პოლ ბოფა
| პოლ ბოფა | |
 მალტ. Paul Boffa | |
| მალტის მე-6 პრემიერ-მინისტრი | |
|---|---|
| თანამდებობაზე ყოფნის დრო | |
| 4 ნოემბერი 1947 – 26 სექტემბერი 1950 | |
| მონარქი | ჯორჯ VI |
| წინამორბედი | უგო პასკუალე მიფსუდი |
| მემკვიდრე | ჯორჯ ბორგ ოლივერი |
| დაბადებული | 30 ივნისი 1890 ბირგუ მალტა |
| გარდაცვლილი | 6 ივლისი 1962 (72 წლის) პაოლა მალტა |
| პოლიტიკური პარტია | ლეიბორისტული პარტია; მალტის მუშათა პარტია |
| განათლება | მალტის სამეფო უნივერსიტეტი |
| ჯილდოები | ბრიტანეთის იმპერიის ორდენი; რაინდი-ბაკალავრი |
სერ პოლ ბოფა ( მალტ. Paul Boffa ; 30 ივნისი , 1890, ბირგუ, მალტის კოლონია — 6 ივლისი, 1962, პაოლა, მალტის კოლონია) — მალტის სახელმწიფო მოღვაწე, მალტის პრემიერ-მინისტრი (1947-1950). [1] [2]
ადრეული წლები
რედაქტირება1912 წელს დაამთავრა მალტის სამეფო უნივერსიტეტის სამედიცინო ფაკულტეტი; მიიღო მედიცინის დოქტორის ხარისხი. პირველი მსოფლიო ომის დროს მსახურობდა მალტის სამეფო სამედიცინო კორპუსში, სალონიკში და სანიტარულ გემებზე. ომის შემდეგ მუშაობდა ზოგად პრაქტიკოსად პაოლაში.[3]
პოლიტიკური მოღვაწეობა
რედაქტირება1921 წელს შეუერთდა ლეიბორისტულ პარტიას, ხოლო 1924 წელს აირჩიეს საკანონმდებლო კრების წევრად. 1927 წელს აირჩიეს ლეიბორისტული პარტიის თავმჯდომარედ. 1936-1939 წლებში იყო აღმასრულებელი საბჭოს წევრი. მეორე მსოფლიო ომის დროს ექიმად მსახურობდა. როდესაც ომის შემდგომ პირველი არჩევნები გაიმართა (1945 წ.) კვლავ აირჩიეს ქვეყნის პარლამენტში ლეიბორისტული პარტიის ინტერესებიდან გამომდინარე. მან თავისი პოლიტიკური კარიერის პიკს მიაღწია 1947 წლის ნოემბერში, როდესაც გახდა პირველი პრემიერ-მინისტრი ლეიბორისტული პარტიიდან და ხელმძღვანელობდა მთავრობას, რომლის უმრავლესობასაც ლეიბორისტული პარტიის წევრები შეადგენდნენ (24 წევრი).
ბოფას მთავრობა კუნძულებზე სოციალური სისტემის მშენებლობას შეუდგა, რომელიც მიმართული იყო დაწყებითი განათლებისა და საპენსიო სისტემების გაუმჯობესებისკენ. თუმცა, პრო-ბრიტანულ ბოფასა და უფრო ნაციონალისტ მინტოფს შორის წარმოქმნილმა განსხვავებებმა გამოიწვია განხეთქილება ლეიბორისტულ პარტიაში 1949 წელს. მალე პარტია დაიშალა, მაგრამ ბოფა კვლავ ინარჩუნებდა პრემიერ-მინისტრის პოსტს. პოლ ბოფამ და მისმა მხარდამჭერებმა შექმნეს მალტის მუშათა პარტია, რომელმაც ჩამოაყალიბა ხანმოკლე მთავრობები კონსერვატორ ნაციონალისტებთან ერთად 1950 წლიდან 1955 წლამდე. 1950 წელს ბოფამ ვეღარ გაიმარჯვა საპარლამენტო არჩევნებში და გადადგა თანამდებობიდან.
1951 წლიდან 1955 წლამდე იყო ჯანდაცვისა და სოციალური მომსახურების მინისტრი ჯორჯ ოლივერის კაბინეტში.
1955 წელს პოლიტიკას ჩამოშორდა ჯანმრთელობის გაუარესების გამო. 1956 წელს დედოფალმა ელიზაბეტ II-მ მიანიჭა რაინდის წოდება.
პოლ ბოფამ მნიშვნელოვანი როლი ითამაშა სასამართლოებში მალტური ენის აღიარებაში, სავალდებულო დაწყებითი განათლების და ხანდაზმულობის პენსიების შემოღებაში, ასევე ქალებისთვის ხმის უფლების მინიჭებაში.
პირადი ცხოვრება
რედაქტირებაპოლ ბოფა დაქორწინდა 1921 წელს ჯენოვეფა სესიზე. შეეძინა ორი ვაჟი და ორი ქალიშვილი: სალვინო (იგივე ვივი), ჰილდა, ჯოზეფ (ანუ პროფსი), კარმელინა (ანუ მელინა).
გარდაიცვალა პაოლაში საკუთარ რეზიდენციაში. დაკრძალულია ტარქსიენის სასაფლაოზე.
მეფე ჯორჯ V (KGV) - ის სახელობის პირველი მსოფლიო ომში დაღუპულ სავაჭრო საზღვაო ძალების გმირთა მემორიალური ჰოსპიტალი 1976 წლიდან ატარებს სერ პოლ ბოფას სახელს.
რესურსები ინტერნეტში
რედაქტირება- Official biography (Malta Department of Information) მალტ.
- http://gov.mt/en/Government/Government%20of%20Malta/Prime%20Ministers%20of%20Malta/Pages/Sir-Paul-Boffa.aspx
სქოლიო
რედაქტირება- ↑ Office of the Prime Minister
- ↑ Historical Dictionary of Malta, by Uwe Jens Rudolf, 2018
- ↑ Sir Paul Boffa: The doctor and politician - Times of Malta