ჯონდო ბაღათურია
ჯონდო (ჯონდი) ბაღათურია (დ. 30 მარტი, 1964, ბათუმი) — ქართველი ეკონომისტი, პოლიტიკოსი.
| ჯონდო (ჯონდი) ბაღათურია | |
|---|---|
| დაბადების თარიღი | 30 მარტი, 1964 |
| დაბადების ადგილი | ბათუმი |
| მოქალაქეობა |
 სსრკ → საქართველო |
| განათლება | თბილისის სახელმწიფო უნივერსიტეტი |
| ეროვნება | ქართველი |
| რელიგია | მართლმადიდებელი |
| პარტია |
ეროვნულ-დემოკრატიული პარტია (1997-2002) დემოკრატიული აღორძინების კავშირი (2002-2003) საქართველოს ლეიბორისტული პარტია (2002-2006) ქართული დასი (2007-დღემდე) |
ბიოგრაფია
რედაქტირება1980–1981 წლებში მუშაობდა ბათუმის მექანიზაციის სამმართველოში ზეინკლად. 1987 წელს მუშაობდა N4 სასკოლო კვების კომბინატში მუშად. 1987 წელს დაამთავრა თბილისის სახელმწიფო უნივერსიტეტი ინჟინერ-ეკონომისტის სპეციალობით. 1988–1989 წლებში მუშაობდა შულავერის ინერტულ მასალათა ქარხანაში. 1989–1995 წლებში მუშაობდა ტრესტ „საქსპეცმშენში“ სხვადასხვა თანამდებობებზე.
პოლიტიკური კარიერა
რედაქტირება1998–2002 წლებში იყო თბილისის საკრებულოს წევრი, ფრაქცია „ედპ-ის“ თავმჯდომარე. 2002 წლის 6 თებერვალს ედპ-ის ცენტრალურ ოფისში გამართულ სხდომაზე მიიღეს გადაწყვეტილება და ჯონდი ბაღათურია გარიცხეს პარტიიდან.[1] 2002–2003 წლებში იყო დემოკრატიული აღორძინების კავშირის თბილისის ორგანიზაციის პოლიტიკური მდივანი. 2002 წლის ადგილობრივი თვითმმართველობის არჩევნებში „აღორძინება-XXI“-ის პარტიულ სიაში მეხუთე ნომერი იყო და ვერ მოხვდა თბილისის საკრებულოში. 2003 წელს ლეიბორისტულ პარტიაში გაწევრიანდა.[2] 2006 წლის ივნისში ჯონდი ბაღათურია გახდა თბილისის საკრებულოს წევრი. მან ჩაანაცვლა დავით იოსელიანი („აღორძინება-XXI“-ის პარტიული სიის მესამე ნომერი), რომელიც ვაკე-საბურთალოს რაიონის გამგებლად აირჩიეს. 2006 წელს დატოვა ლეიბორისტული პარტია. „ლეიბორისტული პარტია კონფლიქტების გამო, ან პირადული უთანხმოების გამო არ დამიტოვებია, უბრალოდ ბევრ სტრატეგიულ საკითხზე, რასაც პარტია ახმოვანებდა ჩემი და ბატონი შალვას მოსაზრებები დიამეტრალურად განსხვავდებოდა. მივხვდი, რომ ერთ პარტიულ ჩარჩოებში ვეღარ ჩავჯდებოდი და წამოსვლა გადავწყვიტე“-განაცხადა ჯონდი ბაღათურიამ.[3] 2007 წლის 26 იანვარს დააფუძნა პოლიტიკური გაერთიანება „ქართული დასი“, რომელიც იყო ეროვნული საბჭოს წევრი. საბჭო ბლოკის სახით მონაწილეობდა 2008 წლის არჩევნებში, სადაც ბაღათურიამ მოიპოვა საპარლამენტო მანდატი. 2008–2012 წლებში იყო საქართველოს მე-7 მოწვევის პარლამენტის წევრი პარტიული სიით, საარჩევნო ბლოკი „გაერთიანებული ოპოზიცია (ეროვნული საბჭო, მემარჯვენეები)“.
რესურსები ინტერნეტში
რედაქტირება- ჯონდო ბაღათურია — საქართველოს ბიოგრაფიული ლექსიკონი
- ჯონდო ბაღათურია — საქართველოს პარლამენტის ოფიციალური საიტი (მოძველებული / არქივი / ახალი არქივი)