ლეგიონი (დრაჟოათ ფერფლიანი), ჟარის სპა (ჟატან შავი).
Shadows of Change (ცვლილების ჩრდილები)	31 აგვისტო, 2023	კისლევის ლეგენდარული ლორდი, დედა ოსტანკია (მეთაურობს ტყის ასულთა ფრაქციას), დიდი ხატაეთის ლეგენდარული ლორდი, ზურმუხტის დრაკონი იუენ პო (მეთაურობს ზურმუხტის სამეფო კარს), და ცინჩის ლეგენდარული ლორდი, სახემცვლელი (მეთაურობს ცბიერთა ფრაქციას). ასევე დაემატა ლეგენდარულ გმირთა დუეტი, ლურჯი აღმწერლები, ქაოსის ზოგიერთი ფრაქციისთვის და განახლდა რამდენიმე ზეფრაქციის საბრძოლო ერთეულთა სია და გეიმპლეური მექანიკები.
Thrones of Decay (ლპობის ტახტები)	30 აპრილი, 2024	ნურგლის ლეგენდარული ლორდი, თამურხან მატლმბრძანებელი (მეთაურობს მატლის სპას), ადამიანთა იმპერიის ლეგენდარული ლორდი, ელსპეთ ფონ დრაკენი (მეთაურობს ვისენლანდს და ნულნს), და ჯუჯების ლეგენდარული ლორდი, მალაკაი მაკაისონი (მეთაურობს ინოვაციის ოსტატებს). ასევე განახლდა რამდენიმე ზეფრაქციის საბრძოლო ერთეულთა სია და გეიმპლეური მექანიკები.
Omens of Destruction (ნგრევის მომასწავებელნი)	12 დეკემბერი, 2024	კჰორნის ლეგენდარული ლორდი, უ'ჟულ თავმკვეთი (მეთაურობს სისხლიან მოხეტიალეებს), მწვანეკანიანების ლეგენდარული ლორდი, გორბად რკინისკლანჭა (მეთაურობს რკინისკლანჭას ორკებს), და ოგრების ლეგენდარული ლორდი, გოლგფაგ კაციჭამია (მეთაურობს კაციჭამიებს). ასევე დაემატა ორი ლეგენდარული გმირი, სცილა ანფინგრიმი და სკარ სისხლისრისხვა, ქაოსის ზოგიერთი ფრაქციისთვის და განახლდა რამდენიმე ზეფრაქციის საბრძოლო ერთეულთა სია და გეიმპლეური მექანიკები.