ლაშარის ეკლესია

ლაშარის ეკლესია — არქიტექტურული ძეგლი თიანეთის მუნიციპალიტეტის სოფელ კვერნაულაში საყდარასგორაზე, ტყეში. განეკუთვნება გვიანდელ შუა საუკუნეებს.

ეკლესია დარბაზულია, ნაგებია დიდი ზომის რიყის ქვით. ძლიერ დაზიანებულია: ჩამოქცეულია გადახურვა, დანგრეულია ჩრდილოეთ, სამხრეთ და დასავლეთ კედლის დიდი ნაწილი. შესასვლელი სამხრეთიდან ჰქონია. ნახევარწრიული აფსიდის ღერძზე ფართო, გარეთკენ შევიწროვებული სარკმელია, რომლის ორივე მხარეს თითო სწორკუთხა ნიშია.

ლიტერატურა

• ნაკაიძე ნ., საქართველოს ისტორიისა და კულტურის ძეგლთა აღწერილობა, ტ. 2, თბ., 2008. — გვ. 388.